• Նոր ծնունդ. անձնակա՞ն որոշում
    2009 Դիտարան | ապրիլ 1

    • Նոր ծնունդ. անձնակա՞ն որոշում

      ՈՐՈՇ քրիստոնյա քարոզիչներ մեջբերում են Հիսուսի հետևյալ խոսքերը. «Դուք դարձյալ պետք է ծնվեք» (Հովհաննես 3։7)։ Ըստ նրանց՝ դա պատվեր է։ Հետևաբար նրանք սովորեցնում են, որ յուրաքանչյուր հավատացյալ ինքն է որոշում վերստին ծնվել՝ հնազանդվելով Հիսուսի պատվերին։ Բայց արդյո՞ք նրանց սովորեցրածը ներդաշնակ է այն ամենին, ինչ Հիսուսն ասաց Նիկոդեմոսին։

      Ուշադրությամբ քննելով Հիսուսի խոսքերը՝ հասկանում ենք, որ նա չսովորեցրեց, որ դա անձնական որոշման հարց է։ Հունարեն արտահայտությունը, որը թարգմանվել է «դարձյալ ծնվել», ունի նաև «ծնվել վերևից»a իմաստը։ Ուստի կարող ենք ասել, որ նոր ծնունդը «վերևից է», այսինքն՝ «երկնքից»՝ «Հորից» (Հովհաննես 19։11; Հակոբոս 1։17)։ Փաստորեն, անհատը վերստին ծնվում է Աստծու կողմից (1 Հովհաննես 3։9)։

      Ուստի տրամաբանական է, որ դա անձնական որոշման հարց չէ։ Մի՞թե մենք ինքներս ենք որոշել՝ ծնվել, թե ոչ։ Չէ՞ որ մեր հայրն ու մայրն են մեզ կյանք տվել։ Նմանապես, մեր երկնային Հայրն է մեզ «նոր ծնունդ» տալիս (Հովհաննես 1։13)։ Պետրոս առաքյալը գրել է. «Օրհնյալ լինի Աստված և մեր Տեր Հիսուս Քրիստոսի Հայրը, որովհետև նրա մեծ ողորմության համաձայն՝ նա մեզ նոր ծնունդ տվեց» (1 Պետրոս 1։3)։

      Դա պատվե՞ր է

      Այդ դեպքում ինչո՞ւ Հիսուսն ասաց՝ «դուք դարձյալ պետք է ծնվեք»։ Մի՞թե Հիսուսը մեր ուժերից վեր բան է պահանջում մեզնից։ Անշուշտ ոչ. դա խելամիտ չէր լինի։ Ուրեմն ի՞նչ էր ուզում ասել նա։

      Ուշադրություն դարձնենք, որ այս խոսքերը գրի չեն առնված հրամայական եղանակով, հետևաբար դա պատվեր չէ։ Երբ Հիսուսն ասաց՝ «դուք դարձյալ պետք է ծնվեք», նա փաստ ներկայացրեց, ոչ թե պատվեր տվեց։ Մեկ ուրիշ թարգմանության մեջ վերոհիշյալ խոսքերը այսպես են հնչում. «Պէտք է ձեզ՝ վերստին ծնուիլ» (Հովհաննես 3։7, ԱԹ)։

      Օրինակով պարզաբանենք այս միտքը։ Քաղաքի դպրոցներից մեկում սովորում են կոնկրետ մի ազգի պատկանող երեխաներ։ Մի օր դպրոցի տնօրենի մոտ է գալիս մի պատանի ու ասում է. «Ես ուզում եմ սովորել ձեր դպրոցում»։ Տնօրենը պատասխանում է. «Մեր դպրոցում սովորելու համար դու պետք է այս ազգից լինես»։ Մի՞թե տնօրենը պատվեր է տալիս։ Նա չի հրամայում աշակերտին՝ ասելով. «Այս ազգի՛ց եղիր»։ Պարզապես ներկայացնում է, թե ինչ է պահանջվում դպրոցում սովորելու համար։ Ուրեմն երբ Հիսուսն ասաց՝ «դուք դարձյալ պետք է ծնվեք», նա պարզապես նշեց այն պահանջը, որն անհրաժեշտ է «Աստծու Թագավորություն մտնելու» համար։