«Մեր կյանքը և ծառայությունը» հանդիպման ձեռնարկի հղումներ
ՆՈՅԵՄԲԵՐԻ 11–17
ԳԱՆՁԵՐ ԱՍՏԾՈՒ ԽՈՍՔԻՑ | 2 ՀՈՎՀԱՆՆԵՍ 1–ՀՈՒԴԱ
Փնտրենք հոգևոր գանձեր
it-2, էջ 279
Սիրո խնջույքներ
Աստվածաշնչում չի նկարագրվում, թե ինչ էին այդ «սիրո խնջույքները», ոչ էլ նշվում է, թե որքան հաճախ էին դրանք կազմակերպվում (Հուդա 12)։ Դրանց վերաբերյալ ո՛չ Հիսուսը, ո՛չ էլ առաքյալները որևէ պատվեր չեն տվել, և հստակ է, որ դրանք չպետք է դիտվեին որպես պարտադիր կամ հարատև բնույթ կրող մի բան։ Ոմանք ասում են, որ այդ խնջույքները հատուկ ճաշկերույթներ էին, որ կազմակերպում էին նյութապես ապահովված քրիստոնյաները և հրավիրում իրենց աղքատ հավատակիցներին։ Որբերը, այրիները, հարուստներն ու կարիքավորները այդ ժամանակ միասին հավաքվում էին առատ սեղանի շուրջ և վայելում ջերմ եղբայրական սեր։
it-2, էջ 816
Ժայռ, վեմ
Հունարեն մեկ այլ բառ՝ սփիլաս, ըստ ամենայնի վերաբերում է ջրի տակ թաքնված ժայռերին կամ խութերին։ Հուդա աշակերտը այդ բառը օգտագործում է նկարագրելու համար որոշ մարդկանց, ովքեր քրիստոնեական ժողով էին սողոսկել նենգ մղումներով։ Ինչպես ստորջրյա ժայռերն էին սպառնալիք նավերի համար, այդպես էլ այդ մարդիկ էին լուրջ վտանգ քրիստոնեական ժողովի մյուս անդամների համար։ Հուդան այդ մարդկանց մասին ասում է. «Սրանք ձեր սիրո խնջույքներում ստորջրյա խութերի պես են, որոնք կերուխում են անում ձեզ հետ» (Հուդա 12)։
ՆՈՅԵՄԲԵՐԻ 25–ԴԵԿՏԵՄԲԵՐԻ 1
ԳԱՆՁԵՐ ԱՍՏԾՈՒ ԽՈՍՔԻՑ | ՀԱՅՏՆՈՒԹՅՈՒՆ 4–6
Փնտրենք հոգևոր գանձեր
re, էջ 76–77, պրբ. 8
Եհովայի երկնային գահի փառահեղությունը
8 Հովհաննեսը գիտեր, որ հին ժամանակներում խորանում ծառայելու համար քահանաներ էին նշանակված։ Այդ պատճառով, երբ նա տեսավ այն, ինչը նկարագրում է հետևյալ խոսքերում, հավանաբար, զարմացավ. «Այդ գահի շուրջբոլորը քսանչորս գահեր կային, և տեսա քսանչորս երեցներ՝ նստած այդ գահերի վրա ու սպիտակ վերնահագուստներ հագած, իրենց գլուխներին՝ ոսկե պսակներ» (Հայտնություն 4։4)։ Քահանաների փոխարեն՝ նա տեսնում է գահերի վրա նստած 24 երեցների, որոնց գլուխներին թագավորական պսակներ կան։ Ովքե՞ր են այդ երեցները։ Անշուշտ դրանք քրիստոնեական ժողովի օծյալ անդամներն են, որոնք երկնային կյանքի հարություն են ստացել և զբաղեցրել այն դիրքը, որ Եհովան խոստացել էր նրանց։ Որտեղի՞ց գիտենք դա։
re, էջ 80, պրբ. 19
Եհովայի երկնային գահի փառահեղությունը
19 Ի՞նչ են ներկայացնում այս կենդանի արարածները։ Մեկ ուրիշ մարգարեի՝ Եզեկիելին տրված տեսիլքը օգնում է մեզ գտնելու պատասխանը։ Եզեկիելը տեսավ Եհովային՝ նստած երկնային կառքի գահի վրա, իսկ կառքի յուրաքանչյուր կողմում՝ կենդանի էակներ, որոնք իրենց առանձնահատկություններով նման էին Հովհաննեսի նկարագրածին (Եզեկիել 1։5–11, 22–28)։ Հետո Եզեկիելը նորից տեսնում է չորս կենդանի արարածներով ուղեկցվող այդ գահ-կառքը, բայց այս անգամ նա կենդանի արարածներին անվանում է քերովբեներ (Եզեկիել 10։9–15)։ Ուստի այդ չորս կենդանի արարածները, որ տեսնում է Հովհաննեսը, պետք է որ ներկայացնեն Աստծու բազմաթիվ քերովբեներին, որոնք ոգեղեն էակներից բաղկացած նրա երկնային ընտանիքի մեջ բարձր դիրք ունեն։ Հովհաննեսին թերևս չի զարմացնում, որ քերովբեները այդքան մոտ են Եհովային, քանի որ հին Իսրայելի խորանում ուխտի տապանակի կափարիչի վրա, որը ներկայացնում էր Եհովայի գահը, երկու ոսկե քերովբեներ կային դրված։ Այս քերովբեների մեջտեղից Եհովայի ձայնը հրահանգներ էր տալիս ժողովրդին (Ելք 25։22; Սաղմոս 80։1)։