EHUNGI 80
Otjiwaṋa tjaMukuru matji piti mu Babilon
PA KAPITA ozombura ngahino mbari kombunda yaBabilon tji tja huurirwe i Ovamedi nOvapersi. Tara ku imbi mbi mavi tjitwa nambano! Ovaisrael mave piti mu Babilon. Owo va kuturwa vi? Nu owaṋi ngwe ve yandjera okuyenda?
Kirus, ombara yaPersi ongwe ve yandjera. Oruveze orure ngunda Kirus ee hiya kwatwa Jehova wa tjita kutja omuprofete we Jesaja ma tjange ohunga na ye kutja: ‘Ove mo tjiti imbi ami mbi me vanga kutja u tjite. Omivero mavi isiwa kamwaha kokutja ove u huure otjihuro.’ Nu Kirus ongwa hongorera Israel indu tji va huura Babilon. Ovamedi nOvapersi va hita ouṱuku mu Babilon. Oruveze ndo omivero vyotjihuro vya isirwe kamwaha.
Nungwari omuprofete waJehova, Jesaja, wa tja Kirus ma yandja erakiza rokutja Jerusalem nondembeli yatjo i tungwe rukwao. Kirus wa yandja erakiza ndi? Ii, wa tjita nao. Imbi Kirus ombya raera kOvaisrael: ‘Twendeye, nambano, ku Jerusalem nu mu katunge ondembeli yaJehova, Mukuru weṋu.’ Nu Ovaisrael ombi ve ri mondjira okukatjita nai, otja tji mo munu mba.
Nungwari ka Vaisrael avehe mbaave yenene okutoora ouyenda oure mbwi okuyaruka ku Jerusalem. Owo ouyenda oure wozokilometa ape 800 nu ovandu ovengi va kurupire tjinene poo va verere tjinene okukayenda ouyenda oure mbu ṱa mbo. Nu pa ri nomapu yarwe wina nga tjita kutja ovandu tjiva ave ha i. Nungwari Kirus wa raera ku imba mbe hi nokuyenda na tja: ‘Yandjeye ovisilveri novingoldo noviyandjewa vyarwe kovandu imba mbu mave yaruka okukatungurura Jerusalem nondembeli yatjo.’
Okutja oviyandjewa ovingi vya yandjewa kOvaisrael mba mbe ri mondjira okuyenda ku Jerusalem. Kirus wina we ve pa oviyaha novinwino imbi ombara Nebukadnesar mbya toora mondembeli yaJehova indu eye tja yandeka Jerusalem. Otjiwaṋa tja ri noviṋa ovingi okutwaerera.
Kombunda yomieze ngahino vine vyouyenda, Ovaisrael va vaza mu Jerusalem poruveze ndu ri ro. Ozo za ri ozombura 70 okuza ku indu otjihuro tji tja yandekwa, nehi ra isiwa nokuhinovandu kaparukaze. Nandarire kutja Ovaisrael nambano va kotoka kehi rawo, owo mave kara notuveze otuzeu, otja tji matu kamuna.
Jesaja 44:28; 45:1-4; Esra 1:1-11.