EHUNGI 7
Omurumendu ependa
OTJA ovandu tjaave takavara kombanda yehi, ovengi vawo aave tjiti oviṋa ovivi tjimuna Kain. Nungwari omurumendu umwe wa ri notjikaro tjarwe. Ena re ra ri Henok. Henok wa ri omurumendu ependa. Ovandu ongondoroka naye aave tjiti oviṋa ovivi tjinene nungwari Henok wa panḓera pokukarera Mukuru.
Ove mo tjiwa kutja omena ratjike ovandu oruveze ndo tjaave tjiti oviṋa ovivi tjinene nao? Ripura uriri, ouṋe ngwa tjita kutja Adam na Eva ve pirukire Mukuru nokutja ve rye kotjihape Mukuru tja tjere ave ri ko? Ii, eye wa ri omuengeli omuvi. Ombeibela i mu isana Satana. Nu eye u kondja okutanaura ovandu avehe ve rire ovavi.
Eyuva rimwe Jehova Mukuru wa hinda Henok ma raere ovandu otjiṋa tji ve hina aave vanga okutjizuva. Otjo tja ri hi: ‘Eyuva rimwe Mukuru ma yandeke ovandu avehe ovavi.’ Ovandu ngahino va pindika tjinene tji va zuva omambo nga. Mape ya wina va kondja okuzepa Henok. Mena ranao Henok aa hepa okurira ependa mokuraera ovandu ohunga na ihi Mukuru tji ma tjiti.
Mukuru kena pa yandjera Henok okuhupa orure mokati kovandu ovavi mbo. Henok wa hupa ozombura 365 uriri. Omena ratjike tji matu tja “ozombura 365 uriri”? Omena rokutja ovandu oruveze ndo va ri nomasa punai nu aave hupu orure kombanda yanai. Omuzandu waHenok Metuselak wa hupa ozombura 969!
Kombunda yaHenok tja ṱa, ovandu va ririra ko ovavi. Ombeibela mai tja ‘omeripura wawo ya ri omavi’ no kutja ‘ehi re urire ozondjito zouvi.’
Ove mo tjiwa kutja omena ratjike tji kwe urire omaumba omengi kombanda yehi momayuva ngo? Omena rokutja Satan wa ri nomwano omupe wokutjita kutja ovandu ve tjite ouvi. Ehungi ndi mari kongorere mba mari tu raere ohunga na ihi.
Genesis 5:21-24, 27; 6:5, 11-13; Ovaheberi 11:5; Judas 14, 15.