Սաղմոսներ

Աստուծոյ Որդիի թագաւորութեան և իր թշնամիներին յաղթելու մասին մարգարէութիւն։

2 Ի՞նչու համար են խռովութիւն անում հեթանոսները, եւ ազգերը՝ ունայն մտածում:

2 Երկրի թագաւորները վեր են կենում, եւ իշխաններն իրար հետ խորհուրդ են անում Տիրոջ դէմ եւ նորա Օծեալի դէմ թէ

3 Կոտրենք նորանց կապանքները, եւ դէն գցենք նորանց չուանները մեզանից:

4 Երկնքումը բնակողը ծիծաղում է, Տէրը ծաղրում է նորանց:

5 Այն ժամանակ նա կ’խօսի նորանց հետ իրան բարկութիւնովը, եւ իրան սրտմտութիւնովը կ’շփոթեցնէ նորանց:

6 Ես օծեցի իմ թագաւորին իմ սուրբ Սիօն սարի վերայ:

7 Կ’պատմեմ հրամանը. Տէրն ասեց ինձ. Դու իմ որդին ես, ես այսօր ծնեցի քեզ.

8 Խնդրիր ինձանից, եւ ես հեթանոսները քեզ ժառանգութիւն կ’տամ, եւ երկրի ծայրերը՝ քեզ ստացուածք:

9 Երկաթի գաւազանով կ’ջարդես նորանց, եւ բրուտի ամանի պէս կ’փշրես նորանց:

10 Եւ հիմա, ով թագաւորներ, խոհեմացէք, եւ խրատուեցէք, ով երկրի դատաւորներ:

11 Վախով ծառայեցէք Տիրոջը, եւ դողալով ցնծացէք:

12 Որդին համբուրեցէք, որ չ’բարկանայ, եւ դուք չ’կորչիք ճանապարհումը. որովհետեւ նորա բարկութիւնը շուտով կ’վառուի. երանի այն ամենին որ նորան են յուսացած: