EHUNGI 27
Ombara ombi ndjaai honaparere Engipte
OVARUMENDU mba mave ni̭ṋikizire ovandu koviungura. Tara komurumendu ngu ma tono umwe wovaungure nongora! Ovaungure mba oveṱunḓu raJakob, nu owo ve isanewa Ovaisrael. Nu ovarumendu mbu mave ve ni̭ṋikizire koviungura Ovaengipte. Ovaisrael ve yekurira ovakarere wOvaengipte. Imbi vya tjitwa vi?
Oure wozombura ozengi eṱunḓu raJakob enene ra turire mohange moEngipte. Josef, ngwa ri omurumendu omunanḓengu tjinene moEngipte okukongorera kombara Farao, ongwe ve ṱakamisa. Kombunda yanao Josef wa ṱa. Nu pa zikwa Farao omupe otjombara moEngipte, nu eye kaa vanga Ovaisrael.
Okutja Farao omuvi ngwi wa tjita Ovaisrael okurira ovakarere. Eye wa twa po ovarumendu ovindandi novanautwe. Owo va ni̭ṋikizira Ovaisrael koviungura ovizeu vyokutungira Farao ovihuro. Nungwari Ovaisrael aave ririre ko ovengi motjivarero. Okutja Ovaengipte va ri nemuma kutja Ovaisrael mave takavara tjinene nu ave kara nomasa tjinene.
Ove mo tjiwa kutja Farao wa tjita tjike? Eye wa hungira kuna ovakazendu mbaave vatere ovakazendu wOvaisrael okupanduka ounatje na tja: ‘Okanatje okazandu akehe ku make pandukwa ke zepeye.’ Nungwari ovakazendu mba va ri ovawa nu kave zepere ounatje.
Kunao Farao wa yandjere omaraerero kovandu ve avehe a tja: ‘Tooreye ounatje auhe wOvaisrael ouzandu nu mu zepe. Nungwari tji u ri oukazona weseye u hupe.’ Ihi katja ri otjiṋa otjivi navi okuzikamisa? Indjo tu tare kutja kemwe kounatje ouzandu mbwi ka yamwa vi.