Թիկունք կանգնիր Եհովայի տված բարոյական չափանիշներին

Եհովա Աստված մարդկանց համար բարոյական չափանիշներ է սահմանել։ Օրինակ՝ նա պատվիրել է, որ ամուսնությունը պետք է հարատև միություն լինի տղամարդու և կնոջ միջև (Մթ 19։4–6, 9)։ Նա դատապարտում է սեռական անբարոյության բոլոր ձևերը (1Կթ 6։9, 10)։ Եհովան նույնիսկ հագուկապի ու հարդարանքի վերաբերյալ է սկզբունքներ տվել, որոնց հետևելով՝ նրա ժողովուրդը տարբերվում է մյուսներից (2Օր 22։5; 1Տմ 2։9, 10)։

Այսօրվա աշխարհում շատերը մերժում են Եհովայի չափանիշները (Հռ 1։18–32)։ Նրանք թույլ են տալիս, որ հասարակության կարծիքն ազդի իրենց հագուկապի, հարդարանքի և վարվելակերպի վրա։ Ոմանք նույնիսկ պարծենում են, որ անբարո և սանձարձակ կյանքով են ապրում ու քննադատում են նրանց, ովքեր ուրիշ չափանիշներով են ապրում (1Պտ 4։3, 4)։

Որպես Եհովայի վկաներ՝ մենք պետք է քաջաբար թիկունք կանգնենք նրա տված բարոյական չափանիշներին (Հռ 12։9)։ Ինչպե՞ս։ Մենք պետք է նրբանկատորեն հայտնենք ուրիշներին, թե ինչն է ընդունելի Աստծուն։ Բացի այդ՝ մենք ինքներս պետք է ապրենք նրա տված բարձր չափանիշներով։ Օրինակ՝ երբ հագուստի և հարդարանքի ոճ ենք ընտրում, ինքներս մեզ հարցնենք. «Ի՞նչ է ցույց տալիս իմ կատարած ընտրությունը. որ առաջնորդվում եմ Եհովայի՞ չափանիշներով, թե՞ աշխարհի։ Իմ հագուկապն ու հարդարանքը ցույց տալի՞ս են, որ աստվածավախ քրիստոնյա եմ»։ Նախքան որևէ հաղորդում կամ ֆիլմ դիտելը, կարող ենք մտածել հետևյալ հարցերի շուրջ. «Եհովային հաճելի՞ է այս հաղորդումը։ Այն խրախուսում է հետևել Եհովայի՞ բարոյական չափանիշներին, թե՞ աշխարհի։ Իմ ընտրած ժամանցի ձևը չի՞ թուլացնի բարոյական չափանիշներին հետևելու իմ վճռականությունը (Սղ 101։3)։ Այն գայթակղություն չի՞ լինի ընտանիքիս անդամների կամ ուրիշների համար» (1Կթ 10։31–33)։

Ինչո՞ւ է անչափ կարևոր ապրել Եհովայի տված բարոյական չափանիշներով։ Հիսուս Քրիստոսը շուտով կվերացնի մարդկային կառավարություններն ու չարությունը (Եզկ 9։4–7)։ Կփրկվեն միայն նրանք, ովքեր կատարում են Աստծու կամքը (1Հվ 2։15–17)։ Ուրեմն եկեք թիկունք կանգնենք Եհովայի տված բարոյական չափանիշներին, որպեսզի բոլորը տեսնեն մեր լավ վարքը և փառք տան Աստծուն (1Պտ 2։11, 12)։

ԴԻՏԵՔ «ԴԱՐՁԻՐ ԵՀՈՎԱՅԻ ԸՆԿԵՐԸ» ՖԻԼՄԱՇԱՐԻ «ՄԵԿ ՏՂԱՄԱՐԴ, ՄԵԿ ԿԻՆ» ՏԵՍԱՆՅՈՒԹԸ ԵՎ ՔՆՆԱՐԿԵՔ ՀԵՏԵՎՅԱԼ ՀԱՐՑԵՐԸ.

• Ինչո՞ւ է Եհովայի տված չափանիշներով ապրելը խելամիտ։

• Ինչո՞ւ ծնողները պետք է իրենց երեխաների մեջ դեռ վաղ մանկությունից սերմանեն Եհովայի տված բարոյական չափանիշները։

• Ինչպե՞ս կարող են թե՛ փոքրերը, թե՛ մեծերը օգնել մարդկանց, որ նրանք էլ վայելեն Եհովայի օրհնությունները։