Աստծու Թագավորությունը շուտով ազատագրելու է մեզ
«Թող գա՛ քո թագավորությունը։ Թող կատարվի՛ քո կամքը ինչպես երկնքում, այնպես էլ երկրի վրա» (ՄԱՏԹ. 6։10)։
1. Գլխավորապես ինչի՞ մասին էր սովորեցնում Հիսուսը։
ԼԵՌԱՆ քարոզում Հիսուս Քրիստոսը իր հետևորդներին սովորեցրեց, որ Աստծուն աղոթեն. «Թող գա՛ քո թագավորությունը։ Թող կատարվի՛ քո կամքը ինչպես երկնքում, այնպես էլ երկրի վրա» (Մատթ. 6։9–13)։ Թագավորությունը Հիսուսի քարոզչության գլխավոր թեման էր։ Նա գնում էր «քաղաքից քաղաք և գյուղից գյուղ՝ քարոզելով ու հռչակելով Աստծու թագավորության բարի լուրը» (Ղուկ. 8։1)։ Քրիստոսը իր աշակերտներին հորդորեց. «Շարունակեք նախ թագավորությունը և Նրա արդարությունը փնտրել» (Մատթ. 6։33)։ Այս հոդվածն ուսումնասիրելիս խորհիր, թե ինչպես կարող ես սովորածդ կիրառել ծառայության մեջ։ Քննիր հետևյալ հարցերը. որքա՞ն կարևոր է Թագավորության մասին լուրը, ինչի՞ց պետք է մարդիկ ազատագրվեն, և ինչպե՞ս Աստծու Թագավորությունը ազատագրում կբերի։
2. Որքա՞ն կարևոր է Թագավորության մասին լուրը։
2 Հիսուսը կանխագուշակեց. «Թագավորության այս բարի լուրը կքարոզվի ամբողջ բնակեցված երկրով մեկ՝ բոլոր ազգերին վկայություն լինելու համար, և այդ ժամանակ կգա վերջը» (Մատթ. 24։14)։ Աստծու Թագավորության մասին բարի լուրը քարոզելը ամենահրատապ գործն է։ Բարի լուրը, անկասկած, ամենակարևոր բանն է, որ մարդիկ պետք է իմանան։ Այսօր ամբողջ աշխարհում մոտ յոթ միլիոն Եհովայի վկաներ, որոնք ծառայում են ավելի քան 100 000 ժողովներում, զբաղված են այդ եզակի գործով. նրանք մարդկանց տեղեկացնում են, որ Աստծու Թագավորությունը հաստատվել է։ Թագավորության հաստատումն իսկապես բարի լուր է, քանի որ դա նշանակում է, որ Աստված երկնքում ստեղծել է մի կառավարություն, որը լիակատար իշխանություն է ունենալու երկրի վրա։ Թագավորության ներքո Եհովայի կամքը երկրի վրա կատարվելու է այնպես, ինչպես որ երկնքում։
3, 4. Ի՞նչ վիճակում կլինի մարդկությունը, երբ Աստծու կամքը կատարվի երկրի վրա։
3 Ի՞նչ վիճակում կլինի մարդկությունը, երբ Աստծու կամքը կատարվի երկրի վրա։ Եհովան «կսրբի ամեն արտասուք նրանց աչքերից, և մահ այլևս չի լինի, ո՛չ սուգ, ո՛չ աղաղակ և ո՛չ ցավ այլևս չեն լինի» (Հայտն. 21։4)։ Մարդիկ չեն հիվանդանա կամ մահանա ժառանգած մեղքի կամ անկատարության պատճառով։ Աստծու հիշողության մեջ գտնվող մահացածները հարություն կառնեն և հնարավորություն կունենան ապրելու հավիտյան։ Աստվածաշունչը խոստանում է. «Թե՛ արդարների և թե՛ անարդարների հարություն պիտի լինի» (Գործ. 24։15)։ Այլևս չեն լինի պատերազմ, հիվանդություն և սով։ Երկիրը կդառնա դրախտ։ Նույնիսկ կենդանիները, որոնք հիմա վտանգավոր են, խաղաղ կլինեն ինչպես մարդկանց, այնպես էլ իրար հետ (Սաղ. 46։9; 72։16; Ես. 11։6–9; 33։24; Ղուկ. 23։43)։
4 Քանի որ Թագավորության ներքո նման սքանչելի օրհնություններ են լինելու, զարմանալի չէ, որ Աստվածաշունչը այդ ժամանակների մասին ասում է. «Խոնարհները երկիրը կ’ժառանգեն եւ կ’ուրախանան խաղաղութեան առատութիւնովը»։ Իսկ ի՞նչ է սպասում չարերին։ Աստվածաշունչը կանխագուշակում է. «Չարերը կ’սատկեն»։ Բայց «Տիրոջն սպասողները երկիրը կ’ժառանգեն» (Սաղ. 37։9–11)։
5. Իրերի ներկա համակարգին ի՞նչ է սպասում։
5 Որպեսզի այս բոլոր բաները իրականություն դառնան, ներկա համակարգը՝ իր բոլոր հակամարտող կառավարություններով, կրոններով և առևտրական ցանցով, պետք է վերանա։ Երկնային կառավարությունը հենց դա կանի։ Աստծու ներշնչանքով Դանիելը մարգարեացավ. «Այն թագաւորների օրերումը [որոնք գոյություն ունեն այժմ] երկնքի Աստուածը մէկ թագաւորութիւն է [երկնքում] վեր կացնելու, որ յաւիտեանս չի աւերուիլ, եւ նորա տէրութիւնը ուրիշ ազգի չի տրուիլ. նա պիտի փշրէ եւ վերջացնէ այս բոլոր թագաւորութիւնները [որ կան ներկայումս]. իսկ նա ինքը կ’մնայ յաւիտեանս» (Դան. 2։44)։ Աստծու Թագավորությունը նոր՝ երկնային կառավարություն է, որը կղեկավարի նոր երկրային հասարակությունը։ Կլինեն «նոր երկինք ու նոր երկիր.... և նրանցում արդարություն պիտի բնակվի» (2 Պետ. 3։13)։
Այժմ ավելի շատ ենք զգում ազատագրվելու կարիքը
6. Ինչպե՞ս է Աստվածաշունչը նկարագրում այս ամբարիշտ աշխարհի չարությունը։
6 Մարդկային ընտանիքի աղետալի պատմությունը սկսվեց այն ժամանակ, երբ Սատանան, Ադամը, Եվան ըմբոստացան Աստծու դեմ՝ ցանկանալով ինքնուրույն որոշել, թե ինչն է ճիշտ, և ինչն է սխալ։ Ավելի քան 1 600 տարի անց՝ մինչ համաշխարհային Ջրհեղեղը, «շատացել էր մարդկանց չարութիւնը երկրի վերայ, եւ նորանց սրտի խորհուրդների բոլոր գաղափարները չար էին ամեն օր» (Ծննդ. 6։5)։ Դրանից 1 300 տարի հետո մարդկային հասարակության մեջ իրերի դրությունն այնքան վատ էր, որ Սողոմոնը գրեց. «Ես գովեցի այն մեռածներին, որ արդէն մեռել էին, աւելի քան թէ այն ապրողներին որ հիմա դեռ ապրում են։ Բայց այն երկուսից էլ լաւագոյն է նա որ չէ եղել, որ չէ տեսել արեգակի տակին գործուող չարութիւնը» (Ժող. 4։2, 3)։ Այս խոսքերից մինչև մեր օրերը անցել է 3 000 տարի, բայց չարությունը շարունակում է «բարգավաճել»։
7. Ինչո՞ւ հիմա մարդկությունը ավելի մեծ կարիք ունի չարությունից ազատագրվելու։
7 Ճիշտ է, չարությունը գոյություն է ունեցել երկար ժամանակ, բայց հիմա մարդկությունը շատ ավելի մեծ կարիք ունի, որ այն երկրի վրայից վերանա։ Անցած 100 տարիներին պայմանները ավելի վատ են եղել, քան երբևէ, և դրանք շարունակում են վատանալ։ Օրինակ, ինչպես ասվում է մի գիտական տեղեկագրության մեջ՝ «[20–րդ] դարի պատերազմներում երեք անգամ ավելի շատ մարդ է զոհվել, քան մ.թ. առաջին դարից մինչև 1899 թ.–ը տեղի ունեցած բոլոր պատերազմների ժամանակ» («Worldwatch Institute»)։ 1914 թ.–ից հետո պատերազմներում զոհվել է ավելի քան 100 միլիոն մարդ։ Ըստ մի հանրագիտարանի՝ Երկրորդ համաշխարհային պատերազմում մահացել է գրեթե 60 միլիոն մարդ։ Մի քանի երկրներ այսօր ունեն միջուկային զենք, և եթե դրանք օգտագործվեն, ապա կյանքից կարող են զրկվել միլիոնավոր մարդիկ։ Եվ չնայած գիտության և բժշկության նվաճումներին՝ ամեն տարի սովից մահանում է մոտ 5 միլիոն երեխա (տե՛ս «Ի՞նչ է սովորեցնում Աստվածաշունչը իրականում» գրքի 9–րդ գլուխը)։
8. Ի՞նչ են փաստել մարդկային կառավարման հազարավոր տարիները։
8 Չարությունը վերացնելու համար մարդկանց գործադրած ջանքերը ձախողվել են։ Այս աշխարհի քաղաքական, կրոնական և առևտրական կազմակերպությունները երբեք չեն բավարարել մարդու հիմնական կարիքները, այն է՝ խաղաղ ապրել, բարեկեցիկ կյանք ունենալ և առողջ լինել։ Մարդկության խնդիրները լուծելու փոխարեն՝ այդ կազմակերպությունները դրանք ավելի են շատացրել։ Անկասկած, մարդկային կառավարման հազարավոր տարիները փաստել են հետևյալ խոսքերի ճշմարտացիությունը. «Մարդինը չէ իր ճանապարհը, գնացող մարդի բանը չէ, որ ուղղէ իր գնացքը» (Երեմ. 10։23)։ Այո՛, «մարդ մարդի վերայ իշխում է իր վնասի համար» (Ժող. 8։9)։ «Բոլոր ստեղծվածները միասին շարունակ հառաչում են և միասին ցավի մեջ են» (Հռոմ. 8։22)։
9. Ի՞նչ պայմաններ են տիրում «վերջին օրերում»։
9 Մեր ժամանակների վերաբերյալ Աստվածաշունչը կանխագուշակել է. «Վերջին օրերում չափազանց դժվար ժամանակներ են լինելու»։ Այդ օրերում տիրող պայմանները նկարագրելուց հետո մարգարեության մեջ այնուհետև ասվում է. «Չար և խաբեբա մարդիկ ավելի ու ավելի առաջ կգնան չարության մեջ» (կարդա՛ 2 Տիմոթեոս 3։1–5, 13)։ Քրիստոնյաների համար դա անսպասելի չէ, որովհետև նրանք գիտեն, որ «ամբողջ աշխարհը Չարի [այսինքն՝ Սատանայի] իշխանության տակ է» (1 Հովհ. 5։19)։ Սակայն կա նաև բարի լուր. Աստված շուտով կազատագրի բոլոր նրանց, ովքեր սիրում են իրեն։ Նրանք կազատվեն այս աշխարհից, որի վիճակը արագորեն վատանում է։
Միայն Եհովան կարող է մեզ ազատագրել
10. Ինչո՞ւ միայն Եհովան կարող է ազատագրում բերել։
10 Բարի լուրը քարոզելիս ընդգծիր, որ միայն Եհովան կարող է ազատագրում բերել։ Միայն նա ունի ուժ և ցանկություն՝ իր ծառաներին ազատելու ցանկացած վատ իրավիճակից (Գործ. 4։24, 31; Հայտն. 4։11)։ Մենք կարող ենք վստահ լինել, որ Եհովան կազատագրի իր ժողովրդին և կիրագործի իր նպատակները, որովհետև նա երդվել է. «Անշուշտ ինչպէս որ խորհել եմ՝ այնպէս կ’լինի»։ Աստծու խոսքը «պիտի պարապ ետ չ’դառնայ [նրա] մօտ» (կարդա՛ Եսայիա 14։24, 25; 55։10, 11)։
11, 12. Ի՞նչ հավաստիացում է Եհովան տալիս իր ծառաներին։
11 Եհովան հավաստիացնում է, որ երբ դատաստան տեսնի չարերի հետ, կազատագրի իր ծառաներին։ Երբ Աստված Երեմիային ուղարկեց քարոզելու մեղավորներին, ասաց. «Մի՛ վախենար»։ Իսկ ինչո՞ւ Երեմիան չպիտի վախենար։ «Ես քեզ հետ եմ որ քեզ ազատեմ»,— վստահեցրեց Եհովան (Երեմ. 1։8)։ Իսկ երբ Աստված պետք է կործաներ ամբարիշտ Սոդոմն ու Գոմորը, նա երկու հրեշտակների միջոցով Ղովտին և նրա ընտանիքին ապահով դուրս բերեց վտանգավոր տարածքից։ «Եւ Եհովան Սոդոմի եւ Գոմորի վերայ ծծումբ եւ կրակ տեղաց» (Ծննդ. 19։15, 24, 25)։
12 Նույնիսկ եթե ինչ–որ բան պատահի ամբողջ աշխարհում, միևնույն է, Եհովան կարող է փրկել իր կամքը կատարողներին։ Հին չար աշխարհը Ջրհեղեղով կործանելիս նա «Նոյին՝ արդարության քարոզչին, ուրիշ յոթի հետ պահպանեց» (2 Պետ. 2։5)։ Եհովան կփրկի ուղղամիտներին, երբ կործանի ներկա ամբարիշտ աշխարհը։ Այդ իսկ պատճառով նրա Խոսքն ասում է. «Խնդրեցէք [«Փնտռեցէ՛ք», ԱԱ] Տիրոջը, ով երկրի բոլոր խոնարհներ.... Որոնեցէք արդարութիւն, որոնեցէք խոնարհութիւն, գուցէ ծածկուած պահուիք Տիրոջ բարկութեան օրը» (Սոփ. 2։3)։ Այդ համաշխարհային կործանումից հետո «ուղիղները կ’բնակուեն երկրի վերայ.... իսկ անզգամները բնաջինջ կ’լինին.... նորանից» (Առակ. 2։21, 22)։
13. Ինչպե՞ս են ազատագրվելու Եհովայի մահացած ծառաները։
13 Սակայն Աստծու ծառաներից շատերը արդեն մահացել են հիվանդության, հալածանքի կամ այլ պատճառներով (Մատթ. 24։9)։ Այդ դեպքում ինչպե՞ս են նրանք ազատագրվելու։ Վերևում նշվեց, որ «արդարների.... հարություն պիտի լինի» (Գործ. 24։15)։ Որքա՜ն ենք մխիթարվում՝ իմանալով, որ Եհովային ոչինչ չի կարող խանգարել իր ծառաներին փրկելու։
Արդար կառավարություն
14. Ինչո՞ւ ենք վստահ, որ Աստծու Թագավորությունը արդար կառավարություն է։
14 Ծառայության ընթացքում կարող ես մարդկանց բացատրել, որ Եհովայի երկնային Թագավորությունը արդար կառավարություն է։ Սա միանգամայն համապատասխանում է իրականությանը, որովհետև այդ Թագավորությունը արտացոլում է Եհովայի չքնաղ հատկությունները, ինչպիսիք են, օրինակ, արդարությունն ու սերը (Բ Օրին. 32։4; 1 Հովհ. 4։8)։ Աստված Թագավորությունը տվել է Հիսուս Քրիստոսին, որը կարող է լավագույն ձևով ղեկավարել երկիրը։ Եհովան նաև նպատակադրել է երկրի վրա եղող քրիստոնյաներից 144 000 հոգու օծել իր սուրբ ոգով և նրանց հարություն տալ երկնային կյանքի։ Նրանք կլինեն Քրիստոսի իշխանակիցները և նրա հետ կղեկավարեն երկիրը (Հայտն. 14։1–5)։
15. Ի՞նչ տարբերություն կա Աստծու Թագավորության և մարդկային իշխանության միջև։
15 Հիսուսի և 144 000–ի իշխանությունը անհնար է համեմատել ներկայիս անկատար մարդկային կառավարման հետ։ Իրերի այս համակարգի ղեկավարները միշտ էլ աչքի են ընկել դաժանությամբ, իրենց հպատակներին առաջնորդել են պատերազմների, և այս ամենի արդյունքում միլիոնավոր մարդիկ են զոհվել։ Զարմանալի չէ, որ Գրությունները խորհուրդ են տալիս «չհուսալ», այսինքն՝ չապավինել մարդկանց, որոնց «մօտ փրկութիւն չ’կայ» (Սաղ. 146։3)։ Բայց Քրիստոսի իշխանությունը բոլորովին այլ կերպ կլինի։ «Ինձ մո՛տ եկեք բոլորդ, որ հոգնած եք ու բեռնավորված,— ասաց Հիսուսը,— և ես կթարմացնեմ ձեզ։ Իմ լուծը ձեզ վրա վերցրեք և ինձանից սովորեք, քանզի ես հեզ եմ և սրտով խոնարհ, և դուք թարմություն կգտնեք ձեր հոգիների համար։ Որովհետև իմ լուծը հարմար է, և իմ բեռը՝ թեթև» (Մատթ. 11։28–30)։
Վերջին օրերը շուտով կավարտվեն
16. Ի՞նչ վախճան կունենան այս վերջին օրերը։
16 Այս աշխարհը, 1914 թ.–ից սկսած, գտնվում է իր վերջին օրերում, այսինքն՝ «իրերի համակարգի վախճանի» մեջ (Մատթ. 24։3)։ Շուտով տեղի կունենա այն, ինչ Հիսուսը անվանեց «մեծ նեղություն» (կարդա՛ Մատթեոս 24։21)։ Նմանը չունեցող այդ նեղությունը վերջ կդնի Սատանայի աշխարհին։ Սակայն ինչպե՞ս է այն սկսվելու և ավարտվելու։
17. Ի՞նչ է ասում Աստվածաշունչը մեծ նեղության սկսվելու մասին։
17 Մեծ նեղությունը սկսվելու է անսպասելիորեն։ Այո՛, «Եհովայի օրը» կգա հանկարծակի, «երբ որ ասեն՝ «խաղաղությո՛ւն և անվտանգությո՛ւն» (կարդա՛ 1 Թեսաղոնիկեցիներ 5։2, 3)։ Երբ ազգերը կարծեն, որ արդեն մոտ են մի քանի մեծ խնդիրների լուծմանը, կսկսվի կանխագուշակված նեղությունը։ «Մեծ Բաբելոնի»՝ համաշխարհային կեղծ կրոնի անսպասելի կործանումը կզարմացնի ամբողջ աշխարհին։ Թագավորները և մյուս մարդիկ կապշեն, երբ տեսնեն, թե ինչպես է կատարվում Մեծ Բաբելոնի դատաստանը (Հայտն. 17։1–6, 18; 18։9, 10, 15, 16, 19)։
18. Ինչպե՞ս Եհովան կարձագանքի, երբ Սատանան հարձակվի իր ծառաների վրա։
18 Վճռական պահին «նշաններ պիտի լինեն արևի, լուսնի ու աստղերի վրա», և «մարդու Որդու նշանը կերևա երկնքում»։ Այդ ժամանակ մենք կկարողանանք «ուղիղ կանգնել, որովհետև մեր ազատագրումը մոտենում է» (Ղուկ. 21։25–28; Մատթ. 24։29, 30)։ Սատանան, կամ՝ Գոգը, իր ուժերը կկենտրոնացնի Աստծու ժողովրդի դեմ։ Բայց Եհովան նրանց մասին, ովքեր հալածում են իր հավատարիմ ծառաներին, ասում է. «Ձեզ դպչողը նորա [«իմ», ՆԱ] աչքերի բիբին է դպչում» (Զաք. 2։8)։ Սատանայի հարձակումը հաջողություն չի ունենա։ Ինչո՞ւ։ Որովհետև Գերիշխան Տեր Եհովան կգործի արագորեն և կազատագրի իր ծառաներին (Եզեկ. 38։9, 18)։
19. Ինչո՞ւ կարող ենք վստահ լինել, որ Եհովայի պատժիչ ուժերը կվերացնեն Սատանայի համակարգը։
19 Երբ Աստված ազգերի դեմ դուրս գա, այդ ժամանակ նրանք «կիմանան, որ նա է Եհովան» (Եզեկ. 36։23)։ Նա կուղարկի իր պատժիչ ուժերին՝ անհամար ոգեղեն էակներին, որոնց կղեկավարի Հիսուս Քրիստոսը, որպեսզի նրանք Սատանայի համակարգի մնացած մասը ջնջեն երկրի երեսից (Հայտն. 19։11–19)։ Մենք գիտենք, թե ինչպես ընդամենը մեկ հրեշտակ մի գիշերվա մեջ «զարկեց [թշնամու բանակի] հարիւր ութսունեւհինգ հազար» զինվորի։ Ուստի կարող ենք լիովին համոզված լինել, որ երկնային բանակը երկրի վրայից հեշտությամբ կվերացնի Սատանայի համակարգի ամեն մի նշույլ, երբ մեծ նեղությունը իր գագաթնակետին հասնի Արմագեդոնի ժամանակ (Դ Թագ. 19։35; Հայտն. 16։14, 16)։ Սատանան և իր դևերը հազար տարով կգցվեն անդունդը, իսկ հետո վերջնականապես կկործանվեն (Հայտն. 20։1–3)։
20. Ի՞նչ կիրագործի Եհովան Թագավորության միջոցով։
20 Այսպիսով՝ երկինքն ու երկիրը մաքրված կլինեն չարությունից, և արդարները հավիտյան կապրեն երկրագնդի վրա։ Եհովան փաստած կլինի, որ ինքը իրոք Մեծ Ազատարար է (Սաղ. 145։20)։ Թագավորության միջոցով նա կարդարացնի իր գերիշխանությունը, կսրբացնի իր սուրբ անունը և կիրագործի երկրի առնչությամբ ունեցած իր մեծ նպատակը։ Շարունակիր ուրախություն ստանալ ծառայությունից՝ քարոզելով բարի լուրը և օգնելով «հավիտենական կյանքի հանդեպ ճիշտ տրամադրված» մարդկանց գիտակցելու, որ Աստծու Թագավորությունը շուտով ազատագրելու է մեզ (Գործ. 13։48)։
Հիշո՞ւմ եք
• Ինչպե՞ս Հիսուսն ընդգծեց Թագավորության կարևորությունը։
• Ինչո՞ւ հիմա ավելի մեծ կարիք կա ազատագրվելու։
• Ի՞նչ դեպքեր տեղի կունենան մեծ նեղության ժամանակ։
• Ինչպե՞ս է Եհովան փաստում, որ Մեծ Ազատարար է։
[նկարներ 12–րդ, 13–րդ էջերի վրա]
Համաձայն Աստվածաշնչի՝ մեր օրերում ամբողջ աշխարհում կատարվում է մի եզակի քարոզչական աշխատանք
[նկար 15–րդ էջի վրա]
Եհովան ազատագրեց Նոյին ու նրա ընտանիքին։ Նա կարող է մեզ էլ ազատագրել
[նկար 16–րդ էջի վրա]
Եհովան «կսրբի ամեն արտասուք.... և մահ այլևս չի լինի» (Հայտն. 21։4)