EHUNGI 102
Jesus wa penduka movakoke
OVE mo tjiwa kutja omukazendu novarumendu vevari mba oowaṋi? Omukazendu oMaria Magdalena, epanga raJesus. Novarumendu mba hwikike ozombanda ozombapa ovaengeli. Okatuwo okaṱiṱi nga Maria mu ma tara, oruveze mu mwa twirwe orutu rwaJesus tja za nokuṱa. Oro ru isanewa kutja eyendo. Nungwari nai orutu karumo! Ouṋe ngwe ru toora? Indjeye tu tare.
Kombunda yaJesus tja ṱa, ovapristeri va raera ku Pilatus nave tja: ‘Indu Jesus tja ri nomuinyo eye wa tja ma pendurwa kombunda yomayuva yetatu. Okutja rakiza kutja eyendo ri tjeverwe. Okutja ovahongewa ve kamaave kavaka indwi orutu nave raere ovandu kutja eye wa pendurwa movakoke!’ Pilatus wa raera ovapristeri ve hinde ovarwe vovita ve katjevere eyendo.
Nungwari rukuru tjinene meyuva oritjatatu Jesus tja za nokuṱa, omuengeli waJehova tjimanga we ya. Eye wa isako ewe keyendo. Ovarwe vovita va urumine tjinene ngandu ndi tji ve ha sorere okunyinganyinga. Korusenina owo tji va katara meyendo, orutu ka mu rwa ri! Ovarwe tjiva va ya motjihuro nave karaera ovapristeri. Ove mo tjiwa kutja ovapristeri ovavi mba va tjita tjike? Owo va suta ovarwe vovita mba kutja ve kore ovizeze. Ovapristeri va raera kovarwe vovita nave tja: ‘Eṋe mamu sokutja ovahongewa ve ve ya ouṱuku, eṱe ngunda atwa rara, nave vaka orutu.’
Moruveze otjingero, ovakazendu tjiva omapanga waJesus ve yekutara eyendo. Owo va kuminwe tjinene okuvaza eyendo ari ri uriri! Tjimanga ovaengeli vevari mba zarere ozombanda ozondjere ve rimunikisa ku wo. Owo va pura nave tja: ‘Omena ratjike tji mamu paha Jesus imba? Eye wa pendurwa. Twendeye tjimanga nu karaereye ovahongewa ve.’ Ovakazendu tjiri va tupuka tjimanga! Nungwari mondjira omurumendu worive we ve tjaera. Ove mo tjiwa kutja eye wa ri uṋe? Eye wa ri Jesus! Okutja Jesus arire tja tja ku wo: ‘Twendeye karaereye ovahongewa vandje.’
Indu ovakazendu tji va raera ovahongewa kutja Jesus u nomuinyo nokutja ve mu munu, ovahongewa kaave kambura. Petrus na Johanes va tupuka keyendo okukatara oveni, nungwari meyendo mwa ri tjo! Indu Petrus na Johanes tji va ya, Maria Magdalena wa sewa kongotwe. Oruveze ndo eye otja tara meyendo na munu ovaengeli vevari.
Ove mo tjiwa kutja orutu rwaJesus rwa tjitwa vi? Mukuru wa tjita kutja ru zenge. Mukuru kena pa pendura Jesus morutu rwonyama eye ndwa ri naro indu tja ṱa. Eye wa yandja orutu orupe rwombepo ku Jesus, tjimuna ovaengeli meyuru ndu ve naro. Nungwari okuraisira ovahongewa ve kutja eye u nomuinyo, Jesus we rihwikika orutu morupe rwokutja ovandu ve mune, otja tji matu kamuna.
Mateus 27:62-66; 28:1-15; Lukas 24:1-12; Johanes 20:1-12.