EHUNGI 23
Oturoto twaFarao
PA KAPITA ozombura mbari, nu Josef ngunda u ri mondeko. Omutye omunene womavinu ke na pe mu zemburuka. Okuzambo ouṱuku umwe Farao wa rota oturoto tuvari twapeke, nu wa kuminwe kutja aatu heye tjike. Ove mo mu munu tja rara mbo? Omuhuka omunene mbwa kongorera ko eye wa isana ozonongo ze neve raere oviṋa mbya rota. Nungwari owo kaave yenene okumangurura oturoto twe.
Oruveze ndo omunene womavinu opa uta okuzemburuka Josef. Eye arire tja tja ku Farao: ‘Indu tji mba ri mondeko mwa ri omurumendu ngwaa yenene okumangurura oturoto.’ Tjimanga Farao wa kaisanisa Josef.
Farao wa raera Josef oturoto twe: ‘Ami mba munu ozongombe ozonḓenḓu ozombwa nu nḓa ṋuna. Okuzambo e munu ozongombe ozonḓenḓu ozondambi nu nḓa rambuka. Nu inḓa ozondambi za rya inḓa nḓa ṋuna.
‘Moruroto rwandje orutjavari ami mba munu ovihweka vyovikokotwa hambombari mbya hapa komukono umwe nu mbya hora. Tjazumba e munu ovihweka hambombari mbya kukuta tjinene novirambi. Novihweka mbi ovirambi vyovikokotwa vya ṋiṋa ovihweka vyovikokotwa hambombari oviwa.’
Josef wa tja ku Farao: ‘Oturoto atuyevari matu heye otjiṋa tjimwe. Ozongombe ozonḓenḓu ozonḓune hambombari novihweka vyovikokotwa mbya hora mavi heye ozombura hambombari, nu ozongombe ozonḓenḓu ozondambi hambombari novihweka vyovikokotwa ovirambi hambombari mavi heye ozombura hambombari zarwe. Mape kara ozombura hambombari mu mamu hapa ovikurya ovingi moEngipte. Okuzambo mape kara ozombura hambombari zourumbu.’
Okutja Josef a raere Farao: ‘Toorora omurumendu onongo ma rire omutjevere womawongero wovikurya mozombura inḓa ozombwa hambombari. Okutja ovandu kave nokuṱondjara mozombura hambombari ozombi nḓu maze kongorere ko indu tji maku kara ourumbu.’
Indji ya ri ondunge ombwa ku Farao. Neye wa toorora Josef okuwonga ovikurya nokuvipwika. Okutja Josef wa rira omurumendu omunanḓengu tjinene moEngipte okukongorera ku Farao.
Kombunda yozombura hambondatu, moruveze rwourumbu, Josef wa muna ovarumendu mbaave wondjo. Ove mo tjiwa kutja oowaṋi? Owo va ri omarumbi we 10! Ihe Jakob we ve hinda koEngipte mena rokutja ovikurya koyawo mu Kanaan vya manukire. Josef wa zemburuka omarumbi we nowo kaave mu zemburuka. Ove mo tjiwa kutja omena ratjike? Omena rokutja Josef we kura nu wa zarere ozombanda zarwe.
Josef arire tja zemburuka kutja indu tja ri omuzandona wa rotere ohunga nomarumbi we mbu mave ya okumukarera. Ove mo zemburuka kutja wa lesa ohunga na ihi? Okutja Josef otja muna kutja Mukuru ongwe mu hinda koEngipte, nokutja eye we mu hindira epu ewa. Ove otja tji mo ripura Josef wa tjita tjike? Indjo tu tare.
Genesis 41:1-57; 42:1-8; 50:20.