Պատմում են Թագավորության քարոզիչները

Ճշմարտությունը՝ ամենաանսպասելի տեղում

ԱՍՏԾՈ կամքն է, «որ բոլոր մարդիկ փրկուեն եւ հասնեն ճշմարտութեան գիտութեանը» (Ա Տիմոթէոս 2։3, 4)։ Այդ իսկ նպատակով Եհովայի վկաները տպագրել ու տարածել են միլիոնավոր Աստվածաշնչեր ու Աստվածաշունչն ուսումնասիրելու ձեռնարկներ։ Երբեմն այդ հրատարակություններն օգնում են ազնվասիրտ մարդկանց իմանալու ճշմարտությունն ամենաանսպասելի ձևերով։ Ահա թե ինչ են պատմում Ֆրիթաունում (Սիեռա Լեոնե) ապրող քարոզիչները։

Օսմանը երկրորդն էր ընտանիքի ինը երեխաներից։ Նրանց ընտանիքում կրոնը հարգի էր, և նա հոր հետ միշտ գնում էր երկրպագության։ Սակայն Օսմանին հանգիստ չէր տալիս այն, ինչ իր կրոնը սովորեցնում էր դժոխքի մասին։ Նա չէր կարողանում հասկանալ, թե ինչպես կարող էր գթասիրտ Աստվածը տանջել ամբարիշտներին՝ կրակի մեջ նրանց այրելով։ Դժոխքի վերաբերյալ և ոչ մի բացատրություն չէր բավարարում Օսմանին։

Նա արդեն քսան տարեկան էր, երբ մի օր աղբարկղում նկատեց կիսով չափ թաղված մի կապույտ գիրք։ Օսմանը գրքեր շատ էր սիրում, ուստի մոտեցավ, վերցրեց գիրքը, մաքրեց ու կարդաց վերնագիրը։ Գրքի վրա գրված էր. «Ճշմարտություն, որ հավիտենական կյանքի է առաջնորդում»։a

«Այս ի՞նչ ճշմարտություն է»,— զարմանքով մտածեց Օսմանը։ Նրա հետաքրքրասիրությունը բորբոքվեց։ Նա գնաց տուն և մի շնչով կարդաց գիրքը։ Նա անչափ ուրախացավ՝ իմանալով, որ Աստված անուն ունի՝ Եհովա (Սաղմոս 83։18)։ Օսմանը նաև իմացավ, որ Աստծո գլխավոր հատկությունը սերն է, և որ Նա նույնիսկ գարշում է կրակով մարդկանց տանջելու գաղափարից (Երեմիա 7։31; Ա Յովհաննէս 4։8)։ Օսմանը գրքում կարդաց, որ Եհովան երկրագնդի վրա շուտով դրախտ է հաստատելու, որտեղ մարդիկ հավիտյան են ապրելու (Սաղմոս 37։29; Յայտնութիւն 21։3, 4)։ Ի՜նչ չքնաղ ճշմարտություն՝ բարեգութ ու սիրառատ Աստծո կողմից։ Երախտագիտությամբ լցված՝ նա շնորհակալություն հայտնեց Եհովային, որ իրեն հնարավորություն տվեց գտնելու ճշմարտությունն ամենաանսպասելի տեղում։

Մի քանի օր անց Օսմանը ընկերների միջոցով գտավ Եհովայի վկաների Թագավորության սրահը ու գնաց նրանց հանդիպմանը։ Այնտեղ նա մի Վկայի խնդրեց, որ իր հետ Աստվածաշնչի ուսումնասիրություն անցկացնի։ Օսմանի ընտանիքը խիստ դեմ էր դրան, բայց նա չընկրկեց, հոգևորապես առաջադիմեց ու մկրտվեց (Մատթէոս 10։36)։ Այսօր նա ժողովում ծառայում է որպես երեց։ Ահա թե ի՜նչ հիանալի արդյունքների հանգեցրեց աղբարկղում գտնված գիրքը։

[ծանոթագրություն]