Ovavatere vombongo ve notjiungura tjaye mombongo?

Ombeibela i hungira ohunga novimbumba vivari vyovarumendu mbe tjevera ombongo, ‘ovatarere vombongo’ “novakarere vombongo,” poo ovavatere. (Ovafilipi 1:1, EEP) Popengi pe kara ovanene novavatere vombongo ovengi mombongo aihe. Ovavatere vombongo ve ungura tjike mombongo?

Ve vatera orutu rwovanene vombongo. Ovavatere vombongo ve noupanga oupame kuna Jehova, ovaṱakame, nowo ovarumendu mbe ungura oviungura vyawo nawa, tjiva omitanda nu varwe ovanene mozombura. Owo tjinene ve ungura oviungura ovinanḓengu mbi notjiṋa nombongo nEtuwo rOmerikotameneno, nu mbi he ri vyokuhonga poo okurisa. Ihi tji vatera ovanene vombongo kutja ve yandje ombango kotjiungura tjokuhonga nokurisa ozonḓu zaJehova.

Owo ve yandja ombatero. Ovavatere tjiva vombongo va pewa otjiungura tjokuyakura ovayenda avehe mbu mave ya kozombongarero zombongo. Varwe ve notjiungura tjokuṱuna ozombako nomaimburiro, okuhavarisa omambo, okuvara ovimariva, nokuyandja otuveze ku maku kazuvarisirwa. Owo wina ve vatera okuṱuna Etuwo rOmerikotameneno. Ovanene vombongo mape ya ave ve ningire okuvatera ovakurundu mombongo. Kainatja kutja ovavatere vombongo va pewa oviungura vyaye, indu owo tji ve nonḓero yokuviyenenisa, ihi matji tjiti kutja varwe mombongo ve ve pe ondengero.​—1 Timoteus 3:13.

Owo ve yandja otjihorera otjiwa otjovarumendu Ovakriste. Ovavatere vombongo ve toororerwa kovikaṋena vyawo oviwa vyOukriste. Indu owo tji ve norupa mombongarero yombongo, owo ve yanḓiparisa ongamburiro yetu. Owo tji mave yandja otjihorera otjiwa moviungura vyokuzuvarisa ve pendura ombepo yetu. Nu mena rokutja owo ve ungura nawa ku novanene vombongo, owo ve tunduuza ombepo yoruwano nondjoroka. (Ovaefese 4:16) Kombunda owo wina mape ya ave pwire okukarera otjovanene vombongo.

• Ovavatere vombongo ovandu mbe ri vi?

• Ovavatere vombongo ve vatera vi kutja ombongo i kayende nawa?