1 Կորնթացիներ

8 Ինչ վերաբերում է կուռքերին զոհաբերված կերակուրին,+ իհարկե բոլորս էլ գիտելիքներ ունենք այդ մասին:+ Բայց իմացեք, որ պարզապես գիտելիք ունենալը հպարտացնում է, մինչդեռ սերը ամրացնում է:+ 2 Մեկը գուցե կարծի, թե գիտի ինչ-որ բան, բայց իրականությունն այն է, որ նա դեռ չգիտի, ինչպես հարկն է: 3 Մինչդեռ եթե մեկը սիրում է Աստծուն, Աստված ճանաչում է նրան:

4 Այսպիսով՝ կարելի՞ է կուռքերին զոհաբերված կերակուր ուտել: Մենք գիտենք, որ կուռքը ոչինչ է,+ և որ միայն մեկ Աստված կա:+ 5 Ճիշտ է, կան կարծեցյալ աստվածներ երկնքում կամ երկրի վրա:+ Բայց ինչքան էլ մարդկանց համար շատ «աստվածներ» ու «տերեր» լինեն, 6 մեզ համար միայն մեկ Աստված կա՝+ Հայրը,+ ով ստեղծել է ամեն բան, ու մենք նրա համար ենք ապրում,+ և կա մեկ Տեր՝ Հիսուս Քրիստոսը, որի միջոցով է ստեղծվել ամեն բան,+ ու մենք էլ նրա միջոցով կյանք ունենք:

7 Բայց բոլորը չէ, որ այդ ամենը գիտակցում են:+ Ոմանք, ովքեր նախկինում կուռքեր են պաշտել, կուռքին զոհաբերված կերակուր ուտելիս համարում են, որ այդպիսով կուռք են պաշտում,+ և նրանց խիղճը, հասուն չլինելով, դատապարտում է նրանց:*+ 8 Բայց կերակուրը որևէ կերպ չի ազդում Աստծու հետ մեր փոխհարաբերությունների վրա.+ չուտելով մեր արժեքը չենք գցում և ուտելով մեր արժեքը չենք բարձրացնում:+ 9 Սակայն զգույշ եղեք, որ որոշելու ձեր իրավունքից օգտվելով՝ ինչ-որ ձևով գայթակղության քար չդառնաք ոչ հասուն խիղճ ունեցողների համար:+ 10 Եթե նման խիղճ ունեցող մեկը տեսնի, որ դու՝ այդ ամենը իմացողդ, կուռքի տաճարում նստած ուտում ես, մի՞թե համարձակությամբ չի լցվի, որ մինչև անգամ կուռքերին զոհաբերվող կերակուր ուտի: 11 Այդպիսով՝ քո իմացությունը պատճառ կլինի, որ հասուն խիղճ չունեցողը կործանվի, այո՛, քո եղբայրը, որի համար Քրիստոսը մահացել է:+ 12 Երբ այս կերպով մեղք եք գործում ձեր եղբայրների դեմ և վնասում եք նրանց ոչ հասուն խիղճը,+ դուք Քրիստոսի դեմ եք մեղք գործում: 13 Հետևաբար, եթե կերակուրը սայթաքելու պատճառ է դառնում եղբորս համար, էլ երբեք միս չեմ ուտի, որ չվնասեմ նրան:+