EHUNGI 5
Ehupo ezeu mari utu
PENDJE yotjikunino tjaEden, Adam na Eva va ri nomauzeu omengi. Owo aave hepa okuungura tjinene kutja ve rye. Poruveze rokumuna omiti omiwa vyovihape, owo aave munu omakwiya omengi novinanyiva mbyaavi hapa ongondoroka nawo. Ihi otji tja tjitwa indu Adam na Eva tji ve hina va puratena ku Mukuru nu va pandjara oupanga na Ye.
Okuweza ku ihi, Adam na Eva va uta okukoka. Zemburuka, kutja Mukuru we ve rakiza kutja mave koka indu tji va ri kotjihape tjomuti worive. Otjingaperi, eyuva indo ndu va rya owo va uta okukoka. Owo tjiri va ri omayova okuhi nokupuratena ku Mukuru.
Ovanatje vaAdam na Eva avehe va kwatwa kombunda yaindu Mukuru tje ve isamo motjikunino tjaEden. Ihi matji heye kutja ovanatje vawo wina mave kurupa nave koka.
Andakuzu Adam na Eva va puratena ku Jehova, ehupo rawo novanatje vawo atja ri rira enanyuṋe. Owo avehe atja ve hupa ngaaruhe mondjoroka kombanda yehi. Katja pe kara kangamwa ngu ma kurupa, okuvera nokukoka.
Mukuru u vanga ovandu okuhupa ngaaruhe mondjoroka, nu Eye ma kwizike kutja eyuva rimwe mape kara nao. Ehi arihe mari rire ewa nu ovandu wina mave rire ovaveruke. Nu ovandu avehe kombanda yehi mave rire omapanga omawa na kangamwa auhe, na Mukuru wina.
Nungwari Eva ka ri epanga raMukuru rukwao. Okutja indu tja panduka ovanatje ve, katja ri otjiṋa otjipupu kuye. Eye wa ri nomihihamo. Tjiri, okuhi nokupuratena ku Jehova kwe mu etera oruhoze.
Adam na Eva va ri novazandu novakazona ovengi. Omuzandu wawo omutenga tja pandukwa, ve mu ruka Kain. Omuzandu wawo omutjavari ve mu ruka Abel. Ove mo tjiwa kutja otjikeṋa tji tja tjitwa kuwo?
Genesis 3:16-23; 4:1, 2; Omavandururiro 21:3, 4.