Matu yenene vi okumuna ombatero metuwo romambo ndi ri pEtuwo retu rOmerikotameneno?

Ove mo vanga okutjita omakonḓononeno kutja u kurise ondjiviro yoye yOmbeibela? U netjangwa poo omundu poo oruveze poo otjiṋa tji tja tamunwa mOmbeibela tjotjo vanga okukonḓonona? Poo wa rora okuripura kutja Embo raMukuru mape ya ari ku vatere nouzeu mbu u na wo? Tji pe ri nao, twende ketuwo romambo ndi ri pEtuwo rOmerikotameneno.

Etuwo ndi ri noviungurisiwa mbi mavi yenene okukuvatera. Mape ya kutja ko nomambo aehe wOvahongonone vaJehova meraka roye. Nungwari etuwo romambo ndi ri pEtuwo rOmerikotameneno ri nomambo omengi nga pitisiwa oupe. Metuwo ndo wina mu nozOmbeibela pekepeke, embo romambo ewa, na vyarwe mbi mavi yenene okukuvatera momakonḓononeno woye. Ove mo yenene okuungurisa etuwo ndi komurungu na kombunda yombongarero yombongo. Tji mu nokombiuta, mape ya ai kara noprograma ndji isanewa Watchtower Library. Indji oprograma ndja tuwa mokombiuta ndji nomambo wetu omengi nomuano omupupu wokupaha omapu, poo embo, poo etjangwa ndi mo vanga okukonḓonona.

Etuwo ndi ri vatera imba mbe yandja omahungi mombongarero yEhupo retu rOukriste notjiungura tjetu tjokuzuvarisa. Ove mo yenene okuungurisa etuwo romambo ndi ri pEtuwo rOmerikotameneno indu tji mo rirongerisire ehungi ndi wa pewa. Omutarere wombongarero yEhupo retu rOukriste notjiungura tjetu tjokuzuvarisa ongu nousemba netuwo ndi. Eye u nomerizirira wokutjita kutja omambo aehe omape ye kare metuwo romambo ndi nokutja ye kare mongaro ombwa. Pura ku ye poo komundu ngu mu rihonga pamwe me ku raisire kutja mo yenene okumuna vi ondjiviro ndji mo paha. Posi yokutja, omambo nge ri ouini wetuwo romambo ndi kaye sokupitisiwa mEtuwo rOmerikotameneno. Nu omambo ngo matu sokuyetjinda ouhirona nu katu sokutjanga mo.

Ombeibela mai kahurura kutja tji matu vanga “okukara nondjiviro yaNdjambi,” matu sokuipaha tjimuna tja tja tu paha “otjihuze tjorive tji tja horekwa.” (Omiano 2:1-5) Etuwo romambo ndi ri pEtuwo rOmerikotameneno mari ku vatere okuuta okupaha ondjiviro ndjo.

• MEtuwo rOmerikotameneno mu noviungurisiwa viṋe mbi tu vatera nomakonḓononeno?

• Ouṋe ngu ma yenene okukuvatera okuungurisa oviungurisiwa mbi ri metuwo romambo?