Կարո՞ղ ես ընդլայնել ծառայությունդ
1. Ինչո՞ւ է կարևոր հրատապության ոգով ծառայել։
1 Տեսնելով մարդկանց հետաքրքրությունը բարի լուրի հանդեպ՝ Հիսուսը հորդորեց իր հետևորդներին «աղերսել հնձի Տիրոջը, որ աշխատողներ ուղարկի հնձի համար» (Մատթ. 9։37, 38)։ Քանի որ մենք ապրում ենք հնձի վերջում, մեր աշխատանքը առավել քան երբևէ հրատապ է։ Հետևաբար պետք է աղոթքով խորհրդածենք ու տեսնենք, թե ինչպես կարող ենք ավելին անել ծառայության մեջ (Հովհ. 14։13, 14)։
2. Ինչպե՞ս են ոմանք ընդլայնել իրենց ծառայությունը։
2 Ծառայությունն ընդլայնելու միջոցներ։ Եհովայի առաջնորդությամբ և աջակցությամբ շատերը սկսում են ծառայել որպես ընդհանուր ռահվիրա (Սաղ. 26։2, 3; Փիլիպ. 4։6)։ Ոմանք էլ մեկ կամ մի քանի ամիս ծառայում են որպես ենթառահվիրա, և այն ուրախությունը, որ ստանում են այդ ծառայությունից, մղում է նրանց դառնալու ընդհանուր ռահվիրա (Գործ. 20։35)։
3. Եթե նախկինում ծառայել ես որպես ռահվիրա, ի՞նչ նպատակ կարող ես դնել հիմա։
3 Կարո՞ղ ես վերսկսել ռահվիրայական ծառայությունդ։ Հավանաբար կարոտով ես հիշում այն ժամանակը, երբ ծառայում էիր որպես ռահվիրա։ Իսկ աղոթքով դիմե՞լ ես Եհովային՝ ռահվիրայությունդ վերսկսելու նպատակով։ Միգուցե այն հանգամանքները, որոնք ստիպել են քեզ դադարեցնել այդ ծառայությունը, այլևս չկան, և հիմա կարող ես նորից ռահվիրա ծառայել (1 Հովհ. 5։14, 15)։
4. Ի՞նչ բացառիկ հնարավորություն ունենք բոլորս։
4 Հունձը ընթացքի մեջ է և շուտով իր ավարտին է հասնելու (Հովհ. 4։35, 36)։ Ուստի մեզնից յուրաքանչյուրը կարող է քննել իր հանգամանքները և որոշ փոփոխություններ անել իր գրաֆիկում, որպեսզի ավելի շատ մասնակցի ծառայությանը։ Իսկ եթե չենք կարող ընդլայնել մեր ծառայությունը հանգամանքների բերումով, ապա կարող ենք նպատակ դնել բարելավելու մեր ծառայության որակը (Մարկ. 12։41–44)։ Ի՜նչ մեծ առանձնաշնորհում է, որ բոլորս էլ հնարավորություն ունենք ծառայելու Եհովային (Սաղ. 110։3)։