Omundu ngwa kondwa kombongo matu sokumutjinda vi?

Tjiri otjiṋa otjihihamise tjinene indu omuzamumwe na eṱe poo epanga retu ropopezu tji ra kondwa kombongo mena rokuhina okuritanaura kourunde mbwa tjita. Omuano mbu matu toorere ko omikambo komirari vyOmbeibela ohunga nepu ndi ombu mau raisa kutja twa suvera Jehova pu pe ṱa pi nokutja tu nouṱakame mu ye tjiri poo indee.a Ngatu tare komapuriro tjiva nge kara po ohunga nepu ndi.

Omundu ngwa kondwa kombongo matu sokumutjinda vi? Ombeibela mai tja: “Amu ha wana nomundu ngu ritja eye omukambure omukweṋu, nungwari ngu tjita oruvakiro poo ongopo poo ngu rikotamena koomukuru vovisenginina poo omuyamburure poo ngwa ṱomeva wamururu poo erunga. Nu amu roro nangarire ingwi okurya ovikurya puna omundu ngu ri nai.” (1 Ovakorinte 5:11) Ohunga nomundu auhe ngu “ha ṱakamisa omahongero waKristus,” eṱe matu lese nai: “Amu mu sekirisa mozoyeṋu; nu wina amu roro nangarire ingwi okumuminika; orondu auhe ngu me mu minike ma kara norupa mourunde eye mbu ma tjiti.” (2 Johanes 9-11) Okutja katu sokukara noupanga nomundu ngo poo nandarire okuhungira ohunga noviṋa mbi mavi tjama nEmbo raMukuru ku nomundu ngwa kondwa kombongo. Okambo nga The Watchtower komayuva 15 ku Septemba 1981, pomukuma 25, make tja: “Okuposa ‘omoro’ komundu mape ya aku rire omukambo omutenga wokuuta ehungi poo nandarire oupanga ku nomundu ngo. Mape ya tjiri atu vanga okutoora omukambo omutenga mbwo wokuhungirisa omundu ngwa kondwa kombongo?”

Tjiri ohepero okuteya oupanga ku nomundu ngo? Ii tjinene, mena romapu tjiva nga. Epu etenga, okuteya oupanga mbwo ku raisa ouṱakame ku Mukuru nEmbo re. Eṱe katu vanga okukara nonḓuviro ku Jehova tje ri oupupu okutjita nao uriri, nungwari nandarire kutja ouzeu okutjita nao. Tji twa suvera Mukuru tjiri, orusuvero ndwo maru tu hingi kutja tu kare nonḓuviro komatwako we aehe, amatu tjiwa kutja eye omunausemba nomunarusuvero nokutja omatwako we ye tu etera ouwa ouingi. (Jesaja 48:17; 1 Johanes 5:3) Epu oritjavari, tji twe riṱizire kokure nomundu ngwa kondwa kombongo matu ritjevere oveni novakwetu varwe mombongo kongaro ombi ndji mape ya ai zunḓa oupanga wawo na Mukuru, nu matji ṱiza ena ewa rombongo. (1 Ovakorinte 5:6, 7) Epu oritjatatu, ongurameno yetu komirari vyOmbeibela mape ya ai vatere omundu ngwa kondwa kombongo ngo. Eṱe tji twa yandja oruvara kovanene vombongo mba toora ondando ndjo, mape ya atji ṱunu komutima womundu ngo ngu hina wa puratena kozongondjero zovanene vombongo zokumuvatera. Eye tja pandjara oupanga we novandu mba suvera mape ya atji mu vatere kutja ma kotore ‘ourizemburuka’ we nu ma mune kutja eye tjiri wa tjita ourunde nu u sokutoora omikambo vyokukotoka ku Jehova.—Lukas 15:17.

Indu omundu ngwa kondwa kombongo tje ri omuzamumwe wetu ngatu mu tjinde vi? Mozongaro otja inḓo oupanga omundu ngo mbwa ri na wo ku noveṱunḓu re mape ya au tjiti kutja ma rire ouzeu ku wo okuṱakama ku Jehova. Matu sokutjinda vi omuzamumwe na eṱe ngwa kondwa kombongo? Katu nakuyenena okuṱuna kozongaro azehe nḓe kara po ohunga nepu ndi, nungwari matu ṱunu ku mbari uriri.

Mozongaro tjiva omundu ngwa kondwa kombongo mape ya kutja u kara mondjuwo imwe neṱunḓu re. Okukondwa kombongo kaku teya ouzamumwe womundu ngo ku noveṱunḓu re, okutja ovitjitwa vyeṱunḓu vyeyuva arihe nomaunguriro wakumwe mavi yenene okukayenda komurungu. Posi yokutja movitjitwa vye omundu ngo wa toorora okuteya oupanga neṱunḓu re ndi karera Jehova. Okutja ovazamumwe na ye ovaṱakame ku Jehova kamaave kara noupanga mbu mau tjama noviungura vyaJehova ku nomundu ngwa kondwa kombongo. Okutara kotjihorera, indu ingwi ngwa kondwa kombongo tje ri po, eye kamaa sokukara norupa indu oveṱunḓu re tji mave konḓonona Ombeibela pamwe otjeṱunḓu. Nungwari ingwi ngwa kondwa kombongo tje ri omuatje omuṱiṱi, ovanene ve ve nomerizirira wokumuhonga nokumuvyura. Okutja ovanene mbe norusuvero mave yenene okutwapo oruveze rwokukonḓonona Ombeibela pu nomuatje wawo.b—Omiano 6:20-22; 29:17.

Mozongaro zarwe, omundu ngwa kondwa kombongo mape ya kutja ka kara ponganda imwe noveṱunḓu re. Nu nandarire kutja potuveze tjiva mape ya arire ohepero okuhungira kumwe mena rovitjitwa vyorive vyeṱunḓu, ehungi ndo kari sokukapitirira. Ovakriste ovaṱakame kamaave paha omuano wokuhungira poo okuhakaena ku nomuzamumwe wawo ngwa kondwa kombongo nu ngu ve ha kara pamwe. Nungwari, ouṱakame wawo ku Jehova na kotjira tje mau ve hingi kutja ve ṱakamise omirari mbi ri mOmatjangwa ohunga nomakondero kombongo. Ouṱakame wawo mau raisa kutja owo ve rikendera ku ye nu mape ya au mu vatere okutoorera ko omikambo komavyuriro nga muna.c—Ovaheberi 12:11.