Սաղմոսներ

72 Ո՛վ Աստված, թագավորին սովորեցրու դատել համաձայն քո օրենքների,

Արքայորդուն քո արդարությունն ուսուցանիր:+

 2 Թող նա քո ժողովրդին արդարությամբ դատի

Եվ խեղճերի համար արդար դատ տեսնի:+

 3 Թող լեռները ժողովրդին խաղաղություն բերեն,

Թող բլուրները նրանց արդարություն պարգևեն:

 4 Թող նա պաշտպանի* խեղճերին,

Փրկի աղքատների զավակներին

Եվ ջախջախի խարդախներին:+

 5 Ո՛վ Աստված, մարդիկ կվախենան քեզնից սերնդեսերունդ,

Քանի դեռ շողում է արևը,

Քանի դեռ երկնքում փայլում է լուսինը:+

 6 Թագավորի իշխանությունը նման կլինի հնձված մարգագետնի վրա թափվող անձրևի,

Երկիրը ոռոգող հորդառատ անձրևի:+

 7 Նրա օրերում արդարը կծաղկի,+

Եվ քանի դեռ լուսինը երկնքում փայլի,*

Երկրի վրա ամենուր խաղաղություն կտիրի:+

 8 Ծովից ծով կտարածվի նրա տիրապետությունը,*

Եփրատից* մինչև երկրի ծայրերը:+

 9 Անապատում ապրողները նրա առաջ կխոնարհվեն,

Նրա թշնամիները հողը կլիզեն:+

10 Թարսիսի և կղզիների թագավորները նրան տուրք կվճարեն,+

Սաբայի և Սեբայի թագավորներն ընծաներ կբերեն:+

11 Բոլոր թագավորները նրա առաջ կխոնարհվեն,

Բոլոր ազգերը նրան կծառայեն:

12 Նա կփրկի աղքատին, ով կանչում է օգնության,

Կազատի խեղճին և նրան, ով չունի օգնական:

13 Աղքատին ու խեղճին նա կկարեկցի,

Կարիքավորների կյանքը կփրկի:

14 Ճնշումներից և բռնությունից նրանց կազատի,*

Նրանց կյանքը* նրա աչքում թանկ կլինի:

15 Թող նա երկար կյանք ունենա,

Թող Սաբայի ոսկին բերեն նրան:+

Թող շարունակ նրա համար աղոթքներ մատուցվեն,

Եվ թող նրան օրնիբուն օրհնեն:

16 Երկրի վրա հացահատիկի լիություն կլինի,+

Անգամ լեռների գագաթներին այն առատորեն կբուսնի:

Թագավորի դաշտերը առատ բերք կտան, ինչպես Լիբանանում,+

Քաղաքներում փարթամորեն կաճի բնակչությունը, ինչպես երկրի բուսականությունը:+

17 Թող հարատև լինի նրա անունը,+

Թող այն մնա այնքան ժամանակ, քանի դեռ կա արևը:

Թող մարդիկ նրա միջոցով օրհնվեն,+

Թող բոլոր ազգերը նրան երջանիկ անվանեն:

18 Փա՜ռք Եհովա Աստծուն՝ Իսրայելի Աստծուն,+

Միայն նա է զարմանահրաշ գործեր անում:+

19 Թող նրա փառավոր անունը հավերժ գովաբանվի,+

Թող ողջ երկիրը նրա փառքով լցվի:+