Ekondwa 16
Omuano Ove Mbu Mo Yenene Okutumbuka Ku Mukuru
1. Omasaneno yeṋe nge ri ohongonona mozongamburiro ozengi?
OMURYANGE ngwa ryangera ehi rokOmuhuka, wa temisiwa i omaungurisiro wongamburiro nga muna pondembeli yOvabuddha. Nandarire kutja ovisanekero kavya ri imbi ovyaMaria poo Kristus, inga omaungurisiro omengi ya sanene ku inga owokereka ye mehi re ka za. Otjotjihorera, eye wa muna omaungurisiro tjimuna woundjendje nokuimbura ozongumbiro. Varwe wina va tjita omasasanekero otja inga. KOmuhuka poo kOngurova, omihingo ovakongorere mu ve kondjisa okutumbuka navyo ku Mukuru poo koviṋa mbi ve ungurisa momerikotameno wawo mombuniko vya sana.
2. Ongumbiro ya handjuṋunwa vi, nomena ratjike ovandu ovengi tji ve kumba?
2 Ovengi tjinenenene ve kondjisa okutumbuka ku Mukuru mokukumba ku ye. Ongumbiro ya handjuṋunwa otja “ondjito yomahungiriro yakumwe yomundu kuna otjiyapuke—Mukuru, oomukuru, omaturiro wokombanda poo omasa wokombandohapo.” (The New Encyclopædia Britannica) Posi yokutja, tji mave ya ku Mukuru mongumbiro, tjiva ve ripura motjimbe tja imbi mbi mave munu mo uriri. Otjotjihorera, omurumendu rive otjikando tjimwe wa pura umwe wOvahongonone vaJehova: “Indu ove tji we ndji kumbire, omaputi meṱunḓu randje, poviungura, nouveruke wandje maye manguṋunwa?” Ngahino omurumendu ee ripura nao, nungwari ovengi ve kumba nu ve muna kutja omaputi yawo ye panḓipara. Ku nai, eṱe matu yenene okupura: ‘Tjiri, omena ratjike tji twa sokutumbuka ku Mukuru?’
OMENA RATJIKE TJI TWA SOKUTUMBUKA KU MUKURU
3. Ozongumbiro zetu za sokuhungamisiwa ku uṋe, nomena ratjike?
3 Ongumbiro kamaungurisiro yakauriri, nu wina kamuano wokumunina mo otjiṋa uriri. Epu ehongore rokuya ku Mukuru, okukara norupe ropopezu kuna ye. Ozongumbiro zetu ku nai, za sokuhungamisiwa ku Jehova Mukuru. “Jehova u ri popezu na avehe, mbe isana ku je,” omutjange womapsalme David otja hungira. (Epsalme 145:18, EEP) Jehova u tu ṋanga kutja tu ye morupe rohange kuna ye. (Jesaja 1:18) Imba mbe zira komaṋangero nga, ve itavera komutjange womapsalme ngwa tja: “Nu ku ami okokuwa okukara popezu na [Mukuru, EEP].” Omena ratjike? Mena rokutja imba mbu mave tumbuka ku Jehova Mukuru mave yorokere ouṋingandu uatjiri nohange mouripura.—Epsalme 73:28.
4, 5. (a) Omena ratjike tji ku ri okunanḓengu okukumba ku Mukuru? (b) Orupe ruṋe ndu matu yenene okutunga kuna Mukuru okupitira mongumbiro?
4 Omena ratjike tji twa sokukumba ku Mukuru kombatero indu ‘eye tji ma tjiwa mbi matu hepa ngunda atu hi ye mu pura’? (Mateus 6:8; Epsalme 139:4) Ongumbiro i raisa kutja tu nongamburiro mu Mukuru nu tu noumune we otja Omburo ‘yotjiyandjewa atjihe otjiwa, notjipewa atjihe otjipwe.’ (Jakobus 1:17; Ovaheberi 11:6) Jehova u muna onyuṋe mozongumbiro zetu. (Omiano 15:8) Eye u tjaterwa okuzuva omambo womaheyero wetu wokuyandja onḓengu nondangero, otja ihe tje yoroka tjima zuu omuatje we omuṱiṱi tji ma hungire omambo omakahu wondangu. (Epsalme 119:108) Imba pu pe na orupe oruwa rwa ihe nomuatje, opo pe kara omahungiriro yakumwe omawa. Omuatje ngwa suverwa u vanga okuhungira kuna ihe. Ihi otjingetjo indu tji twe ya korupe rwetu na Mukuru. Indu tjiri tji tu na ondangu na imbi mbi matu rihongo ohunga na Jehova norusuvero ndwa raisa mena retu, eṱe matu kara nozonḓuma ozonene okurizuvakisa ku ye mongumbiro.—1 Johanes 4:16-18.
5 Indu tji matu ya ku Mukuru wOkombandambanda, eṱe twa sokukara nondengero, nandarire kutja kape nohepero yokurikenda okukapitisa oruveze ohunga nomambo katereteree ngu matu ungurisa. (Ovaheberi 4:16) Aruhe tu nomairo ku Jehova. Nu omaingonaparero yeṋe wokutja matu yenene ‘okutirahi omitima vyetu’ ku Mukuru mongumbiro! (Epsalme 62:9, EEP) Omayandjero wonḓengu ku Jehova ye twara korupe oruwa kuna ye, otja tjimuna indwi orumwe omurumendu omuṱakame Abraham ndwa yorokera otja epanga raMukuru. (Jakobus 2:23) Nungwari mokukumba ku Muhonapare Erike wevaverwa, eṱe twa sokuyenenisa oviundjirwako vyokuya ku ye.
OVIUNDJIRWAKO VYOKUTUMBUKA KU MUKURU
6, 7. Nandarire kutja Mukuru ka undjire ko omasutiro okuzuva ozongumbiro zetu, eye u undjira ko tjike kweṱe tji matu kumbu?
6 Ovimariva mavi hepwa kokuhungama ku Mukuru? Ovandu ovengi ve suta ovahonge oku ve kumbira. Nandarire tjiva ve kambura kutja ozongumbiro zawo mave zuvakwa otja konḓekiro yotjiyandjewa tji mave yandja. Posi yokutja, Embo raMukuru kari na kutja omayandjero wondenda maye undjirwa kweṱe kokuhungama ku Jehova mongumbiro. Oviyandjewa vye vyombepo nomaserero wondaya korupe rwa kuna ye mongumbiro vi ri kamwaha nokuhina otjisuta.—Jesaja 55:1, 2.
7 Nu nai, otjikwaye tji matji undjirwa ko? Ongaro osemba yomutima otjihepwa tjimwe otjinanḓengu. (2 Ekuruhungi 6:29, 30; Omiano 15:11) Momutima wetu twa sokukara nongamburiro mu Jehova Mukuru otja ‘omuzuvire wongumbiro’ nokutja “ma rire omujandje uondjambi ku imba, mbe mu paha.” (Epsalme 65:2; Ovaheberi 11:6, EEP) Eṱe wina twa sokukara nomutima omurisusuparise. (2 Ozombara 22:19; Epsalme 51:17) Mu tjimwe tjovisasanekero vye Jesus Kristus wa raisa iho, indu omusutise wotjitjamurongo omurisusuparise womuungutima mokutumbuka ku Mukuru wa raisa okurira omusemba tjinene okukapita Omufarisei omuritongamise. (Lukas 18:10-14) Otja tji matu hungama ku Mukuru mongumbiro, ngatu zemburuke kutja “Muhona wa tonda omundu auhe ngu ritongamisa.”—Omiano 16:5.
8. Eṱe tji matu zeri kutja Mukuru ma zire ozongumbiro zetu, eṱe twa sokurikohorora kutjike?
8 Eṱe tji tu nonḓero kutja Mukuru ma zire ozongumbiro zetu, eṱe twa sokurikohorora oveni kozondjito zourunde. Indu omuhongewa Jakobus tjaa tunduza varwe okutumbuka ku Mukuru, wa weza: “Rikoheye omake, vanauvi! Rikohororeye omitima, vanatjavivi!” (Jakobus 4:8) Nandarire ovakatuke mave yenene okuya morupe rohange kuna Jehova indu tji va tanauka nave isa ongaro yawo yokuhupa ondenga. (Omiano 28:13) Eṱe kamaa tu yenene okukara nomahungiriro wakumwe na Jehova indu tji matu tjiti ayoo twa kohorora ozondjira zetu. “Orondu Muhona u tjevera ovasemba nu u puratena kozongumbiro zawo; nungwari u pirukira imba mbe tjita ouvi,” Embo raMukuru otji mari tja.—1 Petrus 3:12.
9. Omokupitira mwaṋi tji twa sokuhungama Jehova, nomena ratjike?
9 Ombeibela i twa po: “Kape nomundu omusemba kombanda yehi ngu tjita ouwa porwawo, nu ngu ha tjiti ouvi wina.” (Omuzuvarise 7:20) Motjimbe tja nao, ove mo yenene okupura: ‘Ovi ku nai, tji matu yenene okuhungama Jehova Mukuru?’ Ombeibela mai ziri: “Nungwari ngamwa ngu ma tjiti ouvi, eṱe tu nomuhungirirepo ku Tate. Eye oJesus Kristus, ingwi omusemba.” (1 Johanes 2:1) Nandarire kutja oweṱe ovarunde, eṱe matu yenene okuhungama Mukuru noupupu womahungiriro mokupitira mu Jesus Kristus, ngwa ṱa otja otjisuta tjonguturiro mena retu. (Mateus 20:28, NW) Eye ongu ri omurari auyerike eṱe mu matu yenene okuhungama Jehova Mukuru. (Johanes 14:6) Eṱe katu sokuyakura ombunguhiro yotjisuta tjonguturiro tjaJesus otja otjiṋa tja kauriri tji ma tji vandeke ourunde wetu, natu tjitire wina ourunde. (Ovaheberi 10:26) Posi yokutja, eṱe tji matu roro pu matu yenene okukara kokure nouvi, nu ngunda amatu katuka povikando, eṱe matu yenene okutanauka natu ningire ondjesiro ku Mukuru. Indu tji twe mu hungama nomutima omurisusuparise, eye me tu zuvire.—Lukas 11:4.
OTUVEZE TWOKUHUNGIRA KUNA MUKURU
10. Tji pe ya kongumbiro, eṱe matu yenene vi okuhorera Jesus, nu otuveze tuṋe tjiva tu tu ri po kongumbiro yapeke?
10 Jesus Kristus aa tara korupe rwe na Jehova nonḓengu yokombanda tjinene. Motjimbe tja nai, Jesus wa paha oruveze okuhingira kuna Mukuru mongumbiro yapeke. (Markus 1:35; Lukas 22:40-46) Okokuwa kweṱe okuhorera otjihorera tjaJesus natu kumbu ku Mukuru aruhe. (Ovaroma 12:12) Opo pa pwa okuuta eyuva nomambo yongumbiro, na indu ngunda au hiya rara, eṱe mombwiro matu yenene okuyandja ondangu ku Jehova kovitjitwa vyeyuva. Momakaondjero weyuva, tjita ri rire epu okuya ku Mukuru “aruhe.” (Ovaefese 6:18) Eṱe matu yenene okukumba kumwi momutima wetu, amatu tji wa kutja Jehova me tu zuvire. Mokuhungira peke kuna Mukuru ku tu vatera okuzikamisa orupe rwetu kuna ye, nu okukumba ku Jehova eyuva arihe ku tu vatera okutumbuka ku ye.
11. (a) Omena ratjike omaṱunḓu tji ya sokukumba pamwe? (b) Ku heya tjike indu ove tji wa tja “Amen” komaandero wongumbiro?
11 Jehova wina u puratena kozongumbiro nḓu maze yandjwa ohambwarakaṋa nozongambi zovandu. (1 Ozombara 8:22-53) Eṱe matu yenene okutumbuka ku Mukuru otja eṱunḓu, notjiuru tjonganda ama tji hongora mongumbiro. Ihi tji panḓiparisa ongurameno yeṱunḓu nu Jehova u rira ouatjiri kovanatje indu tji mave zuu kovanene vawo momerisusuparisiro tji mave kumbu ku Mukuru. Pe ri vi, indu rive tji mave kuramene po ongambi mongumbiro, ngahino pombongarero yOvahongonone vaJehova? Indu tji tu ri orupa otjovapuratene, ngatu puratene nombango aihe kokutja komaandero wongumbiro, eṱe nomutima auhe tu yenene okutja “Amen,” ndi heya “Nga pe kare nao.”—1 Ovakorinte 14:16.
OZONGUMBIRO JEHOVA NḒE ZUVA
12. (a) Omena ratjike Mukuru tje ha ziri ozongumbiro tjiva? (b) Omena ratjike tji tu ha sokuripurira kovihepwa vyetu porwe indu tji matu kumbu?
12 Tjiva mave yenene okuripura kutja Mukuru ka zuvire ozongumbiro zawo nandarire kutja owo ve kumba ku ye okutuurungira mu Kristus. Posi yokutja, omuapostele Johanes wa tja: “Eye tjinga ama zuvire ozongumbiro zetu tji matu ningire ngamwa otjiṋa otja kombango ye [Mukuru].” (1 Johanes 5:14) Okutja, ku nai, tu hepa okuningira otja kombango yaMukuru. Mena rokutja eye u nombango momekuriro wetu wa imbi vyombepo, kangamwa atjihe tji matji ṱunu ku imbi vyetu vyombepo otjo epu epwe kongumbiro. Eṱe twa sokupirukira omarorero wokuripura tjinenenene kovihepwa vyorutu. Tjimuna, ngunda a ku ri osemba okukumbira ounongo nomasa womasorero okutuurunga omutjise, ozongendo ohunga nouveruke kaze sokukutjira ovihepwa vyetu vyombepo. (Epsalme 41:1-3) Tjaza nokumuna kutja eye wa ri nongendo tjinene okukapitisa oruveze ohunga nouveruke we, omukazendu umwe Omukriste wa ningira Jehova ombatero kokukara noumune ousemba ohunga nouvere we. Otjotjikongorereko, omaputi wouveruke we ya rira ongendo onḓiṱi neye wa muna kutja wa pewa “omasa nge kapita avihe.” (2 Ovakorinte 4:7) Onḓero ye okurira omuvatere movyombepo ku varwe ya ririra ko onene, neye wa rira omuzuvarise wOuhona woruveze aruhe.
13. Otja tji pa raisiwa mu Mateus 6:9-13, omapu omahungirirwako omapwe ooyeṋe, eṱe ngu matu yenene okutamuna mozongumbiro zetu?
13 Ovikwaye mbi matu yenene okutamuna mozongumbiro zetu kutja Jehova ma kare nonyuṋe okuzezuva? Jesus Kristus wa honga ovahongewa ve kutja ve sokukumba vi. Mongumbiro yotjihorera ndja tjangwa mu Mateus 6:9-13, eye wa twa po omurari woviṋa ovihungirirwa eṱe mbi matu yenene okukumbira vyo. Ovikwaye mbya sokurira ongendo ohongora mozongumbiro zetu? Ena raJehova Mukuru nOuhona vya sokurira ovinanḓengu vyopondomba. Okuningira oviṋa ovihepewa vyetu oko ku ri nawa. Oko wina okunanḓengu okuningira ondjesiro komauvi wetu nomakuturiro komarorero na ku ingwi omuhangundu, Satana Omudiaboli. Jesus ke na pa vanga kutja tu imbure ongumbiro indji poo okuyarukira po rukwao narukwao, okuiyarukira nokuhina ouripura ohunga nomaheya wayo. (Mateus 6:7) Maru rire orupe ruṋe indu omuatje tji ma ungurisa omambo otjingewo otjikando atjihe tji ma hungire kuna ihe?
14. Pendje nomaningiriro, ozongeengumbiro nḓu twa sokuyandja?
14 Pendje na inga omaningiriro nomerihekero wokomutima, eṱe twa sokuyandja ozongumbiro zokutanga nozondangu. (Epsalme 34:1; 92:1; 1 Ovatesalonika 5:18) Eṱe wina matu yenene okukumbira varwe. Ozongumbiro ohunga novangu novaṱena vetu mombepo mbe ri mouzeu poo mbe kongorerwa maku raisa ombango yetu mu vo, nu Jehova u nonyuṋe okutuzuva amatu tamuna ongendo otja indjo. (Lukas 22:32; Johanes 17:20; 1 Ovatesalonika 5:25) Mouatjiri, omuapostele Paulus wa tjanga: “Amu rikendere otjiṋa, nunguari mongumbiro aihe, na momerihekeneno aehe, omaningiriro ueṋu ngae munike pun’ okutjandangi komurungu uaMukuru. Nohange jaMukuru, ndji kapita ozondunge azehe, mai ṱakamisa omitima vieṋu nozondjiviro zeṋu mu Kristus Jesus.”—Ovafilipi 4:6, 7, EEP.
PANḒIPARA MONGUMBIRO
15. Eṱe twa sokuzemburuka tjike indu ozongumbiro zetu tji maze munika ayoo kaze na kuzirwa?
15 Nandarire kutja ove mo toora ondjiviro ohunga na Mukuru, ove mo yenene okumuna kutja rumwe ozongumbiro zoye ze kara nokuhina okuzirwa. Mape ya ape kara nao, mena rokutja mape ya kutja ngundee kandu ri oruveze rwaMukuru okuzira ongumbiro kaaṋi. (Omuzuvarise 3:1-9) Jehova ma yenene okuisira ongaro i kaondje komeho katjisupi, nungwari eye tjiri u zira ozongumbiro nu ma tjiwa oruveze orusemba okutjita nao.—2 Ovakorinte 12:7-9.
16. Omena ratjike tji twa sokupanḓipara mongumbiro nu mokutjita hi matji ṱunu vi korupe rwetu na Mukuru?
16 Omapanḓiparero wetu mongumbiro ye vandurura ombango yetu yokomutima mu imbi mbi matu hungire ku Mukuru. (Lukas 18:1-8) Otjotjihorera, eṱe matu yenene okuningira Jehova okutuvatera okutuurunga oungundi kaaṋi. Mokupanḓipara mongumbiro nokutjita ohambwarakaṋa nomaningiriro wetu, eṱe matu raisa okuhinamatiku kwetu. Eṱe twa sokukara mondja nokurira ovakahu momaningiriro wetu. Tjinenenene okunanḓengu okukumba oukukutu indu tji tu nondjiririra yomarorero. (Mateus 6:13) Otja tji matu kaondja komeho okukumba ngunda amatu kondjo okutumbura ozonḓuma zetu ozorunde, eṱe matu ka muna kutja Jehova u tu vatera vi. Ihi matji tungu ongamburiro yetu nokupanḓiparisa orupe rwetu kuna ye.—1 Ovakorinte 10:13; Ovafilipi 4:13.
17. Eṱe matu yangapara vi kombango yetu yokukumba mokukarera Mukuru?
17 Mokutunga ombango yokukumba mokuyandja ondjito yoviungura oviyapuke ku Jehova Mukuru, eṱe matu ka muna kutja ka tuna ku mu karera momasa wetu oveni. Jehova ongu tu pa omasa kutja tu mu karere. (1 Ovakorinte 4:7) Okuitavera ku ihi maku tu vatere okukara overisusuparise nokukurisa orupe rwetu kuna ye. (1 Petrus 5:5, 6) Ii, eṱe tu na omapu omasemba okupanḓipara mongumbiro. Ozongumbiro zetu zomaramangero nondjiviro onanḓengu yokutumbuka ku Tate wetu womeyuru worusuvero maku tjiti ominyo vyetu omiṋingandu ku katjotjiri.
OMAHUNGIRIRO WAKUMWE NA JEHOVA KAYE RARERE KOMUNDA UMWE
18. Eṱe matu puratene vi ku Mukuru?
18 Eṱe tji matu vanga kutja Mukuru ma zuve kozongumbiro zetu, eṱe twa sokupuratena ku imbi mbi ma hee. (Sakarja 7:13) Eye ka hindi rukwao ozombuze ze okupitira movaprofete mba suvirirwa i Mukuru, nu tjiri ka ungurisa omihingo vyourozi. (Deuteronomium 18:10-12) Nungwari eṱe matu puratena ku Mukuru mokukonḓonona Embo re, Ombeibela. (Ovaroma 15:4; 2 Timoteus 3:16, 17) Otja tjimuna tji matu hepa okukara nomutjato kovikurya vyorutu mbi ri oviwa kweṱe, eṱe tu ṋangerwa ko ‘okuhara onḓero komaihi omakohoke wembo.’ Tunga omutjato kovikurya vyombepo mokulesa Embo raMukuru eyuva arihe.—1 Petrus 2:2, 3, NW; Oviungura 17:11.
19. Okuripura oukoto ku imbi mbi mo lese mOmbeibela kuna omayangaparero yeṋe?
19 Ripura oukoto ohunga na imbi mbi mo lese mOmbeibela. (Epsalme 1:1-3; 77:11, 12) Ihi matji hee omeripuriro omakukutu ohunga nondaze. Ove mo yenene okusasaneka ihi komariro woye wovikurya. Ove mo yenene okurya ovikurya vyombepo mokusanisa imbi mbi mo lese koviṋa mbi motjiwa rukuru. Ripura kokutja indji ondaze mai ṱunu vi komuinyo woye, poo zemburuka kokutja mai vandurura tjike ohunga novitjiukwa vyoundu vyaJehova nozondjito ze. Ku nai mokupitira momakonḓononeno woye omuini, ove mo yenene okuwova ovikurya vyombepo Jehova mbye yandja. Ihi matji yenene okutjita kutja u tumbuke ku Mukuru na tji ku vatere kutja u tuurunge omaputi woye weyuva arihe.
20. Okukara po pozombongarero zOvakriste ku tu vatera vi okutumbuka ku Mukuru?
20 Ove wina mo yenene okutumbuka ku Mukuru mokupuratena kEmbo ndi tyewa pozombongarero zOvakriste, otja tjimuna Ovaisrael tjaa ve puratene nombango aihe indu tji va ongara okuzuva omalesero wOveta yaMukuru moupata. Ovahonge voruveze ndo aave twa mo omaheya momalesero wawo wOveta, ku nai kaa ku vatere ovapuratene okuzuva nokuhingwa okuungurisa imbi mbi va zuu. Ihi tja yandja ondjoroka onene. (Nehemia 8:8, 12) Ku nai, ihi tji tjita tjirire otjikaro tjoye okukara po pozombongarero zOvahongonone vaJehova. (Ovaheberi 10:24, 25) Ihi matji ku vatere okupaka nu okuzambo oungurisa ondjiviro yaMukuru momuinyo woye ndji mai ku etere ouṋingandu. Okurira orupa rovangu nomarumbi Ovakriste vouye ouparanga maku ku vatere okukara popezu na Jehova. Notja tji matu ka muna, ove mo yenene okumuna ondjeverero ya tjiri mokati kovandu vaMukuru.
RORA ONDJIVIRO YOYE
Omena ratjike tji wa sokutumbuka ku Jehova?
Oviundjirwako tjiva ooviṋe vyokutumbuka ku Mukuru?
Ovikwaye ove mbi mo yenene okutamuna mongumbiro yoye?
Omena ratjike ove tjiwa sokupanḓipara mongumbiro?
Ove mo yenene vi okupuratena ku Jehova kundino?
[Otjiperendero otjimbomba pomukuma 157]