Ovikeṋa mbi mo kamuna nokuzuva pozombongarero zetu zombongo?

Ovandu ovengi kave i kokereka rukwao orondu kave munu omahuhumiṋino poo omaziriro komapuriro omananḓengu tjinene mehupo. Nu omena ratjike ove tji mo sokuyenda kozombongarero zombongo zOvahongonone vaJehova? Otjikeṋa tji mo kamuna ngo?

Mo kamuna ondjoroka yokukara mokati kovandu mbe norusuvero nu mbe rikenderasana. Meserewondo etenga, Ovakriste aave wongara pamwe mozombongo, nu aave kara nozombongarero zokurikotamena ku Mukuru, okukonḓonona Omatjangwa, nokuyanḓiparisasana. (Ovaheberi 10:24, 25) Owo aave hakaene mombepo ombwa yorusuvero, aave munu kutja ve ri mokati komapanga watjiri, ovaṱena nomarumbi wawo. (2 Ovatesalonika 1:3; 3 Johanes 14) Eṱe tu kongorera otjihorera tjOvakriste ovakuru mba nu tu muna ondjoroka tjingeyo.

Mo kamuna ouwa mbu za mokurihonga okuungurisa omirari vyOmbeibela. Otja ovakarere vaJehova tjaave tjiti rukuru, ovarumendu novakazendu novanatje ndino wina ve worongana pamwe. Imba mba pwira otjiungura tjokuhonga ve tu vatera nOmbeibela okutjiwa kutja matu yenene vi okuhupa otja komirari vyayo. (Deuteronomium 31:12; Nehemia 8:8) Avehe mbe ri po mave yenene okukara norupa mokuzira nokuimbura, nu ihi tji tu pa oruveze rwokuraisa omaundjiro wetu otjOvakriste.​—Ovaheberi 10:23.

Okukara pozombongarero zombongo, maku kurisa ongamburiro yoye mu Mukuru. Omuapostele Paulus wa tjanga kombongo yOvaroma na tja: “Ami me zeri okumumuna tjinene kokutja, . . . atuhe pamwe tu vaterasane mongamburiro, ami mbi vaterwe i ongamburiro yeṋu, neṋe mu vaterwe i ongamburiro yandje.” (Ovaroma 1:11, 12) Okukara pu novakambure ovakwetu pozombongarero zombongo, ku tu vatera okukurisa ongamburiro yetu nokutja tu kayende komurungu okuhupa otja komirari vyOmbeibela.

Omena ratjike tji u hi nakuyakura omaṋangero wokuyenda kombongarero yetu yombongo u kerimunine omuini oviṋa mbi? Ove mo kayakurwa tjinene. Ozombongarero zetu azehe otjari, nu kape wongwa ovimariva.

• Ozombongarero zetu zombongo za zikamena kotjihorera tjiṋe?

• Omomiano viṋe mu matu munu ouwa tji twa kara pozombongarero zombongo?