Աստվածաշնչի գլխավոր թեման Աստծու Թագավորությունն է։ Այդ Թագավորության միջոցով Եհովան իրականացնելու է երկրի առնչությամբ իր սկզբնական նպատակը։ Իսկ ի՞նչ է այդ Թագավորությունը։ Որտեղի՞ց գիտենք, որ այն այժմ իշխում է։ Ի՞նչ է այն արդեն արել և ի՞նչ է իրականացնելու ապագայում։ Այս և հաջորդ երկու դասերում կգտնեք վերոհիշյալ հարցերի պատասխանները։

1. Ի՞նչ է Աստծու Թագավորությունը, և ո՞վ է այդ Թագավորության Թագավորը

Թագավորությունը Եհովա Աստծու կողմից հաստատված կառավարություն է, որի Թագավորը Հիսուս Քրիստոսն է։ Նա ղեկավարում է երկնքից (Մատթեոս 4։17; Հովհաննես 18։36)։ Աստվածաշնչում Հիսուսի մասին ասվում է. «Նա հավիտյան կթագավորի» (Ղուկաս 1։32, 33)։ Որպես Աստծու Թագավորության Թագավոր՝ Հիսուսը կղեկավարի ողջ երկիրը։

2. Ովքե՞ր են ղեկավարում Հիսուսի հետ

Հիսուսը մենակ չի ղեկավարում։ Նրա հետ «ամեն ցեղից, լեզվից, ժողովրդից և ազգից» մարդիկ «կթագավորեն երկրի վրա» (Հայտնություն 5։9, 10)։ Իսկ ընդհանուր քանի՞ հոգի են թագավորելու Քրիստոսի հետ։ Հիսուսի՝ երկիր գալուց ի վեր միլիոնավոր մարդիկ են դարձել քրիստոնյա, սակայն նրանցից ընդամենը 144 000-ն են գնալու երկինք՝ նրա հետ թագավորելու համար (կարդա Հայտնություն 14։1–4)։ Իսկ մյուս բոլոր քրիստոնյաները կդառնան այդ Թագավորության քաղաքացիներ (Սաղմոս 37։29)։

3. Ի՞նչ առումով է Աստծու Թագավորությունը գերազանցում մարդկային կառավարություններին

Անգամ երբ մարդկային կառավարիչներն ուզում են լավ բան անել, նրանք միշտ չէ, որ ի զորու են լինում։ Նրանց փոխարինում են այնպիսի ղեկավարներ, որոնց չեն հետաքրքրում իրենց ենթակայության տակ եղողների շահերը։ Սակայն Աստծու Թագավորության Թագավորին՝ Հիսուսին, ոչ ոք չի փոխարինելու։ Աստված «մի թագավորություն է հաստատելու, որը երբեք չի ավերվելու» (Դանիել 2։44)։ Հիսուսը ղեկավարելու է ողջ երկրի վրա և երբեք կողմնակալություն չի դրսևորելու։ Նա սիրառատ է, բարի ու արդար։ Հիսուսը մարդկանց սովորեցնելու է նույն կերպ վարվել միմյանց հետ՝ սիրով, բարությամբ ու արդարությամբ (կարդա Եսայիա 11։9)։

4. Երկրի վրա իշխելու է հզոր կառավարություն

Հիսուսը ավելի զորեղ է, քան ցանկացած մարդկային կառավարիչ։ Կարդացեք Մատթեոս 28։18 և քննարկեք հետևյալ հարցը։

• Ո՞րն է Հիսուսի և մարդկային ղեկավարների տարբերությունը։

Մարդկային կառավարությունները հաճախ են փոխվում, և յուրաքանչյուրը իշխում է երկրագնդի միայն մեկ հատվածի վրա։ Իսկ ի՞նչ կարող ենք ասել Աստծու Թագավորության մասին։ Կարդացեք Դանիել 7։14, այնուհետև քննարկեք հետևյալ հարցերը։

• Ինչո՞ւ է ուրախալի այն փաստը, որ Աստծու Թագավորությունը «չի ավերվելու»։

• Ինչո՞ւ է ուրախալի այն փաստը, որ այդ Թագավորությունը իշխելու է ամբողջ երկրի վրա։

5. Մարդկային կառավարությունները պետք է փոխարինվեն

Ինչո՞ւ պետք է Աստծու Թագավորությունը փոխարինի մարդկային իշխանություններին։ Դիտեք ՏԵՍԱՆՅՈՒԹԸ, այնուհետև քննարկեք հաջորդող հարցը։

ՏԵՍԱՆՅՈՒԹ. «Ի՞նչ է Աստծու Թագավորությունը» (հատված, 1։41)

• Ի՞նչ հետևանքների է հանգեցրել մարդկանց իշխանությունը։

Կարդացեք Ժողովող 8։9 և քննարկեք հետևյալ հարցերը։

• Քո կարծիքով՝ կարիք կա՞, որ Աստծու Թագավորությունը փոխարինի մարդկային իշխանություններին։ Ինչո՞ւ։

6. Աստծու Թագավորության իշխանները հասկանում են մեզ

Քանի որ մեր Թագավորը՝ Հիսուսը, ապրել է որպես մարդ, նա կարող է «ցավակից լինել մեր թուլություններին» (Եբրայեցիներ 4։15)։ Իսկ Հիսուսի 144 000 իշխանակիցները ընտրվում են մարդկանց միջից՝ «ամեն ցեղից, լեզվից, ժողովրդից և ազգից» (Հայտնություն 5։9)։

• Քո կարծիքով՝ մխիթարակա՞ն է այն փաստը, որ Հիսուսն ու իր իշխանակիցները մարդիկ են եղել։ Ինչո՞ւ։

7. Աստծու Թագավորության օրենքները մարդկային օրենքներից շատ ավելի լավն են

Իրենց քաղաքացիների շահերի ու պաշտպանության համար կառավարությունները օրենքներ են սահմանում։ Աստծու Թագավորությունը նույնպես ունի օրենքներ, որոնց իր քաղաքացիները պետք է ենթարկվեն։ Կարդացեք 1 Կորնթացիներ 6։9–11 համարները, այնուհետև քննարկեք այս հարցերը։

• Ըստ քեզ՝ ինչպիսի՞ն կլինի աշխարհը, եթե բոլոր մարդիկ հետևեն վարքագծի հետ կապված Աստծու սահմանած օրենքներին։a

• Քո կարծիքով՝ Եհովան իրավունք ունի՞ պահանջելու, որ իր Թագավորության հպատակները հարգեն այս օրենքները։ Ինչո՞ւ։

• Ի՞նչն է ցույց տալիս, որ այն մարդիկ, որոնք չեն հնազանդվում այս օրենքներին, կարող են փոխվել (տես 11-րդ համարը)։

ԱՄՓՈՓՈՒՄ

Աստծու Թագավորությունը իրական կառավարություն է, որը երկնքից իշխելու է ողջ երկրի վրա։

Վերհիշենք

• Ովքե՞ր են Աստծու Թագավորության ղեկավարները։

• Ի՞նչ առումով է Աստծու Թագավորությունը գերազանցում մարդկային իշխանություններին։

• Ի՞նչ է Եհովան ակնկալում իր Թագավորության հպատակներից։

ԲԱՑԱՀԱՅՏԻՐ ԱՎԵԼԻՆ

Տես, թե Հիսուսն ինչ ասաց Թագավորության գտնվելու վայրի մասին։

«Աստծու Թագավորությունը մարդու սրտո՞ւմ է» (վեբ հոդված)

Ինչո՞ւ են Եհովայի վկաները կարծում, որ առաջին հերթին պետք է Աստծու Թագավորությանը նվիրված լինել։

«Նվիրված են Աստծու Թագավորությանը» (1։43)

Քննիր, թե ինչ է Աստվածաշունչն ասում այն 144 000 մարդկանց մասին, ում Եհովան ընտրել է որպես Հիսուսի իշխանակիցներ։

«Ովքե՞ր են գնում երկինք» (վեբ հոդված)

Տես, թե ինչը համոզեց կալանավայրում գտնվող մի կնոջ, որ միայն Աստված կարող է արդարություն հաստատել աշխարհում։

«Հասկացա, թե ինչպես է վերջ դրվելու անարդարությանը» («Արթնացե՛ք», 2011 թ. նոյեմբեր)

Հիսուսն ասաց, որ իր հետևորդները չպետք է «աշխարհի մի մասը» լինեն (Հովհաննես 15։19)։ Դա նշանակում է, որ մենք պետք է չեզոք լինենք և չներքաշվենք քաղաքականության ու պատերազմների մեջ։ Սակայն միշտ չէ, որ հեշտ է չեզոք լինել. այս դիրքորոշման պատճառով գուցե ծաղրանքի արժանանանք։ Իսկ ինչպե՞ս կարող ենք չեզոք լինել և շարունակել նվիրված մնալ Եհովային։

1. Ինչպե՞ս են ճշմարիտ քրիստոնյաները վերաբերվում մարդկային կառավարություններին

Քրիստոնյաները հարգում են կառավարություններին։ Մենք վարվում ենք Հիսուսի՝ «կայսրինը կայսրին տվեք» խոսքերի համաձայն և հնազանդվում ենք այն երկրի օրենքներին, որտեղ ապրում ենք, օրինակ՝ վճարում ենք հարկերը (Մարկոս 12։17)։ Աստվածաշունչը սովորեցնում է, որ մարդկային կառավարությունները գոյություն ունեն, քանի որ Աստված է թույլ տվել (Հռոմեացիներ 13։1)։ Ուստի մենք հասկանում ենք, որ մարդկանց իշխանությունը հարաբերական է, կամ՝ սահմանափակ։ Մարդկության խնդիրների լուծման համար մենք մեր հույսը դրել ենք Աստծու և նրա երկնային Թագավորության վրա։

2. Ինչպե՞ս կարող ենք ցույց տալ մեր չեզոքությունը

Հիսուսի պես մենք էլ չենք միջամտում քաղաքականությանը։ Երբ մարդիկ տեսան Հիսուսի հրաշքներից մեկը և փորձեցին նրան թագավոր դարձնել, նա թույլ չտվեց (Հովհաննես 6։15)։ Իսկ ինչո՞ւ։ Հետագայում նա ասաց. «Իմ թագավորությունը այս աշխարհի մի մասը չէ» (Հովհաննես 18։36)։ Որպես Հիսուսի աշակերտներ՝ մենք տարբեր կերպերով կարող ենք ցույց տալ մեր չեզոքությունը։ Օրինակ՝ մենք չենք մասնակցում պատերազմներին (կարդա Միքիա 4։3)։ Մենք հարգում ենք ազգային խորհրդանիշները, որոնցից մեկը դրոշն է, սակայն չենք պաշտում դրանք (1 Հովհաննես 5։21)։ Մենք չենք սատարում կամ ընդդիմանում որևէ քաղաքական կուսակցության կամ թեկնածուի։ Այս և այլ կերպերով մենք փաստում ենք, որ ամբողջությամբ նվիրված ենք Աստծու կառավարությանը՝ Թագավորությանը։

ԻՄԱՆԱՆՔ ԱՎԵԼԻՆ

3. Ճշմարիտ քրիստոնյաները չեզոք են

Հիսուսն ու իր աշակերտները օրինակ են մեզ համար։ Կարդացեք Հռոմեացիներ 13։1, 5–7 և 1 Պետրոս 2։13, 14 համարները, այնուհետև դիտեք ՏԵՍԱՆՅՈՒԹԸ և քննարկեք հետևյալ հարցերը։

ՏԵՍԱՆՅՈՒԹ. «Ճշմարիտ քրիստոնյաները չեզոք են» (մաս 1, 4։28)

• Ինչո՞ւ պետք է հարգենք մարդկային իշխանություններին։

• Ի՞նչ կերպերով կարող ենք ցույց տալ, որ հպատակվում ենք նրանց։

Պատերազմների ժամանակ որոշ ազգեր կարող են պնդել, թե չեզոք են, սակայն իրականում աջակցեն հակամարտող կողմերին։ Ո՞րն է իսկական չեզոքությունը։ Կարդացեք Հովհաննես 17։16, այնուհետև դիտեք ՏԵՍԱՆՅՈՒԹԸ և քննարկեք հետևյալ հարցը։

ՏԵՍԱՆՅՈՒԹ. «Ճշմարիտ քրիստոնյաները չեզոք են» (մաս 2, 3։11)

• Ի՞նչ է նշանակում չեզոք լինել։

Ինչպե՞ս վարվել, երբ մարդկային իշխանությունները պահանջում են անել մի բան, ինչը հակասում է Աստծու օրենքներին։ Կարդացեք Գործեր 5։28, 29 և դիտեք ՏԵՍԱՆՅՈՒԹԸ, այնուհետև քննարկեք հետևյալ հարցերը։

ՏԵՍԱՆՅՈՒԹ. «Ճշմարիտ քրիստոնյաները չեզոք են» (մաս 3, 1։18)

• Եթե հակասություն է առաջանում մարդկանց և Աստծու սահմանած օրենքների միջև, ո՞ւմ պետք է հնազանդվենք։

• Ի՞նչ իրավիճակներ կարող ես նշել, որոնց ժամանակ քրիստոնյաները չեն հնազանդվի մարդկային իշխանություններին։

4. Չեզոք եղիր մտքով և գործով

Կարդացեք 1 Հովհաննես 5։21, այնուհետև դիտեք ՏԵՍԱՆՅՈՒԹԸ և քննարկեք հետևյալ հարցերը։

ՏԵՍԱՆՅՈՒԹ. «Ճշմարիտ քրիստոնյաներին քաջություն է անհրաժեշտ— Չեզոքություն պահելու համար» (2։49)

• Այենգեն ինչո՞ւ չանդամակցեց քաղաքական կուսակցությանը և չմասնակցեց դրոշին պատիվ տալու արարողությանը։

• Քո կարծիքով՝ դա իմաստո՞ւն որոշում էր։

Ուրիշ ի՞նչ իրավիճակներում կարող է փորձվել մեր չեզոքությունը։ Դիտեք ՏԵՍԱՆՅՈՒԹԸ, այնուհետև քննարկեք հետևյալ հարցերը։

ՏԵՍԱՆՅՈՒԹ. «Դասեր՝ «Դիտարանից»։ Չեզոք մնա այս պառակտված աշխարհում» (5։16)

• Ինչպե՞ս կարող ենք չեզոք մնալ, երբ հետևում ենք միջազգային սպորտային մրցաշարերին։

• Ինչպե՞ս կարող ենք չեզոք մնալ, անգամ երբ իշխանությունների որոշումները անձամբ մեզ են առնչվում։

• Ինչպե՞ս կարող են լրատվամիջոցները կամ շրջապատի մարդիկ ազդել մեր չեզոքության վրա։

ԱՄՓՈՓՈՒՄ

Քրիստոնյաները ամեն ջանք թափում են, որ մտքով, խոսքով ու գործով չեզոք լինեն։

Վերհիշենք

• Մարդկային իշխանությունների հանդեպ ի՞նչ պարտականություններ ունենք։

• Ինչո՞ւ ենք քաղաքական առումով չեզոք։

• Ո՞ր իրավիճակներում կարող է փորձվել մեր չեզոքությունը։

ԲԱՑԱՀԱՅՏԻՐ ԱՎԵԼԻՆ

Չեզոք մնալու համար ի՞նչ զոհողություններ անելու կարիք գուցե ունենանք։

«Եհովան երբեք մեզ չի թողել» (3։14)

Ընտանիքներն ինչպե՞ս կարող են նախօրոք պատրաստվել չեզոքության փորձություններին։

«Չեզոք եղիր հանրային միջոցառումների ժամանակ» (4։25)

Ինչո՞ւ կարող ենք ասել, որ մարդու կյանքում մեծագույն պատիվը սեփական երկիրը պաշտպանելը չէ։

«Աստծու համար ամեն բան հնարավոր է» (5։19)

Քննիր, թե ինչպես կարող ես «աշխարհի մի մասը» չլինել, երբ աշխատանքի վերաբերյալ որոշում ես կայացնում։

«Ամեն մէկն իր բեռը պիտի վեր առնէ» («Դիտարան», 2006 թ. մարտի 15)