Հանդիպում, որը նշանավորվեց միասնությամբ և ոգևորիչ ծրագրերով

«ԱՍՏՎԱԾԱՇՆՉԻ և թերթիկի Դիտարան ընկերության» (Փենսիլվանիա) տարեկան հանդիպումը միշտ էլ ոգևորիչ իրադարձություն է։ Հենց այդպիսին էր 127-րդ տարեկան հանդիպումը, որը տեղի ունեցավ 2011​թ. հոկտեմբերի 1-ին՝ շաբաթ օրը։ Ամբողջ աշխարհից հրավիրված հյուրերը հավաքվել էին Ջերսի Սիթիում գտնվող Եհովայի վկաների համաժողովների սրահում (Նյու Ջերսի, ԱՄՆ)։

Կառավարիչ մարմնի անդամ Գերիտ Լյոշը ողջունեց ուրախ ունկնդիրներին։ Մոտ 85 երկրներից ժամանած պատվիրակներին նա ասաց, որ նրանք տարբեր ազգերից լինելով հանդերձ՝ յուրահատուկ միասնություն են վայելում։ Այդ միասնությունը լավ վկայություն է ուրիշների համար ու փառք է բերում Եհովային։ Միասնության թեման հաճախ շոշափվեց հանդիպման ժամանակ։

ԼԱՎ ԼՈՒՐԵՐ ՄԵՔՍԻԿԱՅԻՑ

Եհովայի ժողովրդի միասնությունը հատկապես ընդգծվեց ծրագրի առաջին մասում։ Բալթասար Փերլան Մեքսիկայի Բեթելի ընտանիքի երեք անդամների հետ հարցազրույց անցկացրեց Կենտրոնական Ամերիկայի վեց մասնաճյուղեր Մեքսիկայի մասնաճյուղին միաձուլելու վերաբերյալ։ Շնորհիվ դրա Մեքսիկայի Բեթելի ընտանիքը առավել բազմամշակույթ ու բազմազգ է դարձել։ Այս փոփոխությունը նպաստել է փոխադարձ քաջալերանքի։ Աստված ասես մի հսկա ռետինով ջնջել է ազգային սահմանները։

Միաձուլման հետևանքով, սակայն, առաջ եկան մի շարք դժվարություններ, որոնցից մեկն այն էր, որ հարկավոր էր քարոզիչներին վստահեցնել, որ թեև իրենց երկրում այլևս չկա մասնաճյուղ, բայց նրանք Եհովայի կազմակերպությունից մեկուսացված չեն։ Այդ պատճառով հոգ է տարվել, որ յուրաքանչյուր ժողով ապահով էլեկտրոնային փոստ ունենա, ինչի շնորհիվ նույնիսկ մեկուսի տարածքներից կարողանում են անմիջական կապ հաստատել մասնաճյուղի հետ։

ԹԱՐՄ ՏԵՂԵԿՈՒԹՅՈՒՆՆԵՐ ՃԱՊՈՆԻԱՅԻՑ

Ճապոնիայի մասնաճյուղից Ջեյմս Լինտոնը պատմեց, թե 2011​թ. մարտին տեղի ունեցած երկրաշարժն ու ցունամիները ինչպես են անդրադարձել մեր եղբայրների վրա։ Վկաներից շատերը կորցրել են իրենց հարազատներին, ինչպես նաև ունեցվածքը։ Այլ տարածքներից Վկաները ավելի քան 3100 կացարաններ ու հարյուրավոր փոխադրամիջոցներ են տրամադրել նրանց։ Տարածաշրջանային շինարարական կոմիտեների հետ համագործակցող կամավորները առանց դադարի աշխատել են, որ վերանորոգեն եղբայրների տները։ Ավելի քան 1700 կամավորներ ցանկություն են հայտնել ծառայելու այնտեղ, որտեղ կարիք կա։ Միացյալ Նահանգներից կամավորների մի խումբ օգնել է վերականգնելու Թագավորության սրահները։ Այդ նախագծին ընդհանուր առմամբ մասնակցել է 575 հոգի։

Մեծ ուշադրություն է դարձվել տուժածների հոգևոր և էմոցիոնալ կարիքներին։ Ավելի քան 400 երեցներ հովվական այցելություններ են արել նրանց, ովքեր դրա կարիքն ունեին։ Կառավարիչ մարմնի հոգատարությունը ակնհայտ դարձավ, երբ գլխավոր վարչությունից երկու զոնալ վերակացուներ ուղարկվեցին աղետի գոտի՝ տուժածներին քաջալերելու համար։ Մխիթարության մեծ աղբյուր է եղել նաև ամբողջ աշխարհի Վկաների հոգատարությամբ լի խոսքերը։

ԻՐԱՎԱԲԱՆԱԿԱՆ ՀԱՂԹԱՆԱԿՆԵՐ

Ունկնդիրները համակ ուշադրությամբ լսեցին Բրիտանիայի մասնաճյուղից Ստիվեն Հարդիին, որը խոսեց վերջին իրավաբանական հաղթանակների մասին։ Օրինակ՝ Ֆրանսիայի կառավարությունը պահանջում էր, որ այդ երկրի Եհովայի վկաների ասոցիացիան 58 միլիոն եվրո (82 միլիոն ամերիկյան դոլար) հարկ վճարի։ Հարցը լուծվեց, երբ Մարդու իրավունքների եվրոպական դատարանը (ՄԻԵԴ) մեր օգտին որոշում կայացրեց՝ նշելով, որ Ֆրանսիայի կառավարությունը խախտել է Եվրոպական կոնվենցիայի 9-րդ հոդվածը, որը պաշտպանում է կրոնական ազատությունը։ Որոշումը կարդալով՝ կարելի է հասկանալ, որ այս գործում հարցը փողը չէր, քանի որ այնտեղ ասվում էր. «Կրոնական ասոցիացիայի ճանաչման մերժումը, լուծարումը, կրոնական շարժման վերաբերյալ նվաստացուցիչ եզրույթների գործածումը Կոնվենցիայի 9-րդ հոդվածով երաշխավորված իրավունքի իրականացման մեջ միջամտության օրինակներ են»։

ՄԻԵԴ-ը նաև հօգուտ մեզ որոշում կայացրեց Հայաստանի գործի առնչությամբ։ 1965​թ.-ից ի վեր Եվրոպական կոնվենցիան առանձին անհատների չէր պաշտպանում պարտադիր զինծառայությունից։ Սակայն Մեծ պալատը՝ Եվրոպայի դատարանի բարձրագույն ատյանը, որոշում կայացրեց, որ «համոզմունքների միջև լուրջ և անհաղթահարելի հակադրության հիմքով զինվորական ծառայությունից հրաժարվելը» պետք է երաշխավորված լինի Եվրոպական կոնվենցիայի կողմից։ Այս որոշումը պարտավորեցնում է Հայաստանին ու այնպիսի երկրներին, ինչպիսիք Ադրբեջանն ու Թուրքիան են, ընդունելու այդ իրավունքը։

ՇԻՆԱՐԱՐԱԿԱՆ ԾՐԱԳՐԵՐ

Հաջորդը ելույթ ունեցավ Կառավարիչ մարմնի անդամ Գայ Փիրսը։ Նա ասաց, որ գիտի՝ բոլոր ներկաներն ուզում են իմանալ Նյու Յորքում մեր շինարարական նախագծերի մասին։ Եղբայր Փիրսը տեսագրություն ցույց տվեց այն մասին, թե ինչպես են գործերն ընթանում Ուոլքիլում, Պատերսոնում, ինչպես նաև Ուորվիքում ու Թաքսիդոյում (Նյու Յորք) վերջերս ձեռք բերված տարածքներում։ Պլանավորված է 2014​թ.-ին Ուոլքիլում ավարտել նոր բնակելի շենքի շինարարական աշխատանքները, որտեղ կլինեն լրացուցիչ 300 սենյակներ։

Ծրագրեր կան Ուորվիքում շահագործելու 100 հեկտար հողատարածք։ «Թեև դեռ վստահ չենք, թե որն է Եհովայի կամքը Ուորվիքի վերաբերյալ,— ասաց եղբայր Փիրսը,— բայց նպատակներ կան Եհովայի վկաների գլխավոր վարչությունը տեղափոխել այնտեղ»։ Ուորվիքից 10 կիլոմետր դեպի հյուսիս գտնվող 20 հեկտար մեծության մի տարածք պլանավորվում է օգտագործել շինանյութն ու սարքավորումները պահեստավորելու համար։ «Երբ շինարարության թույլտվություն ստանանք, հուսով ենք, որ ողջ նախագիծը կավարտվի չորս տարվա ընթացքում,— ասաց եղբայրը։— Այդ ժամանակ կարող ենք վաճառել Բրուքլինի մեր սեփականությունը»։

«Մի՞թե Կառավարիչ մարմինը այլևս չի մտածում, որ մեծ նեղությունը մոտ է,— հարցրեց եղբայր Փիրսը։— Ոչ մի դեպքում։ Եթե մեծ նեղությունն ընդհատի մեր ծրագրերը, դա հրաշալի կլինի, ուղղակի հրաշալի»։

ԶԳՈՒՇԱՑԻՐ ՄՌՆՉՈՂ ԱՌՅՈՒԾԻՑ

Ստիվեն Լեթը՝ Կառավարիչ մարմնի մեկ ուրիշ անդամ, քննարկեց 1 Պետրոս 5։8-ը, որտեղ ասվում է. «Պահպանեք ձեր զգոնությունը, արթուն եղեք։ Ձեր հակառակորդը՝ Բանսարկուն, մռնչող առյուծի պես ման է գալիս՝ փնտրելով, թե ում կուլ տա»։ Եղբայր Լեթը, նշելով առյուծի մի քանի առանձնահատկություններ, ցույց տվեց, որ Պետրոսը Սատանային ճիշտ նկարագրություն է տվել։

Քանի որ առյուծը մարդուց ավելի ուժեղ է ու արագավազ, չպետք է փորձենք մեր ուժերով պայքարել Սատանայի դեմ կամ փախչել նրանից։ Մենք Եհովայի օգնության կարիքն ունենք (Ես. 40։31)։ Առյուծը գաղտագողի է մոտենում իր զոհին, ուստի պետք է խուսափենք հոգևոր խավարից, որում կարող ենք հեշտությամբ դառնալ Սատանայի զոհը։ Ինչպես որ առյուծը սպանում է անվնաս այծքաղին կամ զեբրի քնած ձագին, այնպես էլ Սատանան, որը անողորմ է, ուզում է սպանել մեզ։ Երբ առյուծը հոշոտում է իր զոհին, վերջինս անճանաչելի է դառնում։ Այդպես էլ Բանսարկուի հոգևոր զոհերի «վերջը ավելի վատ է լինում, քան սկիզբը» (2 Պետ. 2։20)։ Հետևաբար, մենք պետք է դեմ կանգնեք նրան և ամուր կառչենք աստվածաշնչյան սկզբունքներին (1 Պետ. 5։9)։

ԳՆԱՀԱՏԻՐ ԵՀՈՎԱՅԻ ՏԱՆՆ ՈՒՆԵՑԱԾ ՔՈ ՏԵՂԸ

«Մենք բոլորս տեղ ունենք Եհովայի տանը»,— ասաց հաջորդ հռետորը՝ Կառավարիչ մարմնի անդամ Սեմյուել Հերդը։ Բոլոր քրիստոնյաները տեղ ունեն Աստծու «տանը»՝ նրա հոգևոր տաճարում՝ միջոց, որի շնորհիվ Հիսուսի քավիչ զոհի հիման վրա երկրպագում ենք Աստծուն։ Այնտեղ լինելը հարկավոր է թանկ համարել, անգին առանձնաշնորհում։ Դավթի նման՝ մենք ցանկանում ենք «[մեր] կյանքի բոլոր օրերում Եհովայի տանը բնակվել» (Սաղ. 27։4)։

Եղբայր Հերդը մեջբերեց Սաղմոս 92։12–14-ը և հարցրեց. «Ինչպե՞ս է Եհովան օգնում մեզ ծաղկելու»։ Ապա պատասխանեց. «Հոգևոր դրախտում Աստված ջերմացնում է մեզ, պաշտպանում ու թարմացնում է ճշմարտության ջրերով»։ Նա ունկնդիրներին հորդորեց. «Եկեք շնորհակալություն հայտնենք նրան դրա համար։ Եկեք ուրախ լինենք, որ Եհովայի տանն ենք, և մնանք այնտեղ ոչ թե կարճ ժամանակ, այլ հավիտյան»։

ՔՐԻՍՏՈՆՅԱՆԵՐԸ ՀԱՐԳԱՆՔ ԵՆ ԴՐՍԵՎՈՐՈՒՄ ԱՍՏԾՈՒ ԽՈՍՔԻ ՀԱՆԴԵՊ

Դեյվիդ Սփլեյնը, որը նույնպես Կառավարիչ մարմնի անդամ է, հաջորդ ելույթում բացատրեց, որ ճշմարիտ քրիստոնյաները միշտ հարգանք են դրսևորել Աստծու Խոսքի հանդեպ։ Առաջին դարում թլփատության հարցը քննելիս նրանք հիմնվեցին Սուրբ Գրքի վրա (Գործ. 15։16, 17)։ Սակայն երկրորդ դարում որոշ այսպես կոչված քրիստոնյաներ, որոնք կրթվել էին հունական փիլիսոփայությամբ, սկսեցին իրենց մտավոր բավարարվածությունը Սուրբ Գրքից վեր դասել։ Հետագայում ուրիշները աստվածաշնչյան ուսմունքները փոխարինեցին այսպես կոչված եկեղեցու հայրերի ու հռոմեական կայսրերի տեսակետներով և այդպիսով սկիզբ դրեցին բազում կեղծ ուսմունքների։

Եղբայր Սփլեյնը նշեց, որ մի առակում Հիսուսը ցույց տվեց, որ երկրի վրա միշտ լինելու էին ճշմարիտ օծյալ քրիստոնյաներ, որոնք պաշտպանելու էին ճշմարտությունը (Մատթ. 13։24–30)։ Հաստատ չենք կարող ասել, թե ովքեր էին նրանք։ Սակայն դարերի ընթացքում շատերը դատապարտել են սուրբգրային հիմք չունեցող հավատալիքներն ու սովորությունները։ Նրանցից էին արքեպիսկոպոս Ագոբարդ Լիոնցին (9-րդ դար), Պիտեր Բրուիցին, Հենրի Լոզանցին և Վալդեսը (կամ՝ Վալդո) (12-րդ դար), Ջոն Ուիքլիֆը (14-րդ դար), Վիլյամ Թինդալը (16-րդ դար), Հենրի Գրուն ու Ջորջ Սթորզը (19-րդ դար)։ Այսօր Եհովայի վկաները շարունակում են ամուր կառչել սուրբգրային սկզբունքներին ու Աստվածաշունչը ճշմարտության հիմքն են համարում։ Այդ պատճառով Կառավարիչ մարմինը 2012 թվականի համար որպես տարվա խոսք ընտրել է Հովհաննես 17։17-ը, որտեղ ասվում է. «Քո խոսքը ճշմարտություն է»։

ՈԳԵՎՈՐԻՉ ՓՈՓՈԽՈՒԹՅՈՒՆՆԵՐ՝ ՄԱՐԶՈՒՄ ՍՏԱՆԱԼՈՒ ԵՎ ԾԱՌԱՅՈՒԹՅԱՆ ՀԱՄԱՐ

Կառավարիչ մարմնի անդամ Էնթոնի Մորիսի արած հայտարարությունն ընդգծեց, թե ինչ փոփոխություններ են տեղի ունեցել միսիոներների ու հատուկ ռահվիրաների համար։ 2012​թ. սեպտեմբերից սկսած՝ ընտրված երկրներում կանցկացվի Աստվածաշնչյան դպրոց քրիստոնյա զույգերի համար։ Սկսած անցած տարվա հոկտեմբերից՝ «Գաղաադ» դպրոցի նպատակը փոխվել է։ Այդ դպրոցում մարզում կստանան այն անհատները, ովքեր արդեն իսկ գտնվում են հատուկ ծառայության ինչ-որ ձևում՝ միսիոներ են (առանց «Գաղաադում» սովորելու), հատուկ ռահվիրա, շրջագայող վերակացու կամ բեթելցի։ Շրջանավարտները կզորացնեն ու կհաստատեն Աստծու ժողովրդին՝ ծառայելով մասնաճյուղերում, նշանակվելով որպես շրջագայող վերակացուներ կամ էլ ուղարկվելով խիտ բնակեցված տարածքներ, որտեղ կարող են քաջալերել ժողովներին քարոզչական գործունեության մեջ։

Հեռավոր ու մեկուսի վայրերում ավելի շատ հատուկ ռահվիրաներ կնշանակվեն։ 2012​թ. հունվարին Ամուրի եղբայրների և Քրիստոնյա զույգերի դպրոցների որոշ շրջանավարտներ կնշանակվեն ժամանակավոր հատուկ ռահվիրաներ, որ քարոզեն հեռավոր տարածքներում ու ընդլայնեն քարոզչական գործը այդ տեղանքներում։ Նրանք հատուկ ռահվիրա են լինելու մեկ կամ մեկից երեք տարի։ Ովքեր արդյունավետ լինեն, գուցե մշտական նշանակում ստանան։

2011​թ. տարեկան հանդիպումը ուրախ ժամանակ էր։ Մենք հույս ունենք, որ Եհովան կօրհնի այս նոր միջոցառումները, որպեսզի դրանք նպաստեն քարոզչական գործունեության ընդլայնմանը և է՛լ ավելի միավորեն մեր եղբայրությունը, և այդ ամենը հանուն Նրա փառքի ու պատվի։

[շրջանակ/​նկարներ 18-րդ և 19-րդ էջերի վրա]

ԾԱՆՈԹԱՆՈՒՄ ԵՆՔ ՄՈՏԻԿԻՑ

Ծրագրի մեջ ընդգրկված էր նաև հարցազրույց այն ինը այրիներից հինգի հետ, որոնց ամուսինները եղել են Կառավարիչ մարմնի անդամներ։ Քույրեր Մարինա Սիդլիկը, Էդիթ Սյութերը, Մելիտա Յարաչը, Մելբա Բերին և Սիդնի Բարբերը պատմեցին, թե ինչպես են իմացել ճշմարտությունը և սկսել լիաժամ ծառայությունը։ Յուրաքանչյուրը պատմեց իր ամուսնու և այն օրհնությունների մասին, որ վայելել են միասին ծառայելիս, հիշողություններ, որ անչափ թանկ են իրենց համար։ Հարցազրույցը հուզիչ եզրափակում ունեցավ։ Բոլոր ներկաները երգեցին 86 համարի երգը, որի վերնագիրն է՝ «Հավատարիմ կանայք, քրիստոնյա քույրեր»։

[նկարներ]

(Վերևում) Դանիել և Մարինա Սիդլիկներ, Գրանտ և Էդիթ Սյութերներ, Թեոդոր և Մելիտա Յարաչներ

(Ներքևում) Լոյդ և Մելբա Բերիներ, Քերի և Սիդնի Բարբերներ

[քարտեզ 16-րդ էջի վրա]

(Ամբողջական պատկերի համար տե՛ս հրատարակությունը)

Վեց մասնաճյուղ միաձուլվեց Մեքսիկայի մասնաճյուղին

ՄԵՔՍԻԿԱ

ԳՎԱՏԵՄԱԼԱ

ՀՈՆԴՈՒՐԱՍ

ՍԱԼՎԱԴՈՐ

ՆԻԿԱՐԱԳՈՒԱ

ԿՈՍՏԱ ՌԻԿԱ

ՊԱՆԱՄԱ

[նկար 17-րդ էջի վրա]

Ուորվիքում (Նյու Յորք) Եհովայի վկաների գլխավոր վարչության հավանական տեսքը