Քաղաքական թոհուբոհ. իրականանում է աստվածաշնչյան մարգարեությունը

Այսօր քաղաքական տարբեր հայացքները պառակտումներ են մտցնում հասարակության մեջ։ Մարդիկ տարակարծիք են առօրյա կյանքին առնչվող տարբեր օրենքների վերաբերյալ և շատ բուռն են արտահայտում իրենց քաղաքական հայացքները՝ հարուցելով թեժ բանավեճեր։ Կառավարական համակարգում օրենսդիր մարմնի ներկայացուցիչները և այլ պաշտոնատար անձինք հաճախ իրարամերժ դիրքորոշումներ են ունենում և չեն ցանկանում զիջումների գնալ։ Նման տարաձայնությունները քաղաքական լարվածություն են առաջացնում, ինչը կաթվածահար է անում կառավարության բնականոն գործունեությունը։

Հատկապես ուշադրության է արժանի Ամերիկայի Միացյալ Նահանգներում (ԱՄՆ) և Մեծ Բրիտանիայում (կոչվում է նաև Միացյալ Թագավորություն) տիրող քաղաքական թոհուբոհը։ Ինչո՞ւ։ Քանի որ Աստվածաշնչում մարգարեացվել էր, որ այդ երկու պետությունների ներսում այդպիսի լարվածություն էր լինելու, ընդ որում հենց այն ժամանակ, երբ Աստծու հաստատած երկնային կառավարությունը ուր որ է միջամտելու էր ու գլոբալ փոփոխություններ էր անելու երկրագնդի վրա։

Քաղաքական թոհուբոհ «վերջին օրերում»

Աստվածաշնչում կա մի ցնցող մարգարեություն, որն արձանագրված է «Դանիել» գրքում։ Այդ մարգարեության մեջ Աստված տեղեկացրել էր, թե «ինչ է լինելու վերջին օրերում»՝ նկատի ունենալով ապագայում սպասվող մի վճռորոշ ժամանակաշրջան, երբ մարդկության պատմության մեջ շրջադարձային փոփոխություններ էին լինելու (Դանիել 2։28)։

Այդ մարգարեությունը Աստված հայտնել էր Բաբելոնի թագավոր Նաբուգոդոնոսորին տված երազի միջոցով։ Այդ երազում թագավորը տեսավ մի հսկայական արձան, որը հիմնականում կազմված էր տարբեր մետաղներից։ Իսկ հետո Դանիել մարգարեն բացատրեց, որ գլխից մինչև ոտնաթաթերը արձանի տարբեր մասերը ներկայացնում էին տարբեր աշխարհակալ ուժերի, որոնք պատմության ընթացքում մեկը մյուսի հետևից վերելք ու անկում էին ապրելու։a Իսկ վերջում արձանը ամբողջությամբ տապալվելու էր փոխաբերական քարի կործանարար հարվածից։ Այդ քարը խորհրդանշում է Աստծու հաստատած թագավորությունը, կամ՝ կառավարությունը (Դանիել 2։36-45)։

Այդ մարգարեության համաձայն՝ Աստծու թագավորությունը վերացնելու է աշխարհի բոլոր կառավարությունները։ Դա հենց այն Թագավորությունն է, որի մասին Հիսուսը իր հետևորդներին սովորեցրեց աղոթել. «Թող գա քո թագավորությունը» (Մատթեոս 6։10)։

Բայց այդ մարգարեության ո՞ր մասում է խոսվում քաղաքական լարված իրադրության մասին։ Կարդում ենք, որ արձանի ոտնաթաթերի «մի մասը երկաթից էր, մի մասը՝ կավից» (Դանիել 2։33)։ Ի տարբերություն արձանի մյուս հատվածների, որոնցից ամեն մեկը մի մետաղից էր, այդ հատվածը կազմված էր տարբեր նյութերի խառնուրդից, ինչը նշան էր, որ դրանով ներկայացվող աշխարհակալ ուժը տարբերվելու էր մյուսներից։ Ի՞նչ առումով։ Դանիելի մարգարեության մեջ այսպիսի բացատրություն է տրվում.

Փաստորեն մարգարեությունից երևում է, որ արձանի ոտնաթաթերով ներկայացված աշխարհակալ ուժի քաղաքական դաշտում բաժանումներ էին լինելու։ Նրա հզոր ուժի լիարժեք դրսևորմանը խոչընդոտելու էին մարդիկ՝ իր իսկ ժողովուրդը։

Դանիելի մարգարեությունը իրականանում է մեր օրերում

Արձանի ոտնաթաթերը ներկայացնում են մեր օրերում մեծ ազդեցություն ունեցող աշխարհակալ մի ուժ՝ ԱՄՆ-Մեծ Բրիտանիա դաշինքը։ Ներկայիս զարգացումները ինչպե՞ս են հանգեցնում այդ եզրակացությանը։

Մարգարեության արձանի ոտնաթաթերի «մի մասը երկաթից էր, մի մասը՝ կավից», իսկ նման համադրությունը բնականաբար չի կարող ամուր լինել (Դանիել 2։42)։ Թե՛ Միացյալ Նահանգների, թե՛ Բրիտանիայի հասարակության մեջ գործող տարբեր տարրեր թուլացնում են այդ երկրների հզորությունը։ Օրինակ՝ երկու երկրներում էլ քաղաքացիների միջև ներքին բախումներ են տեղի ունենում։ Բացի այդ՝ մարդիկ բողոքի կատաղի ցույցեր են անում իրենց իրավունքները պաշտպանելու համար։ Իսկ ընտրված ներկայացուցիչները հաճախ չեն կարողանում տարբեր հարցերի վերաբերյալ ընդհանուր հայտարարի գալ՝ ձայների մեծամասնություն հավաքելով։ Երկու երկրների կառավարություններն էլ իրենց ժողովրդի մեջ եղած այդ բաժանումների պատճառով չեն կարողանում լիարժեք իրագործել իրենց ծրագրերը։

Եկեք դիտարկենք Դանիելի մարգարեության որոշ մանրամասներ և տեսնենք, թե դրանք ինչպես են կատարվում այսօր։

Մարգարեություն. «Նույն ձևով էլ թագավորությունն է բաժանված լինելու: Բայց այն որոշ չափով երկաթի ամրություն է ունենալու» (Դանիել 2։41)։

Նշանակություն։ Չնայած իրենց երկրների ներքաղաքական պառակտումներին՝ Միացյալ Նահանգներն ու Բրիտանիան հզոր ռազմական ուժ ունեն։ Դրա շնորհիվ նրանք կարողանում են «երկաթի ամրություն» ունեցող մեծ իշխանություն բանեցնել։

Կատարում

Միացյալ Նահանգներն ու Մեծ Բրիտանիան գլխավորում են ռազմական ծախսերի հարցում առաջատար երկրների ցուցակը. 2023-ին ռազմական ոլորտում նրանք համատեղ ավելի շատ գումար են ծախսել, քան այդ ցուցակի հաջորդ 12 առաջատարները միասին վերցրած (Ստոկհոլմի միջազգային խաղաղության հետազոտական ինստիտուտ)։

«Միացյալ Նահանգներ-Միացյալ Թագավորություն պաշտպանական համագործակցությունը.... զարգանալով դարձել է ամենաամուր, ամենասերտ ու առաջադեմ փոխգործակցությունը, որ երբևէ կարող է լինել երկու երկրների միջև.... Մենք գործում ենք միասին, կռվում ենք միասին և թիկունք ենք կանգնում մեկս մյուսին» (Ռազմավարական հրամանատարություն, Միացյալ Թագավորության պաշտպանության նախարարություն, ապրիլ 2024)։

Մարգարեություն. «Այն, որ ոտքի մատների մի մասը երկաթից էր, մի մասը՝ կավից, նշանակում է, որ թագավորությունը մասամբ հզոր է լինելու, մասամբ՝ դյուրաբեկ» (Դանիել 2։42)։

Նշանակություն։ Չնայած Միացյալ Նահանգների ու Բրիտանիայի ռազմական ուժին՝ նրանց քաղաքական համակարգի ժողովրդավարական գործելակերպը ինչ-որ չափով կապում է նրանց ձեռքերը։ Առանց ճնշող մեծամասնության հավանության այդ կառավարությունները շատ հաճախ չեն կարող իրականացնել իրենց ծրագրերը։

Կատարում

«Ըստ որոշ քաղաքական վերլուծաբանների՝ Ամերիկայի քաղաքական դաշտում առկա պառակտումները խանգարում են, որ այն կարողանա իրագործել իր ծրագրերը համաշխարհային ասպարեզում՝ սկսած անվտանգության հարցերից մինչև առևտրի ոլորտ» (Ուոլ սթրիթ ջորնլ)։

«Աննախադեպ քաղաքական թոհուբոհը խլում է քաղաքական գործիչների ուշադրությունը և խանգարում, որ պետական մարմինները իրականացնեն [Բրիտանիայի] կառավարության օրակարգում դրված բարեփոխումները» («Institute for Government» անկախ վերլուծաբանական կազմակերպություն)։

Մարգարեություն. «Նրանք [թագավորությունը] խառնվելու են մարդկանց [այսինքն՝ հասարակ մարդկանց] հետ, բայց չեն միավորվելու» (Դանիել 2։43, ծանոթագրություն)։

Նշանակություն։ Թեև հասարակ ժողովուրդը կարող է որոշակիորեն ազդել կառավարության գործունեության վրա, սակայն վերջնական արդյունքը լիովին չի գոհացնում ո՛չ քվեարկողներին, ո՛չ էլ պաշտոնյաներին։

Կատարում

«Այսօր քաղաքականության և ընտրված պաշտոնյաների վերաբերյալ ամերիկացիների կարծիքը մշտապես բացասական է» («Փյու» հետազոտական կենտրոն)։

«Կառավարությունների, քաղաքական գործիչների ու նրանց կառավարման համակարգի հանդեպ [Բրիտանիայի] ժողովրդի վստահությունը վերջին հիսուն տարիների ընթացքում երբևիցե այսքան խարխլված չի եղել» (Սոցիալական հետազոտությունների ազգային կենտրոն)։

Դանիելի մարգարեության կատարումը ապագայում

Ըստ Դանիելի մարգարեության՝ Ամերիկա-բրիտանական դաշինքը գերիշխող ուժ է լինելու, երբ Աստծու թագավորությունը քայլեր ձեռնարկի բոլոր մարդկային կառավարությունների դեմ (Դանիել 2։44)։

Նույն ժամանակահատվածին վերաբերող մեկ այլ մարգարեություն գրված է Աստվածաշնչի «Հայտնություն» գրքում։ Այն ցույց է տալիս, որ «ողջ երկրի թագավորները» հավաքվելու են ընդդեմ Եհովաb Աստծու, և սկսվելու է Արմագեդոնը՝ այն պատերազմը, որը տեղի է ունենալու «Ամենակարող Աստծու մեծ օրը» (Հայտնություն 16։14, 16; 19։19-21)։ Այդ պատերազմում Եհովան կոչնչացնի աշխարհի բոլոր կառավարությունները, և այդպիսով կիրականանա աշխարհակալ ուժերը ներկայացնող արձանի կործանման մասին Դանիելի մարգարեությունը։

Ավելին իմանալու համար ընթերցեք «Ի՞նչ է Արմագեդոն պատերազմը» հոդվածը։

Քաղաքական դրության մասին Դանիելի մարգարեությունը ինչո՞վ է օգտակար

Աստվածաշնչում ճշգրտորեն մարգարեացվել էր Միացյալ Նահանգներում և Բրիտանիայում տիրող քաղաքական թոհուբոհի մասին, և այս փաստը կարող է օգնել, որ բոլորովին այլ տեսանկյունից նայեք ընթացիկ իրադարձություններին։

• Աստվածաշնչի հայտնած տեղեկությունները կօգնեն ձեզ հասկանալ, թե ինչու էր Հիսուսն ուզում, որ իր հետևորդները չեզոք մնան ու չխառնվեն այս աշխարհի քաղաքական հարցերին (Հովհաննես 17։16)։ Նաև կհասկանաք, թե ինչու Հիսուսը, որին Աստված նշանակել է իր թագավորության ղեկավար, այսպիսի խոսքեր ասաց. «Իմ թագավորությունը այս աշխարհի մաս չի կազմում» (Հովհաննես 18։36)։

• Կմխիթարվեք ու հույսով կլցվեք՝ իմանալով, որ շատ շուտով Աստծու թագավորությունը մեծ փոփոխություններ է անելու և հիանալի օրհնություններ է բերելու ողջ մարդկությանը, ինչպես որ խոստացել է Աստված (Հայտնություն 21։3, 4)։

• Դուք վստահությամբ կնայեք ապագային, ու կփարատվեն ձեր բոլոր այն մտավախությունները, թե ազգամիջյան բախումները գուցե ի վերջո հանգեցնեն երկրագնդի կործանման (Սաղմոս 37։11, 29)։

Դանիելի մարգարեությունից պարզ է դառնում, որ արձանի ոտնաթաթերով ներկայացված Ամերիկա-բրիտանական դաշինքը մարդկության վրա իշխանություն բանեցնող վերջին մարդակերտ աշխարհակալ ուժն է լինելու։ Դրան հաջորդելու է Աստծու թագավորությունը՝ կատարյալ մի կառավարություն, որն իշխելու է երկնքից։

Իմանալու համար, թե Աստծու թագավորությունը ուրիշ ինչեր է անելու մարդկության համար, դիտեք «Ի՞նչ է Աստծու Թագավորությունը» տեսանյութը։