Jesus Kristus Eye Owaṋi? — O-Watchtower LIBRARY MORUNGOVI

Ehongwa 3

Jesus Kristus Eye Owaṋi?

Omena ratjike Jesus tje isanewa Omuna “omukwatwaerike” waMukuru? (1)

Omena ratjike eye tje isanewa “Embo”? (1)

Omena ratjike Jesus tjeya kombanda yehi otjomundu? (2-4)

Omena ratjike eye tjaa tjiti ovihimise? (5)

Jesus ma tjiti tjike moruyaveze ropopezu? (6)

1. Jesus wa turire meyuru otja omundu wombepo ngunda ee hiyeya kombanda yehi. Eye wa ri otjiutwa tjaMukuru otjitenga, ku nai eye ope isanewa Omuna “omukwatwaerike” waMukuru. (Ovakolose 1:15; Omavandururiro 3:14, EEP) Jesus eye erike ongu ri Omuna, Mukuru ngwa mema omuini. Jehova wa ungurisa omundu omutenga Jesus otja ‘omuungure we onongo’ mokumema oviṋa imbi ovyarwe avihe meyuru na kombanda yehi. (Omiano 8:22-31; Ovakolose 1:16, 17, EEP) Mukuru wina we mu ungurisa otja omuhingirire po We ohongora. Mena ra nao Jesus u isanewa “Embo.”—Johanes 1:1-3; Omavandururiro 19:13, EEP.

2. Mukuru wa hinda Omuna We kombanda yehi mokutanaurira omuinyo we morukutu rwaMaria. Ku nai, Jesus ke na pa ri na ihe womundu. Mena ranao, eye ope ha rumatere ourunde poo ouhahomonena. Mukuru wa hinda Jesus kombanda yehi mena romapu yetatu: (1) Okutuhonga ouatjiri ohunga na Mukuru (Johanes 18:37), (2) okukakatera kousemba ohomonena, mokuyandja otjihorera kweṱe okukongorera (1 Petrus 2:21, EEP), (3) nokupunguha omuinyo we okutukutura kourunde nonḓiro. Omena ratjike imbi tji vya ri ohepero?—Mateus 20:28.

3. Mokuhinokuyandja ombakatwi kerakiza raMukuru, omundu omutenga, Adam, wa tjita imbi Ombeibela mbi mai isana kutja “ourunde.” Ku nai, Mukuru we mu pangura kokuṱa. (Genesis 3:17-19) Eye kaa yenene rukwao okuvaza pozondondo zaMukuru, ku nai ke na pa ri ohomonena rukwao. Kaṱiṱiṱiṱi aa yende ama kurupa, na koka. Adam wa rumatisa ourunde kovanatje ve avehe. Mena ranao otji tu kurupa, atu vere natu koka. Ovandu atja ve yamwa vi?—Ovaroma 3:23; 5:12, EEP.

4. Jesus wa ri omundu ohomonena tjimuna Adam. Komuano mbu he ri tjimuna imbo waAdam, Jesus wa ri nonḓuviro ohomonena ku Mukuru nandarire kehi yomarorero omanenenene. Momuano mbwi otja yenenene okupunguha omuinyo we ohomonena woundu, okusuta ourunde waAdam. Ihi Ombeibela otji mai urike otja “otjisuta tjonguturiro.” Ovanatje vaAdam motjimbe tjanao otji mave yenene okukuturwa komanakauriro wawo konḓiro. Avehe mbe nongamburiro mu Jesus mave yenene okuisirwa ourunde wawo nave pewa omuinyo waaruhe.—1 Timoteus 2:5, 6, EEP; Johanes 3:16, EEP; Ovaroma 5:18, 19.

5. Indu tja ri kombanda yehi Jesus wa verukisa ovavere, a risa ovanandjara na mwinisa ovivepo. Nandarire ovaṱi eye wa pendura. Omena ratjike eye tja tjita ovihimise? (1) Eye wa ṱondjenda novandu mbaave munu ouzeu, nu eye aa vanga okuvevatera. (2) Ovihimise vye vya zikamisa kutja eye wa ri Omuna waMukuru. (3) Ovyo aavi raisa kutja eye ma tjiti tjike kovandu ovananḓuviro indu eye tji ma honapara Otjombara kombanda yehi.—Mateus 14:14; Markus 2:10-12, EEP; Johanes 5:28, 29.

6. Jesus wa ṱa na pendurwa i Mukuru otja otjiutwa tjombepo neye waaruka keyuru. (1 Petrus 3:18, EEP) Kombunda yanao, Mukuru we mu ririsa Ombara. Kamanga, Jesus ma isa po omauhangundu nomauzeu aehe kombanda yehi indi.—Epsalme 37:9-11; Omiano 2:21, 22.

[Oviperendero pomukuma 7]

Omazuvarisiro waJesus ya ri okuhonga, okutjita ovihimise nandarire nokuyandja omuinyo we mena retu