EHONGWA 10

POmakonḓononeno wEṱunḓu pe tjitwa tjike?

Eṱunḓu ma ri yorokere omakonḓononeno wawo wOmbeibela — South Korea

Ovakupasane mave konḓonona Ombeibela pamwe — Brazil

Umwe wOvahongonone va Jehova ma konḓonona Ombeibela — Australia

Eṱunḓu ndi mari hungirire kepu rOmbeibela — Guinea

Okuza korukuru, Jehova u vanga kutja omaṱunḓu ye kare noruveze pamwe kutja ve tunge oupanga wawo na ye nokutunga oupanga wawo oveni otjeṱunḓu. (Deuteronomium 6:6, 7) Mena ranao, Ovahongonone vaJehova opu va zikamisira oruveze motjivike atjihe kutja omaṱunḓu ye rikotamene pamwe ku Jehova, amave hungirire koviṋa mbi mavi tjama noupanga wawo na Jehova nu ve hungirire koviṋa mbi mavi ṱunu ku wo. Nandarire kutja u kara erike, ove mo yenene okuungurisa oruveze ndwi okurihonga ohunga na Mukuru mokukonḓonona orupa rwOmbeibela ndu mo vanga.

Indwi oruveze rwokutumbuka popezu na Jehova. “Tumbukeye ku Ndjambi, nEye ma tumbuka ku eṋe.” (Jakobus 4:8) Matu yenene okutjiwa Jehova nawa indu tji twe rihongo ohunga novikaṋena novitjitwa vye mbi ri mEmbo re, Ombeibela. Omuano omupupu wokuuta omerikotameneno weṱunḓu, okulesa Ombeibela pamwe, ngahino amatu kongorere oprograma yotjivike atjihe yombongarero yEhupo retu rOukriste notjiungura tjetu tjokuzuvarisa. Okarupa kokulesewa make yenene okuyandjwa kokaṋepo akehe meṱunḓu nu okuzambo avehe ave hungirire koviṋa mbi ve rihongo mOmatjangwa.

Indwi oruveze rwokutumbuka popezu neṱunḓu roye. Ovarumendu novakazendu, novanene, novanatje ve kurisa oupanga wawo ku nouṋepo auhe meṱunḓu indu tji mave konḓonona pamwe Ombeibela otjeṱunḓu. Indwi maru sokurira oruveze rwohange nondjoroka ovandu avehe meṱunḓu ndu mave sokuzera okukara po otjivike atjihe. Ovanene mave sokutara kozombura zovanatje vawo okuzambo ave toorora omapu okuhungirira ko ngu maye yenene okuvevatera, ngahino mokuungurisa omapu okuza moumbo mbwi Oruhungu no-Awake! poo okuza morungovi rwetu ndwi jw.org. Mamu yenene okuhungirira kouzeu ovanatje veṋu mbu va ri na wo koskole namu ve vatere okutjiwa kutja mave sokutjita vi. Ongwaye tji mu hi nokutarera pamwe oprograma mo-JW Broadcasting (tv.jw.org) okuzambo mu hungirire ko? Wina mamu yenene okurihonga omaimburiro ngu maye kaimburwa pombongarero yombongo namu kara nouṋa okurya kombunda yomerikotameneno weṋu.

Oruveze rwapeke ndwi omaṱunḓu ndu ye ungurisa okurikotamena ku Jehova, ru vatera avehe meṱunḓu okumuna ondjoroka mEmbo raMukuru, neye me ve sere ondaya kozongondjero zawo.—Epsalme 1:1-3.

Ongwaye tji tu ritoororera oruveze rwokukara nomerikotameneno weṱunḓu?
Ovanene mave yenene vi okutjita kutja omerikotameneno weṱunḓu ye ete ondjoroka ku avehe meṱunḓu?