Ի՞նչը կարող է օգնել ձեզ հասկանալ Աստվածաշունչը
«ԻՄԱՍՏՈՒՆՆԵՐԻՑ եւ գիտուններից այս բաները ծածկեցիր եւ մանուկների յայտնեցիր» (Ղուկաս 10։21)։ Այս խոսքերը, որոնք Հիսուսն իր երկնային Հորն ուղղեց, ցույց են տալիս, որ Աստվածաշունչը հասկանալու համար պետք է ճիշտ տրամադրվածություն ունենալ։ Եհովայի իմաստությունը ի հայտ է գալիս այն բանում, որ նա մի գիրք է տվել, որը միայն խոնարհ և սովորելու պատրաստ մարդիկ կարող են իսկապես հասկանալ։
Սակայն խոնարհություն դրսևորելը այնքան էլ հեշտ բան չէ։ Մենք բոլորս հակում ունենք հպարտ լինելու։ Բացի այդ, մենք ապրում ենք վերջին օրերում և մարդիկ «ինքնասէր.... ամբարտաւան, հպարտ» են (Բ Տիմոթէոս 3։1–4)։ Նման հատկությունների պատճառով դժվարանում ենք Աստծու Խոսքը հասկանալ։ Ցավոք, բոլորս էլ որոշ չափով գտնվում ենք մեզ շրջապատող հպարտ մարդկանց ազդեցության տակ։ Հետևաբար ինչպե՞ս կարող ենք ճիշտ տրամադրվածություն ձեռք բերել Աստվածաշունչը հասկանալու համար։
Պատրաստենք մեր սիրտն ու միտքը
Աստծու ժողովրդի վաղեմի առաջնորդ Եզրասը «պատրաստել էր իր սիրտը որ Տիրոջ օրէնքը խնդրէ» (Եզրաս 7։10)։ Ինչպե՞ս կարող ենք մեր սիրտը պատրաստել։ Նախ՝ կարող ենք ճիշտ տեսակետ դրսևորել Աստվածաշնչի հանդեպ։ Պողոս առաքյալը քրիստոնյա հավատակիցներին գրեց. «Աստուծոյ քարոզութեան խօսքը մեզանից առած ընդունեցիք, ոչ թէ իբր մարդկանց խօսք, այլ ինչպէս որ ճշմարիտ է՝ Աստուծոյ խօսք» (Ա Թեսաղոնիկեցիս 2։13)։ Թեև մարդիկ են գրի առել Աստվածաշունչը, սակայն այն, ինչ նրանք գրել են, Եհովա Աստծուց է։ Այդ կարևոր փաստի գիտակցումը կօգնի Աստվածաշունչն ընթերցելիս մեր սիրտը ընկալունակ դարձնել (Բ Տիմոթէոս 3։16)։
Երկրորդ՝ մեր սիրտը պատրաստելու համար պետք է աղոթենք։ Աստվածաշունչը սուրբ ոգուց ներշնչված է գրվել, ուստի նրա պատգամը կարող ենք հասկանալ նույն սուրբ ոգու օգնությամբ։ Դրա համար մենք պետք է աղոթենք։ Ուշադրություն դարձրեք, թե ինչի մասին աղոթեց սաղմոսերգուն. «Իմաստուն արա ինձ, որ քո օրէնքը պահեմ եւ նորան կատարեմ բոլոր սրտով» (Սաղմոս 119։34)։ Գրվածը հասկանալու համար պետք է աղոթենք ոչ միայն մտային կարողությունների, այլև սրտի ճիշտ տրամադրվածության մասին, որը կօգնի մեզ ընդունել Աստծու ճշմարիտ Խոսքը։
Մինչ խորհում եք ճիշտ տրամադրվածություն ունենալու մասին, նկատի ունեցեք, թե Աստվածաշնչի ուսումնասիրությունը ինչ օգուտներ կարող է բերել ձեզ։ Մենք հիմնավոր պատճառներ ունենք Աստծու Խոսքն ընթերցելու համար, սակայն գլխավոր պատճառն այն է, որ Աստվածաշնչի ընթերցանության շնորհիվ մոտենում ենք Աստծուն (Յակոբոս 4։8)։ Երբ իմանում ենք, թե Եհովան ինչպես է արձագանքում տարբեր իրավիճակներում, ինչպես է գնահատում նրանց, ովքեր սիրում են իրեն, և ինչպես է վերաբերվում նրանց, ովքեր լքում են իրեն, մենք հասկանում ենք, թե ինչպիսի անձնավորություն է նա։ Աստվածաշունչը ընթերցելիս մեր մղումը պետք է լինի Աստծուն ավելի լավ ճանաչելը և այդպիսով նրա հետ մեր փոխհարաբերությունները ամրացնելը։
Դժվարություններ ճիշտ տրամադրվածություն ունենալու հարցում
Ի՞նչը կարող է խանգարել մեզ հասկանալու Աստծու Խոսքը։ Պատճառներից մեկը հնարավոր է լինի այն, որ ընդունենք նրանց համոզմունքները, ում կարծիքը բարձր ենք գնահատում։ Սակայն ինչպե՞ս վարվել, եթե այդ անհատները չեն գնահատում Աստծու Խոսքի ճշմարտությունը։ Նման դեպքում կարող է դժվար լինել հասկանալ, թե ինչ է իրականում սովորեցնում Աստվածաշունչը։ Հետևաբար Աստվածաշունչը քաջալերում է ուշադրությամբ քննել այն, ինչ սովորում ենք (Ա Թեսաղոնիկեցիս 5։21)։
Հիսուսի մայրը՝ Մարիամը, նույնպես այսպիսի դժվարության հանդիպեց։ Նա դաստիարակվել էր հրեական ավանդության համաձայն, հավատարմորեն պահել Մովսիսական օրենքը և անկասկած հաճախել ժողովարան։ Սակայն երբ հասկացավ, որ այն երկրպագության ձևը, որն իր ծնողները սովորեցրել էին իրեն, այլևս հաճելի չէ Աստծուն, ընդունեց Հիսուսի ուսուցումները և դարձավ քրիստոնեական ժողովի առաջին անդամներից մեկը (Գործք 1։13, 14)։ Դրանով նա իր ծնողներին կամ նրանց ավանդույթները չանարգեց, ընդհակառակը՝ արտահայտեց իր սերը Աստծու հանդեպ։ Աստվածաշնչից օգուտներ քաղելու համար Մարիամի նման՝ մենք պետք է առաջին հերթին Աստծու հանդեպ նվիրվածություն դրսևորենք։
Ցավոք, շատերը չեն գնահատում աստվածաշնչյան ճշմարտությունը։ Ոմանք բավարարվում են՝ միայն հետևելով կրոնական ավանդություններին, որոնք հիմնված են կեղծիքի վրա։ Մյուսները անարգում են ճշմարտությունը իրենց խոսքով և ապրելակերպով։ Աստվածաշնչյան ճշմարտությունն ընդունելը զոհողություններ է պահանջում։ Հնարավոր է՝ տարաձայնություններ ունենաք ձեր ընկերների, հարևանների, գործընկերների և նույնիսկ ընտանիքի անդամների հետ (Յովհաննէս 17։14)։ Սողոմոն իմաստունը գրել է. «Ճշմարտութիւնը ծախու ա՛ռ ու զանիկա մի՛ ծախեր» (Առակաց 23։23, ԱԱ)։ Եթե դուք բարձր գնահատեք ճշմարտությունը, Եհովան կօգնի ձեզ հասկանալ Աստվածաշունչը։
Հաջորդ պատճառը, որ խանգարում է հասկանալ Աստվածաշունչը, այն է, որ անհատը չի ցանկանում կիրառել Աստծու Խոսքում գրվածը։ Հիսուսն ասաց իր աշակերտներին. «Ձեզ տրուած է երկնքի արքայութեան խորհուրդները գիտենալ, բայց նորանց չէ տրուած։ Որովհետեւ թանձրացաւ այս ժողովրդի սիրտը, եւ իրանց ականջներովը ծանր լսեցին» (Մատթէոս 13։11, 15)։ Շատերը, ում քարոզեց Հիսուսը, անտարբեր էին և չցանկացան փոխվել։ Որքա՜ն է այդ մարդկանցից տարբերվում Հիսուսի առակում նշված վաճառականը։ Թանկարժեք մարգարիտ գտնելով՝ նա արագ վաճառեց իր ողջ ունեցվածքը այն գնելու համար։ Աստվածաշնչյան ճշմարտությունը նույն արժեքը պետք է ունենա նաև մեզ համար (Մատթէոս 13։45, 46)։
Դժվարություն սովորելու հարցում
Աստվածաշունչը հասկանալու գլխավոր դժվարությունն այն է, որ պետք է պատրաստ լինել սովորելու։ Անհատի համար կարող է դժվար լինել ընդունել նոր գաղափարներ իրենից դիրքով ցածր անհատից։ Հիսուս Քրիստոսի առաքյալները «առանց ուսմունքի եւ տգէտ [«հասարակ», ՆԱ] մարդիկ» էին (Գործք 4։13)։ Բացատրելով այս իրողությունը՝ Պողոսը գրեց. «Ձեր կոչումին մտիկ արէք, եղբայրներ, որ ոչ թէ շատ իմաստուններ մարմնի կողմանէ, եւ ոչ թէ շատ զօրաւորներ, եւ ոչ թէ շատ ազնուականներ. այլ այս աշխարհքի յիմարներին Աստուած ընտրեց՝ որ ամաչեցնէ իմաստուններին» (Ա Կորնթացիս 1։26, 27)։ Եթե դժվար է խոնարհություն դրսևորել, երբ ձեզ սովորեցնում է դիրքով ցածր անհատը, ապա հիշեք, որ նա միայն միջոց է, որը Աստված գործածում է ձեզ սովորեցնելու համար։ Ուրիշ ավելի մեծ պատիվ կարո՞ղ է լինել, քան ուսված լինել Եհովայից՝ մեր «Մեծ Խրատողից» (Եսայիա 30։20, ՆԱ; 54։13)։
Ասորական բանակի զորավար Նեեմանը դժվարացավ ընդունել իրենից դիրքով ցածր մարդու հրահանգները։ Բորոտությունից բուժվելու համար նա եկել էր Եհովայի մարգարե Եղիսեի մոտ։ Սակայն բուժվելու վերաբերյալ ցուցումները Նեեմանին տրվեցին մարգարեի ծառայի միջոցով։ Այն, թե ինչպես և ինչ ասաց ծառան, խանգարեց Նեեմանին խոնարհությամբ հնազանդվել տրված հրահանգներին, ուստի սկզբում նա հրաժարվեց լսել Աստծու մարգարեին։ Ավելի ուշ Նեեմանը փոխեց իր վերաբերմունքը և բուժվեց (Դ Թագաւորաց 5։9–14)։ Աստվածաշունչ ուսումնասիրելիս նմանատիպ դժվարության ենք բախվում։ Մենք իմանում ենք, որ հոգևորապես և բարոյապես բուժվելու համար անհրաժեշտ է նոր ապրելակերպ ունենալ։ Կլինե՞նք այնքան խոնարհ, որ թույլ տանք ինչ–որ մեկին սովորեցնել մեզ, թե ինչ պետք է անենք։ Միայն նրանք կարող են հասկանալ Աստվածաշունչը, ովքեր պատրաստ են սովորելու։
Ճիշտ տրամադրվածություն ցուցաբերեց Եթովպիայի Կանթակա թագուհու իշխանը։ Նա կառքով վերադառնում էր Աֆրիկա, երբ Փիլիպպոս աշակերտը վազելով մոտեցավ նրան ու հարցրեց, թե արդյոք հասկանում է այն, ինչ կարդում է։ Վերջինս խոնարհաբար պատասխանեց. «Ի՞նչպէս կ’կարողանամ, եթէ մէկը չ’առաջնորդէ ինձ»։ Աստծու Խոսքի մասին հասկացողություն ձեռք բերելով՝ այդ մարդը մկրտվեց։ Այնուհետև նա «ուրախութեամբ գն[աց] իր ճանապարհը» (Գործք 8։27–39)։
Եհովայի վկաները հասարակ մարդիկ են։ Ամեն շաբաթ նրանք անցկացնում են Աստվածաշնչի տնային ուսումնասիրություններ ավելի քան վեց միլիոն մարդկանց հետ։ Քանի որ Աստվածաշունչը սովորեցնում է, թե որն է լավագույն ապրելակերպը, բացատրում է, թե որն է մարդկության միակ հույսը և ցույց է տալիս, թե ինչպես է հնարավոր ճանաչել Աստծուն, միլիոնավոր մարդիկ համարում են, որ Աստվածաշունչ ուսումնասիրելը և հասկանալը մեծ բավականություն է պատճառում։
[նկար 7-րդ էջի վրա]
Նեեմանը դժվարացավ ընդունել իրենից դիրքով ցածր մարդու հրահանգները
[նկար 7-րդ էջի վրա]
Աստվածաշունչ հասկանալը բավականություն է պատճառում մեզ