Ondando yaMukuru kovandu oyatjike?

1. Ondando yaMukuru kovandu oyatjike?

MUKURU u nondando ombwa tjinene kovandu. Eye wa uta omurumendu nomukazendu omutenga, ooAdam na Eva kutja ve kare motjikunino otjiwa. Ondando ye ya ri oyokutja ovandu ve panduke ovanatje nu ve parangise otjikunino ho nga tji tja kambura ouye auhe, nokuṱakamisa ovipuka.—Genesis 1:28; 2:8, 9, 15; tara kOmambo wokehi 6.

2. (a) Eṱe matu tjiwa vi kutja Mukuru ma yenenisa imbi mbya kwizika? (b) Ombeibela i tja vi ohunga nokuhupa nga aruhe?

² Ove mo munu kutja mape ya atu tura moparadisa? Jehova ma tja: “Ami mba hungire, nu otjinga amape tjitwa.” (Jesaja 46:9-11; 55:11) Eye ma yenenisa tja kwizike, nu kape notjiṋa tji matji mu tjaere. Jehova ma tja u nepu ewa nda ungurira ehi. Eye “ke ri ungurire kutja ri kare ongaango.” (Jesaja 45:18) Eye u vanga kutja ovandu ve ture mehi arihe. Ovandu veṋe Mukuru mbe vanga kutja ve hupe kombanda yehi, neye u vanga kutja ve hupe mu ro orure ndu ṱa pi? Ombeibela mai tja: “Ovasemba mave rumata ehi, nu mave tura mu ro nga aruhe.”—Epsalme 37:29; Omavandururiro 21:3, 4.

3. Mena rokutja ovandu ve vera nokuṱa, omapuriro yeṋe ngu mape ya o pura?

³ Ovandu ndino ve vera nu ve ṱa. Momahi omengi ovandu ve rwa nokuzepasana. Tjiri, indji kandja ri ondando yaMukuru. Nu hapo pa kayenda tjike? Nu omena raye tji pa kara nao? Ombeibela porwayo ondji mai yenene okutukahururira.

OMUNAVITA NA MUKURU

4, 5. (a) Owaṋi ngwa hungira kuna Eva okupitira monyoka motjikunino tjaEden? (b) Omundu ngu nouatjiri u yenena vi okurira erunga?

⁴ Ombeibela i tu raera kutja Mukuru u nomunavita ngu i sanewa “Omudiaboli poo oSatan.” Satan wa ungurisa onyoka okuhungira kuna Eva motjikunino tjaEden. (Omavandururiro 12:9; Genesis 3:1) Eye wa tjita kutja pe munike aayo onyoka ondjaai hungire.—Tara kOmambo wokehi 7.

⁵ Nu hapo, Mukuru ongwa mema Satan Omudiaboli? Kako! Omuengeli ngwa ri meyuru indu Mukuru tja uta okurongerisira Adam na Eva ehi, ongwa runduruka na rire Omudiaboli. (Job 38:4, 7) Pe ya vi? Omundu ngu nouatjiri u yenena vi okurunduruka na rire erunga? Eye kakwaterwe erunga. Posi yokutja u zera poo u vanga otjiṋa tjomundu warwe. Eye u ripurira kotjiṋa hi, nu onḓero ye i kurira ko. Nu tja munu oruveze, eye u vaka otjiṋa hi. Kunao, u ritjita kutja ma rire erunga.—Lesa Jakobus 1:13-15; tara kOmambo wokehi 8.

6. Pe ya vi omuengeli ma rire omunavita na Mukuru?

⁶ Ihi otji tja tjitwa komuengeli ngo. Indu Jehova tja za nokumema ooAdam na Eva eye we ve raera kutja ve panduke ovanatje nu ve “urise ehi.” (Genesis 1:27, 28) Omuengeli ngwi mape ya ee ripura kutja, ‘Ovandu avehe mba andakuzu mave rikotamene kwami moruveze rwokurikotamena ku Jehova!’ Otja tjee ripurire kotjiṋa hi otja uta okuzera oviṋa mbya ri ovyaJehova. Omuengeli ngo aa vanga kutja ovandu ve rikotamene ku ye. Okutja eye wa korera Eva ovizeze ne mu pukisa. (Lesa Genesis 3:1-5.) Mokutjita nao, eye wa rira Satan Omudiaboli, omunavita na Mukuru.

7. (a) Ongwaye Adam na Eva tji va ṱa? (b) Omena ratjike tji tu kurupa nokukoka?

⁷ Adam na Eva kave raisire onḓuviro ku Mukuru nu va rya otjihape. (Genesis 2:17; 3:6) Owo va katuka komurungu we nu kombunda va ṱa otja Jehova pa heya. (Genesis 3:17-19) Ovanatje vaAdam na Eva va rira ovanauvi, okutja owo ve ṱa. (Lesa Ovaroma 5:12.) Okutuvatera okuzuva nawa kutja ongwaye ovanatje vaAdam na Eva tji va rira ovanauvi wina, ngatu tare kotjihorera hi. Ngatu tje mo ziki omboroto mombana ndja kata. Omboroto aihe mai kata tjimuna ombana tji ya kata. Indu Adam tje ha raisire onḓuviro ku Mukuru, eye wa rira omunauvi. Mena rokutja oweṱe ovanatje vaAdam, atuhe oweṱe ovanauvi poo twa sana tjimuna twa “kata” tjimuna ye. Mena rokutja atuhe oweṱe ovanauvi, opu tu zokukurupa nokukoka.—Ovaroma 3:23; tara kOmambo wokehi 9.

8, 9. (a) Satan aa vanga kutja Adam na Eva ve kambure mu tjike? (b) Ongwaye Jehova tje hi na wa zepa ovapirukire mbo tjimanga?

⁸ Indu Satan tja tjita kutja Adam na Eva ve katuke komurungu waJehova, eye tjiri wa uta okupirukira Mukuru. Eye aa vanga kutja Adam na Eva ve kambure kutja Jehova omunavizeze, nokutja omuhonapare omuvi ngu he ve vangere ouwa. Satan aa tja ovandu kave nokuhepa Mukuru okuveraera kutja mave sokutjita vi nokutja Adam na Eva mave sokuritoororera oveni kutja ovikeṋa mbi ri ovisemba na imbi mbi he ri ovisemba. Nambano okutja Jehova ma tjiti vi? Andakuzu wa zepa ovapirukire mbo na yandisa omapirukiro aehe. Posi yokutja okutjita nao atja ku raisa kutja Satan omunavizeze po? Kako, katja ku tjita nao.

⁹ Kunao, Jehova kena pa zepa ovapirukire mbo tjimanga. Moruveze rwanao, eye wa yandjera ovandu okurihonaparera oveni. Okutjita nao kwa raisa kutja Satan omunavizeze nokutja Jehova ongu tjiwa nawa imbi mbi ri ovisemba kovandu. Matu kerihonga ovingi ohunga nepu ndi mEkondwa 11 rembo ndi. Nu hapo u noumune uṋe ohunga nomukambo Adam na Eva mbu va toora? Owo va sora tji va kambura mu Satan nave ha raisa onḓuviro ku Mukuru? Jehova wa yandjere oviṋa avihe ku Adam na Eva. Eye we vepa ehupo ewa, oruveze oruwa okutura mo noviungura mbyaavi ve pe onyuṋe. Posi yokutja Satan ke notjiṋa otjiwa tja rora okuvetjitira? Andakuzu ove wari mbo, otjo tjita vi?

10. Auhe wetu ma hepa okutoora omukambo uṋe omunanḓengu?

¹⁰ Kundino auhe wetu u nomukambo otjingewo mbu ma hepa okutoora, nu omuinyo wetu mau rekareka komukambo mbu matu toora. Matu yenene okutoorora okukara nonḓuviro ku Jehova otjOmunane wetu natu raisa kutja Satan omunavizeze. Poo matu yenene okutoorora Satan otjomunane wetu. (Epsalme 73:28; lesa Omiano 27:11.) Kavandu ovengi mouye mbwi mbe raisa onḓuviro ku Mukuru. Posi yokutja eye kamunane wouye mbwi. Nu hapo Mukuru tje he ri omunane wouye mbwi, ouṋe ngu ri omunane wawo?

OWAṊI NGU HONAPARERA OUYE?

11, 12. (a) Matu rihongere tjike komuano Satan mbwa rora Jesus? (b) Omatjangwa yeṋe nge raisa kutja Satan omuhonapare wouye mbwi?

¹¹ Jesus aa tjiwa nawa kutja ouṋe ngu ri omuhonapare wouye mbwi. Satan otjikando tjimwe we mu raisira “omauhona aehe wouye nounene wawo auhe.” Okuzambo Satan wa kwizikira Jesus na tja: “Oviṋa avihe mbi ami me Ku pe, tji wa wora ozongoro no rikotamene ku ami.” (Mateus 4:8, 9; Lukas 4:5, 6) Ripura omuini kutja, ‘Andakuzu omauhona ngo kaya ri oyaSatan, eye etje ye yandja ku Jesus po?’ Kako. Pu mape hee kutja ozohoromende azehe ozaSatan.

¹² Ove mape ya mo ripura kutja: ‘Mape ya vi Satan ma rire omuhonapare wouye mbwi? Jehova kangu ri Mukuru Omunamasaaehe, ngwa uta oviṋa avihe mevaverwa?’ (Omavandururiro 4:11) Ii, otjiperi kutja eye ongwa uta oviṋa avihe, nungwari Jesus wa tja Satan “omuhonapare wouye mbwi.” (Johanes 12:31; 14:30; 16:11) Omuapostele Paulus wa tja Satan Omudiaboli “omukuru omurunde wouye mbwi.” (2 Ovakorinte 4:3, 4) Omuapostele Johanes wina wa tjanga kutja, “ouye auhe u ri kehi youhonapare waingwi umwe Omunaurunde.”—1 Johanes 5:19.

OUYE WASATAN MAU KAYANDEKWA VI?

13. Omena ratjike tji matu hepa ouye oupe?

¹³ Ouye mbwi u yenda amau ririre ko ounaumba tjinene. Tu muna ovita, ovizeze novineya nozondjito zoutwe ongondoroka na eṱe. Ovandu kamaave yenene okuzengurura omauzeu aehe nga, kaina tja kutja va roro pu pe ṱeki pi. Posi yokutja moruyaveze rwopopezu Mukuru me yekuyandeka ouye ourunde mbwi meyuva rovita vye vyaArmagedon, nu me u pingenisa nouye oupe mu mamu kara ousemba.—Omavandururiro 16:14-16; tara kOmambo wokehi 10.

14. Mukuru wa toorora aṋi okurira Ombara yOuhona We? Ombeibela ya hunganeka tjike ohunga na Jesus?

¹⁴ Jehova wa toorora Jesus Kristus kutja ma rire Ombara yOuhona We, poo ohoromende ye yomeyuru. Ozombura omayovi omengi nḓa kapita, Ombeibela rukuru ya kwizika kutja Jesus ma honapara otja “Ombara-yOhange” nokutja ohoromende ye kai nomaandero. (Jesaja 9:6, 7) Jesus wa honga ovemukongorere okukumbira ohoromende ndji indu tja tja: “Ouhona woye ngau ye; ombango yoye ngai tjitwe na kombanda yehi otja meyuru.” (Mateus 6:10) MEkondwa 8, matu kerihonga ohunga nomuano Ouhona waMukuru mu mau pingene ozohoromende azehe zouye mbwi. (Lesa Daniel 2:44.) Okuzambo Ouhona waMukuru mau tjiti kutja ehi ndi ri rire oparadisa ombwa.—Tara kOmambo wokehi 11.

OUYE OUPE U RI POPEZU!

15. ‘Ehi epe’ ri heya tjike?

¹⁵ Ombeibela ya kwizika nai: “Eṱe matu undju imbi Ndjambi mbya kwizika: Eyuru epe nehi epe mu mamu tura ousemba.” (2 Petrus 3:13; Jesaja 65:17) Povikando tjiva Ombeibela tji mai hungire ohunga ‘nehi’ oyo i hungira ohunga novandu kombanda yehi. (Deuteronomium 32:1) Okutja ‘ehi epe’ mu mamu tura ousemba, mari hee ovandu avehe mbe nonḓuviro nu mba serwa ondaya i Mukuru.

16. Mukuru ma kayandja otjiyandjewa tjiṋe otjiwa ku imba mbu mave kahupa mouye we oupe, nu matu sokutjita tjike kutja tu tji mune?

¹⁶ Jesus wa kwizika kutja imba mbu mave kahupa mouye waMukuru oupe, mave kamuna “omuinyo waaruhe.” (Markus 10:30) Matu sokutjita vi kutja tu mune otjiyandjewa hi? Arikana lesa Johanes 3:16 nekondwa 17:3, kutja u mune eziriro. Nambano ngatu tare ku imbi Ombeibela mbi ya kwizika ohunga nokutja ehupo mOparadisa mari kasana pi.

17, 18. Eṱe matu tjiwa vi kutja maku kakara ohange nondjeverero kombanda yehi arihe?

¹⁷ Ourunde, ovita, nozondjito zoutwe nozotjitandi mavi yanda. Kaku nokukara ovandu ovarunde rukwao kombanda yehi. (Epsalme 37:10, 11) Mukuru ma “yandisa ovita mouye auhe.” (Epsalme 46:9; Jesaja 2:4) Ehi mari ura ovandu mba suvera Mukuru nu mbe nonḓuviro ku ye. Mamu kara ohange nga aruhe.—Epsalme 72:7.

¹⁸ Ovakarere vaJehova mave kara mondjeverero. Moruveze orukuru rwOmbeibela indu Ovaisrael tji va ri nonḓuviro ku Mukuru, owo va ri mondjeverero orondu Eye ee ve tjevere. (Levitikus 25:18, 19) MOparadisa kamaatu hepa okutira otjiṋa poo omundu. Eṱe matu kahupa mondjeverero!—Lesa Jesaja 32:18; Mika 4:4.

19. Eṱe matu tjiwa vi kutja ovikurya mavi katakavara mouye oupe waMukuru?

¹⁹ Maku kakara ovikurya ovingi. ‘Mamu kara ovikokotwa ovingi mehi nga kozondomba zozondundu; ovyo mavi takavara.’ (Epsalme 72:16) Jehova “ngu ri Ndjambi wetu, me tu sere ondaya” nu ‘ehi mari eta ovihape vyaro.’—Epsalme 67:6.

20. Eṱe matu tjiwa vi kutja ehi arihe mari rire oparadisa?

²⁰ Ehi arihe mari rire oparadisa. Ovandu mave kakara nozondjuwo ozombwa novikunino oviwa. (Lesa Jesaja 65:21-24; Omavandururiro 11:18.) Ehi arihe mari rire oruveze oruwa tjimuna otjikunino tjaEden. Jehova aruhe me tu pe atjihe tji matu hepa. Ombeibela i tja nai ohunga na ye: “Ove u paturura eke roye no kutisa atjihe tji tji nomuinyo.”—Epsalme 145:16.

21. Matu tjiwa vi kutja maku kakara ohange pokati kovandu novipuka?

²¹ Maku kakara ohange pokati kovandu novipuka. Ovipuka kamaavi hihamisa ovandu rukwao. Ounatje ouṱiṱi mau kahupa mondjeverero, kau nakuhepa okutira ovipuka mbi ri ovinaumba ndino.—Lesa Jesaja 11:6-9; 65:25.

22. Jesus ma katjita vi ku imba mba vera?

²² Kape nomundu ngu ma kavera rukwao. Indu Jesus tja ri kombanda yehi, eye wa verura ovandu ovengi. (Mateus 9:35; Markus 1:40-42; Johanes 5:5-9) Nungwari otjOmbara yOuhona waMukuru, Jesus ma kaverura ovandu avehe. Kape nomundu ngu ma unauna rukwao kutja, “eye wa vera.”—Jesaja 33:24; 35:5, 6.

23. Mukuru ma katjita vi ku imba mba ṱa?

²³ Ovaṱi mave kakara nomuinyo rukwao. Mukuru wa kwizika kutja ma kapendura ovandu ovengi mba ṱa. “Ovandu avehe ovawa novavi mave penduka movakoke.”—Lesa Johanes 5:28, 29; Oviungura 24:15.

24. Ove u noumune uṋe ohunga nokukahupa mOparadisa?

²⁴ Auhe wetu ma hepa okuritoorera omukambo. Matu yenene okutoorora okurihonga ohunga na Jehova nokumukarera, poo okutjita mbi matu vanga. Tji twa toorora okukarera Jehova, matu yenene okukara noruyaveze oruwa. Omurumendu umwe tja ningira Jesus kutja me mu zemburuke tja ṱu, Jesus we mu kwizikira na tja: “Mo kakara puna Ami moparadisa.” (Lukas 23:43) Ngatu rihonge ovingi ohunga na Jesus Kristus, nomuano mbu ma kayenenisa omakwizikiro Mukuru nga tjita.