Դուք կարող եք հաղթահարել դժվարությունները
ԱՅՍ ծանր ժամանակներում շատերը բախվում են մեծ դժվարությունների, որոնք կարելի է նմանեցնել փոթորիկների։ Սակայն քրիստոնյաների պարագայում Աստծու հանդեպ սերը և նրա սկզբունքներին հավատարիմ մնալը օգնում են նրանց հաղթահարել այդ դժվարությունները։ Ինչպե՞ս։ Այս հարցի պատասխանը կարող ենք գտնել Հիսուս Քրիստոսի առակներից մեկում։ Նա իր հնազանդ աշակերտներին համեմատեց «մի իմաստուն մարդի [հետ] որ իր տունը շինեց ժայռի վերայ»։ Նա ասաց. «Անձրեւն էլ եկաւ, գետերն էլ վարարեցին, քամիներն էլ փչեցին եւ այն տանը զարկեցին, եւ նա չ’կործանուեցաւ. որովհետեւ ժայռի վերայ հաստատուած էր» (Մատթէոս 7։24, 25)։
Նկատեք, որ թեև այդ մարդն իմաստուն էր, այնուամենայնիվ, դժվարությունների էր բախվում, որոնք առակում ներկայացվում են անձրևներով, գետերի վարարումով և կործանիչ քամիներով։ Հետևաբար, Հիսուսը չասաց, թե իր աշակերտները պաշտպանված կլինեն ամեն տեսակ դժվարություններից և հանգիստ ու խաղաղ կյանք կվայելեն (Սաղմոս 34։19; Յակոբոս 4։13–15)։ Նա ասաց, որ Աստծու հավատարիմ ծառաները կարող են պատրաստվել այդպիսի ծանր դժվարությունների ու նեղությունների և հաղթահարել դրանք։
Հիսուսը սկսեց իր առակն՝ ասելով. «Ամեն ով որ իմ այս խօսքերը լսում է եւ նորանց կատարում, կ’նմանեցնեմ նորան մի իմաստուն մարդի որ իր տունը շինեց ժայռի վերայ»։ Անշուշտ, Հիսուսը չէր խոսում բառացի տուն կառուցելու մասին. նա նկատի ուներ քրիստոնեական հատկություններ զարգացնելն ու աստվածահաճո գործեր անելը։ Նրանք, ովքեր հետևում են Քրիստոսի խոսքերին, խորաթափանցություն և ճիշտ դատողություն են դրսևորում։ Սովորածը կյանքում կիրառելով՝ նրանք հիմնում են իրենց մղումներն ու գործերը Քրիստոսի ուսուցումների վրա, որոնք ներկայացվում են որպես ամուր ժայռ։ Այս փոխաբերական ժայռը մեծ քարեղեն զանգված է, և այն խորությամբ փորելու համար ջանքեր են անհրաժեշտ (Ղուկաս 6։48)։ Հիսուսի աշակերտները ջանում են զարգացնել այնպիսի հատկություններ, որոնք օգնում են իրենց տոկալ, ինչպես նաև մոտենալ Աստծուն (Մատթէոս 5։5–7; 6։33)։
Ի՞նչ է տեղի ունենում, երբ ծանր դժվարությունների միջոցով փորձվում է Հիսուսի հետևորդների կառուցած հիմքի ամրությունը։ Քրիստոսի ուսուցումներին հնազանդվելու վճռականությունը և աստվածահաճո հատկությունները, որ նրանք զարգացրել են, դառնում են զորության անսպառ աղբյուր, երբ նրանք դժվարությունների են բախվում։ Դրանք զորության աղբյուր կլինեն նաև մոտալուտ Արմագեդոնի ժամանակ (Մատթէոս 5։10–12; Յայտնութիւն 16։15, 16)։ Այո՛, հետևելով Քրիստոսի ուսուցումներին՝ շատերն են հաջողությամբ հաղթահարում ծանր փորձությունները։ Դուք նույնպես կարող եք հաղթահարել դրանք (Ա Պետրոս 2։21–23)։