Josija wa suverere Omatwako waMukuru

Josija wa rira ombara yaJuda ngunda e nozombura 8. Momayuva ngo, ovandu aave ungurisa oundjai nokurikotamena kovisenginina. Indu Josija tja hara ozombura 16, eye wa kondja okukonḓonona kutja ma yenene vi okurikotamena ku Jehova momuano omusemba. Indu tja ri nozombura 20, eye wa uta okunyanyaura ovisenginina novipunguhiro mehi arihe. Nu tja ri nozombura 26, eye wa rongerisa oviṋa kutja ondjuwo ondjapuke yaJehova i ṱunwe.

Omupristeri omunene Hilkija wa vaza embo emangwa mu mwa tjangerwe Omatwako waJehova mondjuwo ondjapuke, nu embo emangwa ndi ngahino orondi nda tjangerwe i Moses. Omutjangere po wombara wena Safan wa eta embo emangwa ku Josija na utu okulesa Omatwako kutja otjiwaṋa tji zuve. Otja Josija tjaa puratene, eye wa muna kutja oure wozombura ozengi otjiwaṋa katja ri nonḓuviro ku Jehova. Ombara Josija ya raera ku Hilkija nai tja: ‘Jehova wa pindika kuna eṱe. Twende u kahungire kuna ye, neye me tu raere kutja ngatu tjite vi.’ Jehova wa zira okupitira momuprofete omukazendu wena Hulda na tja: ‘Otjiwaṋa tjaJuda tje ndjesa. Otjo matji verwa, posiya ka nai ngunda Josija e ri ombara, orondu eye we risusuparisa.’

Indu Ombara Josija tji ya zuva ombuze ndji, oyo ya ya kondjuwo ondjapuke nai woronganisa otjiwaṋa tjaJuda pamwe. Okuzambo ya lesa Omatwako waJehova kutja otjiwaṋa atjihe tji ye zuve. Josija notjiwaṋa va kwizika kutja mave kara nonḓuviro ku Jehova nomitima vyawo avihe.

Otjiwaṋa tjaJuda oure wozombura ozengi kaatji zemburuka Opaska. Posiya Josija tja lesa mOmatwako kutja Opaska mai sokuzemburukwa ombura aihe, eye wa raera otjiwaṋa na tja: ‘Matu kara neyuva enene rOpaska kondjozikiro yaMuhona.’ Okuzambo Josija wa rongerisa okutjita ozombunguhiro na rongerisa okukara novaimbure pondjuwo ondjapuke yaMuhona. Okutja otjiwaṋa tja kara nOpaska ndja kongorerwa i Eyuva enene rOzomboroto nḓe hina osure nda kara oure womayuva 7. Kape ya rora okukara Opaska otja indji okuza koruveze Samuel tja ri nomuinyo. Josija tjiri wa suverere Omatwako waMukuru. Ove u tjaterwa okurihonga ohunga na Jehova po?