Ինչո՞ւ է կարևոր ապրել Աստվածաշնչի չափանիշներով

ՀՆԱՑԱԾ ու խի՞ստ է Աստվածաշնչի տեսակետը սեքսի վերաբերյալ։ Ո՛չ։ Ինչո՞ւ։ Որովհետև այս հարցում առաջնորդվելով Աստվածաշնչով՝ անհատը կարող է խուսափել՝

▪ սեռական ճանապարհով փոխանցվող հիվանդություններից,

▪ ապօրինի հղիությունից,

▪ ամուսնության քայքայումից և դրա ցավալի հետևանքներից,

▪ անմաքուր խիղճ ունենալուց,

▪ օգտագործված լինելու տհաճ զգացումից։

Մեր Արարիչը՝ Եհովա Աստվածa, ուզում է, որ մենք վայելենք իր տված բարիքները և օգուտներ ստանանք դրանցից։ Աստված «օգտակար բաներ է սովորեցնում» մեզ (Եսայիա 48։17)։ Այն մարդը, ով սեռական վարքի հարցում առաջնորդվում է Աստվածաշնչով, ձեռք է բերում՝

▪ Աստծու հավանությունը,

▪ հոգեկան անդորր,

▪ ամուր ընտանիք,

▪ բարի համբավ,

▪ ինքնահարգանք։

Իսկ դուք ապրո՞ւմ եք Աստվածաշնչի չափանիշներով։ Եթե ոչ, մտածո՞ւմ եք, որ չեք կարող փոխել ձեր ապրելակերպը։ Եթե փոխեք, Աստված ապագայում ձեզ պատասխանատվության կկանչի՞ ձեր անցյալի համար։

Քննենք հետևյալ փաստը։ Առաջին դարի քրիստոնեական ժողովի անդամներից ոմանք նախկինում պոռնիկներ, շնացողներ և համասեռամոլներ էին։ Սակայն նրանք որոշեցին փոխել իրենց ապրելակերպը, և երբ փոխեցին, Աստված ներեց նրանց (1 Կորնթացիներ 6։9–11)։ Այսօր ամբողջ աշխարհում հազարավոր անհատներ այսպիսի որոշում են կայացրել։ Նրանք հրաժարվել են անբարո կյանքից և զգացել են Աստվածաշնչի չափանիշներով ապրելու օգուտները։ Քննենք առաջին հոդվածում նշված Սառայի օրինակը։

«Անմիջապես թեթևություն զգացի»

Սառան հայտնաբերեց, որ իր անզուսպ կյանքը չտվեց իրեն այն ազատությունն ու բավականությունը, որին ձգտում էր։ «Այս ամբողջ ժամանակ իմ խիղճը կարծես քարացել էր,— ասում է նա։— Բայց հետո ամոթ զգացի և անհանգստացա, որ կարող եմ հղիանալ կամ վարակվել սարսափելի հիվանդությամբ։ Ես երբեք չկորցրի հավատս, որ Աստված կա, և գիտեի, որ իմ կենսակերպը ցավ է պատճառում նրան։ Ես ինձ անմաքուր էի զգում, և դա վատ էր ազդում ինձ վրա»։

Վերջապես Սառան իր մեջ ուժ գտավ փոխելու իր կյանքը։ Նա օգնություն խնդրեց ծնողներից, որոնք Եհովայի վկաներ են։ Օգնություն խնդրեց նաև տեղի ժողովի երեցներից։ «Ինձ հաճելիորեն զարմացրեց ծնողներիս և երեցների ջերմությունն ու սերը։ Անմիջապես թեթևություն զգացի»,— ասում է Սառան։

Այժմ Սառան երկու երեխաների մայր է։ Նա ասում է. «Ես իմ երեխաներին պարզ ասում եմ, թե ինչ որոշումներ եմ կայացրել նախկինում։ Ուզում եմ, որ նրանք հասկանան, թե Աստծու չափանիշներն արհամարհելն ինչպես է ազդել ինձ վրա, և եթե նրանք հետևեն սեքսի վերաբերյալ Աստվածաշնչի չափանիշներին, ինչ օգուտներ կստանան ֆիզիկական, մտավոր և էմոցիոնալ առումով։ Համոզված եմ, որ Աստված բարոյական չափանիշներ է սահմանել մեզ համար, որովհետև չի ուզում, որ մենք փորձանքների մեջ ընկնենք»։

Դուք նույնպես կարող եք օգուտներ ստանալ՝ Աստծու սիրառատ առաջնորդությանը հետևելով։ Աստվածաշունչը խոստանում է. «Եհովայի կանոններն արդար են, ուրախացնում են սիրտը, Եհովայի պատվիրանը մաքուր է, լույս է տալիս աչքերին.... Դրանք պահելու մեջ մեծ վարձատրություն կա»b (Սաղմոս 19։8, 11)։

[ծանոթագրություններ]

[մեջբերում 8-րդ էջի վրա]

Ովքեր անտեսում են Աստվածաշնչի չափանիշները, հաճախ զգացական վերքեր են պատճառում

[մեջբերում 9-րդ էջի վրա]

Ովքեր ապրում են Աստվածաշնչի չափանիշներով, ունենում են մաքուր խիղճ և ամուր ընտանիք