EHONGWA 3

Ouatjiri wOmbeibela mbwa pandjarere wa vandururwa vi?

Ovakonḓonone vOmbeibela mozombura nḓa 1870

Omurumendu ngu ma lese okambo okatenga nga The Watchtower — Okambo nga *The Watchtower* okatengatenga kombura 1879

Omukazendu ngwa handa oumbo mbwi Oruhungu no Awake! — Okambo nga *The Watchtower* ndino

Ombeibela ya kwizika kutja kombunda yonḓiro yaKristus, ovaprofete vovizeze mave ya mokati kOvakriste ovakuru nave zunḓa ouatjiri wOmbeibela. (Oviungura 20:29, 30) Nu korusenina, ihi otji tja tjitwa. Owo va runga omahongero waJesus ku noumune wovanavisenginina, nu ihi tja zikamisa ongamburiro yoposyo. (2 Timoteus 4:3, 4) Eṱe ndino matu yenene okutjiwa vi kutja tu nondjiviro ombwa yaimbi Ombeibela mbi i honga tjiri?

Oruveze rwe ya ku Jehova okuvandurura ouatjiri. Eye wa kwizika kutja momaandero wouye ‘imba mbe ri ozonongo porwawo ombu mave zuu’ ondjiviro youatjiri. (Daniel 12:9, 10) Mombura 1870 okambumba okaṱiṱi kovandu mbaave paha ouatjiri, va muna kutja omahongero omengi wozokereka, kaye zire mOmatjangwa. Okutja owo otji va uta okupaha ondjiviro yomahongero oyeniyeni yOmbeibela, nu Jehova we ve vatera okumuna ondjiviro ndjo.

Ovarumendu mbaave vanga okutjiwa ouatjiri va konḓonona Ombeibela. Ovahongwa vOmbeibela mba ri nonḓero mbo, mbe tu tengera po motjiungura hi, va ungurisa omuano womakonḓononeno eṱe ndino ngu tu ungurisa nga mba. Owo aave hungire ohunga nOmbeibela okuza kepu nga kepu. Tji ve ya korupa rwOmbeibela oruzeu okuzuva, owo aave paha omatjangwa warwe ngu maye kahurura epu ndo. Nu tji va munu kutja omatjangwa ngo maye hitasana, owo ave tjanga oviṋa mbi. Mokuyandjera kutja Ombeibela i rikahurure oini, owo va muna ouatjiri ohunga nena raMukuru nOuhona we, ondando ye kovandu nehi, ongaro yovaṱi, nomaundjiro wombendukiro. Omakonḓononeno wawo nga ye ve kutura komahongero novitjitwa ovingi vyoposyo.—Johanes 8:31, 32.

Mombura ndji 1879 Ovakonḓonone vOmbeibela mba, va muna kutja oruveze rwa tumbuka ku wo okutjiukisa ouatjiri kovandu avehe. Okutja mombura ndjo, otji va uta okupitisa okambo nga The Watchtower Announcing Jehovah’s Kingdom ku ke pita nga ku ndino. Eṱe nai tu hungira ku novandu varwe ohunga nouatjiri wOmbeibela momahi 240 na momaraka wokombanda 750. Tjiri ouatjiri kau na pu wa rora okutakavara pu pe ṱa mba!

Kombunda yonḓiro yaKristus pa tjitwa tjike kouatjiri wOmbeibela?
Otjikeṋa tji tje tu vatera okuvandurura ouatjiri wOmbeibela mbwa pandjarere?