Պատանեկան տարիների ուրախություններն ու դժվարությունները

ՊԱՏԱՆԵԿՈՒԹՅՈՒՆԸ կարող է հրաշալի ժամանակաշրջան լինել մարդու կյանքում։ Եվ հաճախ այդպես էլ լինում է։ Մեծահասակներից շատերն են սիրով հիշում իրենց պատանեկան տարիները։

Սակայն հարկավոր է ընդունել, որ մենք ապրում ենք «չար ժամանակներ[ում]» (Բ Տիմոթէոս 3։1)։ Սա լրացուցիչ բեռ է դարձել պատանիների ուսերին, որը բոլորովին տարբերվում է այն ամենից, ինչ կրել են նախորդ սերունդները։ Թերևս այս է պատճառը, որ երիտասարդական մի հանդեսի գլխավոր խմբագիր Սաբրինա Վայլը պատանեկան տարիները համեմատում է «պարանի վրայով քայլելուն, ընդ որում առանց անվտանգությունն ապահովող ցանցի»։ Եվ իրոք, կյանքի այս փոթորկալից շրջանում անհատը անընդհատ կարող է իրեն անհանգիստ, կաշկանդված ու շփոթված զգալ։ «Մանկության և պատանեկության արանքում հայտնվելով,— գրում է Վայլը,— պատանիները ստիպված են լինում կրել այդ շրջաններին բնորոշ ամենաանցանկալի դժվարությունները»։

Եթե պատանի ես, ինչպե՞ս կարող ես հաղթահարել այն խնդիրները, որոնց բախվում ես։ Եթե անցումային տարիքում գտնվող երեխայի ծնող եք, ի՞նչը կօգնի ձեզ հիշել այդ հուզումնալից շրջանը և ավելի լավ հասկանալ ձեր որդու կամ դստեր ապրումները։ Թե՛ պատանիներին, թե՛ մեծահասակներին հրավիրում ենք ավելի խորությամբ քննարկել անցումային տարիների խնդիրները, որոնք ներկայացված են այս հոդվածաշարում։ Դա կօգնի պատանիներին ոչ միայն վերապրել այդ շրջանը, այլև հաջողության հասնել։