EHUNGI 13
Abraham Epanga raMukuru
ORUVEZE rumwe ovandu ku va katura kombunda yomupupo rwa ri nena Ur. Otjo tja rira otjihuro otjinanḓengu tji tja ri nozondjuwo ozombwa. Nungwari ovandu aave rikotamene koomukuru wovisenginina. Owo wina otjaave tjiti mu Babel. Ovandu mu Ur na Babel kava ri otja Noa nomuzandu we Sem, mbu va kakatera kokukarera Jehova.
Korusenina, tji pa kapita, ozombura 350 kombunda yomupupo, omurumendu omuṱakame Noa wa ṱa. Kombunda yozombura mbari uriri omurumendu ngu mo munu motjiperendero hi otja kwatwa. Eye wa ri omundu wapeke tjinene ku Mukuru. Ena re ra ri Abraham. Eye wa turire puna eṱunḓu re motjihuro tjaUr.
Eyuva rimwe Jehova wa raera Abraham: ‘Pita mu Ur na movazamumwe voye, nu twende kehi ndi me ku urikire.’ Abraham wa puratena ku Mukuru na isa omauwa aehe ya Ur kongotwe? Ii, eye wa tjita nao. Nu mena rokutja Abraham aruhe wa ri nonḓuviro ku Mukuru eye aa tjiukwa otja epanga raMukuru.
Tjiva veṱunḓu raAbraham va ya puna ye tja tjinda okuza mu Ur, muwo mwa ri ihe Terak nomuatje womwangu we, Lot na Sara omukazendu waAbraham. Momakapitiro woruveze owo vee kuvaza poruveze ndu isanewa Haran. Imba opu pa ṱira Terak. Owo va ri kokure na Ur.
Kombunda yoruveze Abraham novazamumwe ve va tjinda okuza mu Haran ave ya kehi ndi isanewa Kanaan. Okuzambo Jehova a tja: ‘Ehi ndi ondi me yandja kovanatje woye.’ Abraham wa kara mu Kanaan nu a tura mozondanda.
Mukuru wa uta okuvatera Abraham nga tja kara notupanda otuingi twozonḓu novinamuinyo vyarwe novakarere omasere. Nungwari eye na Sara kave na pu va ri novanatje vawo oveni.
Abraham tja ri nozombura 99, Jehova wa tja: ‘Ami me ku kwizikire kutja mo ka rira ihe yomihoko omingi.’ Nungwari ihi atja tji tjitwa vi, indu Abraham na Sara tji va kurupire tjinene okupanduka ovanatje?
Genesis 11:27-32; 12:1-7; 17:1-8, 15-17; 18:9-19.