Լավ ուսուցչի ամենակարևոր հատկությունը
1. Ո՞րն է լավ ուսուցչի ամենակարևոր հատկությունը։
1 Ինչի՞ շնորհիվ է անհատը Աստվածաշնչի լավ ուսուցիչ դառնում։ Կրթությա՞ն, փորձի՞, թե՞ ընդունակությունների։ Իրականում, մի հատկության։ Այդ հատկությունը Օրենքի կատարումն է, որը Հիսուսի աշակերտներին բնորոշող նշանն է։ Բացի այդ, այն Եհովայի ամենագլխավոր և ամենագրավիչ հատկությունն է (Հովհ. 13։35; Գաղ. 5։14; 1 Հովհ. 4։8)։ Խոսքը սիրո մասին է։ Այո՛, լավ ուսուցիչը սեր է դրսևորում։
2. Ինչո՞ւ է կարևոր սեր դրսևորել մարդկանց հանդեպ։
2 Սիրիր մարդկանց։ Մեծ Ուսուցիչ Հիսուսը սեր էր դրսևորում մարդկանց հանդեպ, և դա մղում էր նրանց լսելու իրեն (Ղուկ. 5։12, 13; Հովհ. 13։1; 15։13)։ Եթե սիրում ենք մարդկանց, ապա ամեն հնարավոր առիթի դեպքում վկայություն կտանք։ Մեզ հետ չի պահի ոչ մի խոչընդոտ՝ ո՛չ հալածանքը, ո՛չ անտարբերությունը։ Նաև անկեղծ անձնական հետաքրքրություն կդրսևորենք այն անհատների հանդեպ, ում քարոզում ենք և մեր մոտեցումը կհարմարեցնենք նրանց կարիքներին։ Ավելին, պատրաստ կլինենք ժամանակ տրամադրելու ոչ միայն անհատի հետ Աստվածաշունչ ուսումնասիրելուն, այլև յուրաքանչյուր ուսումնասիրությանը նախօրոք պատրաստվելուն։
3. Ինչպե՞ս Աստվածաշնչի ճշմարտությունների հանդեպ սերը կօգնի մեզ ծառայության ժամանակ։
3 Սիրիր Աստվածաշնչի ճշմարտությունները։ Հիսուսը նաև սիրում էր Աստվածաշնչի ճշմարտությունները և դրանք գանձ էր համարում (Մատթ. 13։52)։ Եթե սիրում ենք ճշմարտությունը, ոգևորվածությամբ կխոսենք, ինչն էլ իր հերթին կմղի անհատին հետաքրքրությամբ լսելու մեզ։ Այդպիսի սերը կօգնի կենտրոնանալու մեր հաղորդած անգին լուրի և ոչ թե մեր սահմանափակ ընդունակությունների վրա, և արդյունքում ծառայության ժամանակ լարվածություն չենք զգա։
4. Ինչպե՞ս կարող ենք սեր զարգացնել։
4 Սեր զարգացրու։ Ինչպե՞ս կարող ենք սեր զարգացնել մարդկանց հանդեպ։ Խորհելով Եհովայի ու իր Որդու դրսևորած սիրո մասին, ինչպես նաև այն մասին, թե հոգևոր ինչ խղճուկ վիճակում են մարդիկ գտնվում (Մարկ. 6։34; 1 Հովհ. 4։10, 11)։ Աստվածաշնչյան ճշմարտությունների հանդեպ մեր սերը կարող ենք խորացնել նաև կանոնավորաբար Աստվածաշունչ ընթերցելով և խորհրդածելով։ Սերը ոգու պտղի երեսակներից է (Գաղ. 5։22)։ Ուստի կարող ենք խնդրել Եհովային, որ տա իր սուրբ ոգին և օգնի մեզ աճելու սիրո մեջ (Ղուկ. 11։13; 1 Հովհ. 5։14)։ Ուրեմն անկախ մեր կրթությունից, ճշմարտության մեջ ունեցած փորձից կամ ընդունակություններից՝ մենք կարող ենք Աստվածաշնչի արդյունավետ ուսուցիչներ դառնալ, եթե սեր դրսևորենք։