Պարտք, որը պետք է տանք ուրիշներին
1 Պողոս առաքյալն իրեն պարտավորված էր զգում քարոզելու մարդկանց։ Նա գիտեր, որ Եհովան հնարավորություն է բացել բոլոր մարդկանց առջև, որ փրկվեն իր Որդու թանկարժեք արյան միջոցով (Ա Տիմոթ. 2։3–6)։ Ուստի Պողոսը գրեց. «Ես Յոյներին եւ Բարբարոսներին, իմաստուններին եւ անմիտներին պարտական եմ»։ Նա եռանդորեն և առանց հոգնելու ջանում էր վճարել մարդկանց իր պարտքը՝ պատմելով նրանց բարի լուրը (Հռովմ. 1։14, 15)։
2 Պողոսի նման՝ քրիստոնյաներն այսօր ձգտում են ցանկացած հնարավորության դեպքում բարի լուրը պատմել իրենց դրացիներին։ Քանի որ արագորեն մոտենում է «մեծ նեղութիւն[ը]», անկեղծ սրտով մարդկանց փնտրելու գործը հրատապ է։ Թող որ մարդկանց հանդեպ անկեղծ սերը մղի մեզ ժրաջան լինել կյանք փրկող այս գործի մեջ (Մատթ. 24։21; Եզեկ. 33։8)։
3 Պարտքը վճարելը։ Մարդկանց հետ զրուցելու հիմնական միջոցը տնից տուն քարոզելն է։ Այն տարածքներում, որտեղ շատերը տանը չեն լինում, ճշգրիտ նշումներ անելով և տարբեր ժամերի այցելելով, մենք կկարողանանք զրուցել ավելի շատ մարդկանց հետ (Ա Կորնթ. 10։33)։ Նաև կարող ենք մարդկանց հետ զրուցել՝ քարոզելով գործարար տարածքներում, փողոցներում, այգիներում, կայանավայրերում, ինչպես նաև հեռախոսով վկայություն տալով։ Կարող ենք ինքներս մեզ հարց տալ. «Իմ ձեռքից եկած ամեն բան անո՞ւմ եմ, որ քարոզելու բոլոր հնարավոր միջոցներն օգտագործեմ, որպեսզի հայտնեմ մարդկանց կյանքի առաջնորդող բարի լուրը» (Մատթ. 10։11)։
4 Մի ռահվիրա քույր մեծ պատասխանատվություն էր զգում վկայություն տալու իր տարածքում բնակվող բոլոր մարդկանց։ Նրա տարածքում տներից մեկի վարագույրները միշտ փակ էին, և տանը ոչ ոք չէր լինում։ Սակայն մի օր, երբ քույրը չէր ծառայում, տեսավ, որ այդ տան դիմաց ավտոմեքենա է կանգնած։ Նա չցանկացավ բաց թողնել առիթը և սեղմեց զանգի կոճակը։ Դուռը բացեց մի տղամարդ։ Առաջին զրույցի արդյունքը եղավ այն, որ քույրն իր ամուսնու հետ միասին մի քանի անգամ վերայցելեց տանտիրոջը։ Ի վերջո, այդ մարդը համաձայնվեց ուսումնասիրել Աստվածաշունչը, և այժմ նա մկրտված եղբայր է։ Նա երախտապարտ է քրոջը այն բանի համար, որ վերջինս իրեն պարտավորված է զգացել մարդկանց քարոզելու։
5 Մինչ արագորեն մոտենում է վերջը, ժամանակն է, որ տանք մեր դրացիների պարտքը՝ ժրաջանորեն մասնակցելով քարոզչական գործին (Բ Կորնթ. 6։1, 2)։