Ինչպե՞ս կարող ես խաղաղություն ունենալ ուրիշների հետ

ԱՍՏՎԱԾԱՇՈՒՆՉԸ մարդկանց մասին ասում է. «Բոլորը մեղք գործեցին ու չհասան Աստծու փառքին» (Հռոմեացիներ 3։23)։ Քանի որ երկրի վրա ապրող ավելի քան յոթ միլիարդ մարդիկ անկատար են, այդ պատճառով նրանց միջև ընդհարումները անխուսափելի են։ Ինչպե՞ս կարող ենք խաղաղություն ունենալ մարդկանց հետ։

Աստվածաշունչը հրաշալի խորհուրդներ է պարունակում։ Այնտեղ ասվում է, որ Արարիչը «խաղաղության Աստված է», որի անունը Եհովա է (Եբրայեցիներ 13։20; Սաղմոս 83։18)։ Աստված ցանկանում է, որ իր երկրային զավակները խաղաղ փոխհարաբերություններ վայելեն։ Այս հարցում նա ինքը նախաձեռնություն է վերցնում։ Օրինակ՝ երբ առաջին մարդկային զույգը մեղք գործեց Աստծու դեմ՝ խզելով խաղաղ փոխհարաբերությունները, Աստված անմիջապես քայլեր ձեռնարկեց նրանց իր հետ հաշտեցնելու համար (2 Կորնթացիներ 5։19)։ Քննենք երեք միջոց, որոնք կօգնեն խաղաղություն ունենալու ուրիշների հետ։

Մեծահոգաբար ներիր

Ի՞նչ է ասում Աստվածաշունչը։ «Եթե որևէ մեկը մյուսի դեմ գանգատվելու պատճառ ունի, շարունակեք համբերել իրար և մեծահոգաբար ներել միմյանց։ Ինչպես Եհովան մեծահոգաբար ներեց ձեզ, այդպես էլ դուք արեք» (Կողոսացիներ 3։13)։

Ինչո՞ւ է դժվար։ Գուցե «գանգատվելու պատճառը» հիմնավոր է, և կարծում ես, որ արդարացի կլինի, եթե խզես փոխհարաբերություններդ քեզ վիրավորած անհատի հետ։ Նաև գուցե մտածես, որ նա պետք է առաջինը ներողություն խնդրի։ Բայց եթե այդ անհատը չգիտի, որ քեզ նեղացրել է, կամ մտածում է, որ դու ես սխալ, ապա խնդիրը թերևս անլուծելի մնա։

Ի՞նչ կարող ես անել։ Հետևիր աստվածաշնչյան խորհրդին՝ մեծահոգաբար ներելով, հատկապես, եթե խնդիրը մեծ չէ։ Հիշիր, եթե Աստված հաշվեր մեր սխալները, մենք երբեք չէինք կարող կանգնել նրա առաջ (Սաղմոս 130։3)։ Աստվածաշունչն ասում է, որ «Եհովան բարեգութ է և ողորմած, դանդաղ է բարկանալու մեջ և լի է սիրառատ բարությամբ։ Որովհետև նա լավ գիտի մեր կազմությունը, հիշում է, որ հող ենք մենք» (Սաղմոս 103։8, 14)։

Ուշադրություն դարձրու նաև աստվածաշնչյան հետևյալ խոսքերին. «Մարդու ըմբռնողականությունը հանդարտեցնում է իր բարկությունը, և նրա գեղեցկությունը հանցանքին ուշադրություն չդարձնելն է» (Առակներ 19։11)։ Ըմբռնողականությունը օգնում է մեզ տեսնելու խնդրի արմատը, որպեսզի հասկանանք, թե ինչու են մարդիկ այդպես խոսում կամ վարվում։ Հարցրու ինքդ քեզ. «Ինձ նեղացնող անհատը հոգնա՞ծ էր, հիվա՞նդ էր, թե՞ ճնշման տակ էր»։ Մարդկանց իսկական մղումները, զգացմունքները և հանգամանքներն իմանալը կարող է մեղմել մեր բարկությունը և մղել մեզ արդարացնելու նրանց սխալները։

Խոսիր այդ մասին

Ի՞նչ է ասում Աստվածաշունչը։ «Եթե քո եղբայրը մեղք գործի, գնա և ցույց տուր նրան, թե որն է նրա սխալը, երբ դու և նա մենակ եք։ Եթե նա լսի քեզ, շահեցիր քո եղբորը» (Մատթեոս 18։15)։

Ինչո՞ւ է դժվար։ Բացասական զգացումների, ինչպես օրինակ, վախի, զայրույթի և շփոթության պատճառով գուցե վարանես խնդիրը լուծելու համար անհատին մոտենալ։ Հնարավոր է՝ օգնություն ստանալու նպատակով այդ խնդրի մասին պատմես ուրիշներին՝ այդպիսով բարդացնելով իրավիճակը։

Ի՞նչ կարող ես անել։ Երբ տեսնում ես, որ խնդիրը լուրջ է և չես կարող այն անտեսել, մոտեցիր անհատին և խոսիր նրա հետ։ Փորձիր խնդիրը լուծել հետևյալ կերպով։

1) Անհապաղ։ Մի՛ հետաձգիր։ Հակառակ դեպքում՝ խնդիրը ավելի կբարդանա։ Կիրառիր Հիսուսի խորհուրդը. «[Եթե] քո ընծան տանես զոհասեղանի մոտ և այնտեղ հիշես, որ եղբայրդ քո դեմ ինչ- որ բան ունի, թող ընծադ զոհասեղանի դիմաց և գնա, նախ հաշտվիր քո եղբոր հետ և հետո վերադարձիր ու մատուցիր ընծադ» (Մատթեոս 5։23, 24)։

2) Առանձին։ Խուսափիր ուրիշների հետ խնդրի մասին բամբասելուց։ «Գործդ վարիր մերձավորիդ հետ և մտերմիկ զրույցում ասվածը մի՛ հայտնիր» (Առակներ 25։9)։

3) Խաղաղությամբ։ Մի վերլուծիր, թե ով է ճիշտ, ով՝ սխալ։ Քո նպատակը պետք է լինի այդ անհատի հետ խաղաղություն ունենալը և ոչ թե վեճի մեջ հաղթող լինելը։ Ձգտիր «դու»-ի փոխարեն օգտագործել «ես» բառը։ Օրինակ՝ «ես նեղացել եմ, քանի որ....» ասելը կարող է մեղմել լարվածությունը, քան «դու ինձ նեղացրել ես» խոսքերը։ Աստվածաշունչն ասում է. «Հետամուտ լինենք այն ամենին, ինչը խաղաղություն է բերում և նպաստում է միմյանց կերտելուն» (Հռոմեացիներ 14։19)։

Եղիր համբերատար

Ի՞նչ է ասում Աստվածաշունչը։ «Ոչ մեկին չարի փոխարեն չարով մի՛ հատուցեք.... Բայց «եթե քո թշնամին քաղցած է, կերակրիր նրան, եթե ծարավ է, խմելու բան տուր նրան»» (Հռոմեացիներ 12։17, 20)։

Ինչո՞ւ է դժվար։ Գուցե առաջին անգամ քեզ չի հաջողվել խաղաղություն հաստատել, և դու հույսդ կտրել ես։

Ի՞նչ կարող ես անել։ Համբերատար եղիր։ Մարդիկ տարբեր խառնվածքներ ունեն և հասունության տարբեր աստիճաններում են։ Ոմանց ավելի երկար ժամանակ է պետք հանդարտվելու համար, ոմանք էլ դեռ սովորում են քրիստոնեական հատկություններ դրսևորել։ Շարունակիր նրանց հանդեպ բարություն և սեր ցուցաբերել։ «Թույլ մի՛ տուր, որ չարը հաղթի քեզ, այլ միշտ բարիով հաղթիր չարին» (Հռոմեացիներ 12։21)։

Ուրիշների հետ խաղաղություն ունենալու համար մենք պետք է դրսևորենք խոնարհություն, ըմբռնողականություն, համբերություն և սեր։ Այո՛, հանուն խաղաղության արժե՛ ջանքեր թափել։

ԳԻՏԵԻ՞Ք ԱՐԴՅՈՔ

● Ի՞նչը կօգնի քեզ մեծահոգաբար ներելու ուրիշներին (Կողոսացիներ 3։13)։

● Ի՞նչը կօգնի քեզ մոտենալու անհատին և խոսելու նրա հետ (Մատթեոս 5։23, 24)։

● Ի՞նչ կարող ես անել, եթե քեզ չի հաջողվում խաղաղություն հաստատել (Հռոմեացիներ 12։17–21)։

[մեջբերում 11-րդ էջի վրա]

«Մարդու ըմբռնողականությունը հանդարտեցնում է իր բարկությունը, և նրա գեղեցկությունը հանցանքին ուշադրություն չդարձնելն է» (ԱՌԱԿՆԵՐ 19։11)