“Taurireje oruvakiro!”

1, 2. Bileam wa kondja vi okupukisa otjiwaṋa tja Jehova?

OMUPATE wouzera u paha oruveze pu ma munu ouzera okupata nu arire pa twapo ongwehe. Okuzambo, u twa po oukurya pongwehe nu tja mana, a undju kutja ouzera u ye pongwehe ndjo. Eye tja munu kutja ouzera we ya pongwehe, otjenana ongoze yongwehe okupata ouzera.

² Ovandu mave yenene okukamburwa momuano otjingewo. Otjotjihorera, otjiwaṋa tjOvaisrael tja ri pokuhita mEhi Ekwizikwa indu tji va ri mOtutjandja twa Moab. Ombara ya Moab ya kwizikira Bileam kutja tja sengi Ovaisrael, eye me mu sutu ovimariva ovingi. Kombunda yoruveze, Bileam wa muna omuano mu ma yenene okutjita kutja Ovaisrael ve ete osengiro ku wo oveni. Eye wa toorora ongwehe ndjo nongengezero. Eye wa hinda ovakazendu Ovamoab mokamba yOvaisrael kutja ve kapukise ovarumendu.​—Numeri 22:1-7; 31:15, 16; Omavandururiro 2:14.

3. Ovaisrael va wira vi mongwehe ya Bileam?

³ Hapo ongwehe ya Bileam ya ungura? Ii ya ungura tjinene, orondu ovarumendu omayovi omengi wOvaisrael “va vakirasana novakazendu Ovamoab.” Owo wina va uta okurikotamena koomukuru wOvamoab wovisenginina, na ku mukuru omuyaukise worukatuko wena Baal-Pegor. Kunao, Ovaisrael 24 000 va ṱira pomahitiro wEhi Ekwizikwa.​—Numeri 25:1-9.

4. Ongwaye Ovaisrael omayovi omengi tji va tjita orukatuko?

⁴ Ongwaye Ovaisrael ovengi nao tji va putara mombate ya Bileam? Omena rokutja owo aave ripurire kozonḓero zawo uriri, nu va zemba oviṋa avihe Jehova mbye ve tjitira. Ovaisrael va ri nomapu omengi kaave sokuraisira Mukuru ouṱakame. Eye we ve kutura koukarere moEngipte, we ve pa ovikurya tji va ri mokuti ongaango, nu e ve eta nokuhina otjipo pomahitiro wEhi Ekwizikwa. (Ovaheberi 3:12) Nakombanda yanao, owo va yenena okupukisiwa norukatuko. Omuapostele Paulus wa tja: “Nu atu ha vakirasana otja tjiva vawo tjiyave vakirasana; nu meyuva rimwe ape ṱu ovandu.”​—1 Ovakorinte 10:8.

5, 6. Matu rihongere ko tjike ku imbi mbya tjitwa pOtutjandja twa Moab?

⁵ Ouye oupe u ri popezu tjinene. Momuano umwe poo omukwao eṱe tu ri tjimuna Ovaisrael, pomahitiro wEhi Ekwizikwa. (1 Ovakorinte 10:11) Ouye mu tu hupa ndino u ripurira tjinene korukatuko okukapita Ovamoab. Ongaro yorukatuko ndji, mai yenene okuṱuna kovakarere va Jehova. Nu ongwehe Satan ndje ungurisa nondoṋeno, oruvakiro.​—Numeri 25:6, 14; 2 Ovakorinte 2:11; Judas 4.

⁶ Ripura omuini kutja, ‘Me toorora okuyenenisa ozonḓero zandje omuini nḓu maze ndji pe ondjoroka oruveze orusupi uriri, poo me toorora okukahupa mondjoroka nga aruhe mouye oupe?’ Ohepero tjinene okukondja okuraisa onḓuviro ketwako ra Jehova ndi tja: “Taurireje oruvakiro!”​—1 Ovakorinte 6:18, EEP.

EMBO NDI ORUVAKIRO RI HEYA TJIKE?

7, 8. Embo ndi oruvakiro ri heya tjike? Nu ongwaye tji matu sokuyandja ko ombango tjinene?

⁷ Matu ningire ondjesiro koviṋa mbi matu kahungirira ko nai, orondu ovyo kaviṋa mbi hungirirwa ko oupaturuke motjiwaṋa tjetu tjOvaherero. Nungwari matu sokuvikahurura nawa kokutja atu ha tjiti imbi Jehova mbya tonda. Ovandu ovengi ndino ve raisa ongaro yombonḓi, nu kave tira okuteya omatwako wa Mukuru ohunga norukatuko. MOmbeibela, embo ndi oruvakiro ri heya omahakaeneno womonyama pokati kovandu mbe hiya kupasana otja koveta ya Mukuru. Oro ri kamburira mo omahakaeneno womonyama pokati kovarumendu vevari poo ovakazendu vevari, nomahakaeneno pokati kovandu novipuka. Oruvakiro wina ru kamburira mo okuungurisa otjinyo koviṋepo vyourumendu noukazendu momahakaeneno womonyama, nokutundukasana kotutu twokongotwe poo okuṱunasana koviṋepo nondando yokupendurasana ozonḓuma.​—Lesa Omakahururiro 23.

⁸ Ombeibela i raisa oukahu kutja omundu tji ma kayenda komurungu okutjita oruvakiro, kamaa yandjerwa okukara mombongo. (1 Ovakorinte 6:9; Omavandururiro 22:15) Nakombanda yanao, omundu ngu tjita ourunde u rihahiza, nu varwe ve pandjara ongamburiro yawo mu ye. Okutjita ourunde aruhe ku eta omauzeu. Potuingi ku kaeta omeritjiviro womomutima nge ku pa ondjo, nokutoora oungundi moruveze ndu he ri ro, omauzeu morukupo, omitjise, poo nandarire onḓiro. (Lesa Ovagalate 6:7, 8.) Indu omundu tje ripurire kokutja okutjita ourunde ku eta ye, mape ya aha vanga okuutjita. Potuingi omundu u ripurira kokuyenenisa ozonḓuma ze omuini uriri indu tji ma toora omukambo omutenga okutjita ourunde. Omukambo omutenga mbwi potuingi u kamburira mo okutarera oviperendero vyakamuzu.

OTJIṊA TJI TJI HINGA OMUNDU OKUTJITA ORUVAKIRO

9. Oviperendero vyakamuzu vi eta omaumba waye?

⁹ Oviperendero vyakamuzu vya ungurirwa okupendura ozonḓuma zetu. Kundino, oviperendero vyakamuzu vi vazewa poṋa apehe​—momambo, momisiki, motiivii, na wina motungovi. Ovengi ve muna kutja oviperendero vyakamuzu kavi noumba mbu vi eta, posi yokutja ovyo vi eta omaumba omanene. Ovyo vi yenena okutjita kutja omundu ma suvere omahakaeneno womonyama tjinene nga tje ha sora okuritjaera, nu vi tjita kutja ma kare nozonḓuma ozondjaukise. Omundu tja utu okutara oviperendero vyakamuzu, ku kaeta ongaro yokurinyandisa oviṋepo nondando yokukovisa ozonḓuma zoye, omauzeu morukupo, poo nangarire okuteya orukupo.​—Ovaroma 1:24-27; Ovaefese 4:19; lesa Omakahururiro 24.

10. Erakiza ndi ri mu Jakobus 1:14, 15, mari yenene okutuvatera vi okunakaura oruvakiro?

¹⁰ Matu sokutjiwa nawa kutja ovikeṋa mbi mavi yenene okutuhinga okukatjita oruvakiro. Yandja ombango kerakiza ndi ri mu Jakobus 1:14, 15, ndi mari tja: “Nungwari omundu u rorwa, indu tji ma twarwa na hemenwa i ozonḓuma ze omuini zourunde. Nozonḓuma ze zourunde tji ze urisiwa ze kwata ouvi, nouvi tji wa yenenisiwa u kwata onḓiro.” Okutja tji wa utu okuripura noviṋa ovihakohoke, vi nakaura tjimanga. Tji we rihaka koviperendero mbi mavi pendura ozonḓuma zoye, tara kwarwe! Zemisa okombiuta, poo rundurura oprograma yotiivii. O yandjere oviṋa mehupo roye, mbi pendura ozonḓuma ozombi movandu. Tji wa yandjere, ozo maze yenene okurira ozonamasa tjinene, nga tji u hina okuyenena okuzetjaera.​—Lesa Mateus 5:29, 30.

11. Jehova ma yenene vi okutuvatera indu tji tu nomeripura omahakohoke?

¹¹ Jehova u tu tjiwa nawa okukapita eṱe oveni. Kunao u tjiwa kutja kaweṱe ohomonena. Posi yokutja eye wina u tjiwa kutja matu yenene okutuurunga ozonḓuma ozombi. Jehova ma tja nai kweṱe: “Nungwari nambano mamu sokukoza ozonḓuma zouye nḓe ri mu eṋe; okutja ombakirasaneno, ouhakohoke, omananukiro wonyama, ozonḓuma ozombi, noukorokope, orondu oukorokope wa sana nokukarera ovisenginina.” (Ovakolose 3:5) Nandarire kutja kaupupu kweṱe okunakaura oviṋa mbi, Jehova u nomuretima nu me tu vatere. (Epsalme 68:19) Omutanda umwe omukambure wa wira mongwehe yokutarera oviperendero vyakamuzu nokurinyandisa oviṋepo vye. Omapanga we poskole aaye munu kutja oviṋa mbyo orupa rwomekuriro. Posi yokutja eye wa tja: “Okutjita oviṋa mbi kwa zepa omeritjiviro wandje womomutima, nu kwa tjita kutja mbi ute okuhupa mongaro yourunde.” Eye wa kamuna kutja ma hepa okutjaera ozonḓuma ze, nu wa yenena okupoka kongaro ndjo nombatero ya Jehova. Indu tji u nomeripura omahakohoke, kumba ku Jehova kutja me ku pe “omasa nge kapita avihe” kokutja u kare nomeripura omakohoke.​—2 Ovakorinte 4:7; 1 Ovakorinte 9:27.

12. Ongwaye tji matu ‘sokutjevera omutima wetu’?

¹² Salomo wa tja: “Tjevera omutima woye poviṋa avihe, orondu imo omu mu nombwiro yomuinyo.” (Omiano 4:23) “Omutima” wetu mau hee omundu moukoto, Jehova ke yandja ombango. Oviṋa mbi tu tara vi yenena okutuṱuna tjinene. Omurumendu omuṱakame Job wa tja: “Ami mba tjita omakwizikiro omaṱakame wokutja himee tara komukazona noruhuro.” (Job 31:1) Otja Job, eṱe tu sokutjevera oviṋa mbi tu tara nokuripurira ko. Nu tjimuna omutjange wEpsalme, eṱe tu kumba nai: “Ndji tjaera kutja e ha kara nonyuṋe moviṋa vyomungandjo.”​—Epsalme 119:37.

DINA WA TOORA OMUKAMBO OMUHASEMBA

13. Dina wa toorora omapanga nge ri vi?

¹³ Omapanga wetu ye yenena okutuṱuna momuano omuwa poo momuano omuvi. Tji wa toorora omapanga nge kongorera omirari vya Mukuru, owo mave yenene okukuvatera okutjita nao wina. (Omiano 13:20; lesa 1 Ovakorinte 15:33.) Okuza ku imbi mbya tjitwa ku Dina, eṱe matu yenene okumuna ounahepero wokuyandja ombango komapanga ngu matu toorora. Eye wa ri omuatje wa Jakob omukazona, okutja we kurisiwa meṱunḓu ndaa ri rikotamene ku Jehova. Dina kena pa ri omundu wongaro ombi yomeritjindiro, posi yokutja wa tunga oupanga wopopezu ku novasuko wOvakanaan mbaave he rikotamene ku Jehova. Ovakanaan va ri noumune mbwa pangukire ku imbwi wovakarere va Mukuru ohunga norukatuko, nu aave tjiukirwa kongaro ohakohoke yomeritjindiro. (Levitikus 18:6-25) Dina tja ri puna omapanga we, wa hakaena kuna omurumendu Omukanaan omutanda wena Sikem, ngwa uta okunanukirwa i ye. Sikem aa varwa otja “omuyozikwa tjinene” meṱunḓu rawo arihe. Posi yokutja eye kena paa suverere Jehova.​—Genesis 34:18, 19.

14. Ouvi waye mbwa tjitwa ku Dina?

¹⁴ Sikem wa tjita otjiṋa tji tja ri otjiyakurwa ku ye. Mena rokutja aa nanukirwa i Dina, eye we “mu kambura ne mu tjere.” (Lesa Genesis 34:1-4.) Ondjito ndji, ya kaeta oumba ounene ku Dina neṱunḓu re arihe.​—Genesis 34:7, 25-31; Ovagalate 6:7, 8.

15, 16. Matu yenene vi okurira ozonongo?

¹⁵ Katu nokuhepa okutjita ozondataiziro tjimuna Dina, kutja tu yenene okumuna ouwa wokukongorera omirari vya Jehova. “Kara puna ozonongo nu mo rire onongo. Tji mo tjiti oupanga novandu omayova mo nyonoka.” (Omiano 13:20) Nga rire ondando yoye okutjiwa “ondjira ndji twara kouṋingandu,” nu mo ritjaere kouzeu nomihihamo mbi he ri ohepero.​—Omiano 2:6-9; Epsalme 1:1-3.

¹⁶ Matu yenene okurira ozonongo tji matu konḓonona Embo ra Mukuru, nokukumba ku ye ngunda atu hiya toora omikambo, nokukongorera omuhunga okuza komukarere omuṱakame nomunazondunge. (Mateus 24:45; Jakobus 1:5) Otjiperi kutja, mo tjiwa kutja atuhe oweṱe ovingundi nu kaweṱe ohomonena. (Jeremia 17:9) Posi yokutja, hapo mo tjiti vi indu omundu tje ku rakiza kutja u ri pokutjita otjiṋa otjivi? Mo pindike, poo mo yakura ombatero nomerisusuparisiro?​—2 Ozombara 22:18, 19.

17. Erakiza okuza komukambure omukwetu mari yenene okutuvatera vi? Yandja otjihorera.

¹⁷ Otjotjihorera, ripurira ku imbi. Omurumendu ngu ungura pu nomukazendu omukambure, wa uta okumupa ombango yapeke ne mu ṋanga kutja ve kerinane pamwe otjomapanga. Omurumendu ngwi kakarere Jehova, posi yokutja u raisa ongaro ombwa. Omukazendu warwe omukambure we ve muna pamwe nu kombunda a kondjo okurakiza omukambure omukwao ohunga notjiṋa hi. Nu hapo omukazendu omukambure ingwi owarwe ma raisa ongaro iṋe? Mape ya a ha puratene ku ye poo ma munu ounongo werakiza ndo? Otjiperi kutja omukazendu omukambure ngwi mape ya wa suvera Jehova, nu ma vanga okutjita ihi tji tji ri otjisemba. Posi yokutja tja kara pokuyenda pu nomurumendu ngwi, hapo eye tjiri ma ‘taurire oruvakiro’ poo me ‘riyameke komeripuriro we omuini’?​—Omiano 22:3; 28:26; Mateus 6:13; 26:41.

RIHONGERA KOTJIHORERA TJA JOSEF

18, 19. Josef wa taurira vi oruvakiro? Kahurura.

¹⁸ Otjomurumendu omutanda, Josef wa ri omukarere moEngipte. Eyuva arihe, omukazendu womuhona we ee mu ningire okurara pu ye, posi yokutja Josef aa tjiwa kutja okutjita nao otjiṋa otjivi. Josef wa suverere Jehova nu aa vanga okuyorokisa omutima we. Kunao, otjikando atjihe omukazendu tjaa kondjo okumupopa, Josef aa panḓa. Mena rokutja Josef wa ri omukarere, eye kaa yenene okuisa omuhona we. Eyuva rimwe omukazendu womuhona we tje mu ṋiṋikiza okurara pu ye, eye wa “purukuta pendje.”​—Lesa Genesis 39:7-12.

¹⁹ Andakuzu Josef we riyandjera okuripura omeripura omavi ohunga nomukazendu ngo, eye mape ya atja katuka. Posi yokutja, oupanga wa Josef kuna Jehova wa ri ounanḓengu tjinene okukapita otjiṋa ngamwa atjihe. Eye wa tja nai komukazendu womuhona we: “Omuhona wandje . . . ka tjaerere otjiṋa ku ami posi yaove, ngu u ri omukazendu we. Me sokutjitira tjike otjiṋa tjouvi ounene mbu ṱa mba, nokukatuka komurungu wa Ndjambi?”​—Genesis 39:8, 9.

20. Matu tjiwa vi kutja Jehova wa ri nonyuṋe nongaro Josef ndja raisa?

²⁰ Nandarire kutja Josef wa ri kokure nonganda, na kokure novanene ve, eye wa ri omuṱakame aruhe ku Jehova, nu Jehova we mu sera ondaya. (Genesis 41:39-49) Ouṱakame Josef mbwa raisa wa yorokisa omutima wa Jehova. (Omiano 27:11) Okupirukira oruvakiro katjiṋa otjipupu. Posi yokutja ngatu rizemburuke nomambo nga: “Eṋe mbu mwa suvera Muhona, tondeye ouvi! Eye u yama omiinyo vyotjiwaṋa tje nu u ve hakana momake wovarunde.”​—Epsalme 97:10.

21. Omuzandona umwe omukambure wa horera vi ku Josef?

²¹ Eyuva arihe, ovakarere va Jehova ve raisa ouvanḓe ‘mokutonda ouvi nokusuvera ouwa.’ (Amos 5:15) Mo yenene okurira omuṱakame ku Jehova, kutja oove omuṱiṱi poo omunene. Ongamburiro yomuzandona omukambure ya rorwa ngunda e ri moskole. Omukazona umwe poskole we mu raera kutja, tje mu vatere nomarorero we wovivarero, me riyandjere okutjita orukatuko puna ye. Nu hapo omuzandona omukambure ngwi wa tjita vi? Eye wa tjita tjimuna Josef. Eye wa tja: “Ami mba hakahana okunakaura otjiṋa ho. Mokuraisa ouṱakame, mba ṱiza onḓengu yandje.” Ondjoroka ngamwa aihe poo ‘ombyarero youvi yoruveze orusupi’ ndji za moruvakiro, potuingi i eta omihihamo. (Ovaheberi 11:25) Onḓuviro ku Jehova aruhe i eta ondjoroka ongarerere.​—Omiano 10:22.

YAKURA OMBATERO OKUZA KU JEHOVA

22, 23. Jehova me tu vatere vi nandarire indu tji twa tjiti ourunde ounene?

²² Satan u ungurisa oruvakiro okutupukisa, nu mape ya atji rire otjiṋa otjizeu. Atuhe mape ya tu kara nomeripura omahakoheke povikando tjiva. (Ovaroma 7:21-25) Nu otjiṋa hi Jehova u tji tjiwa nawa, nu u zemburuka kutja “oweṱe oruuma.” (Epsalme 103:14) Nu hapo mape kara vi indu Omukriste tja tjiti ourunde ounene? Ma sokurihahiza? Kako. Indu omundu tje nomuhihamwatima tjiri ohunga noviṋa mbya tjita, Jehova me mu vatere. Mukuru u ri kamwaha ‘okumuisira.’​—Epsalme 86:5; Jakobus 5:16; lesa Omiano 28:13.

²³ Jehova wina we tu pa ovanene vombongo ‘otjoviyandjewa kovandu,’ mbe tu tjevera norusuvero. (Ovaefese 4:8, 12; Jakobus 5:14, 15) Eye wa yandja ovanene vombongo kutja ve tu vatere okuṱuna oupanga wetu kuna ye.​—Omiano 15:32.

UNGURISA ‘OZONDUNGE’

24, 25. Okukara “nozondunge” maku yenene okutuvatera vi okunakaura ouvi?

²⁴ Kutja tu yenene okutoora omikambo omiwa, tu sokuzuva nawa kutja omatwako wa Jehova maye tu vatere vi. Katu nokuvanga okukara tjimuna omutanda ngwa tamunwa mOmiano 7:6-23. Eye ka ri “nozondunge,” nu opa zokukamburwa mongwehe yoruvakiro. Tji tu nozondunge tu kondja okuzuva nawa omeripura wa Mukuru nokuyeungurisa mehupo retu. Zemburuka omambo wounongo nga: “Ngu paha ounongo u ungurira ouwa we omuini; ngu rikendera ozondunge u muna ouṋingandu.”​—Omiano 19:8.

²⁵ U nongamburiro ndja yenene kutja omirari vya Mukuru omisemba? Hapo u kambura kutja tjiri tji wa kara nonḓuviro ku vyo mavi ku etere ouṋingandu? (Epsalme 19:7-10; Jesaja 48:17, 18) Tji u hi nongamburiro, zemburuka oviṋa oviwa avihe Jehova mbye ku tjitira. “Roreye nu mu rimunine ouwa wa Muhona.” (Epsalme 34:8) Mo kamuna kutja, otja pu mo tjiti nao, opu mo suverere ko Mukuru. Suvera imbi eye mbya suvera, nu tonda imbi eye mbya tonda. Urisa ouripura woye nomeripura omawa, tjimuna oviṋa vyouatjiri, nousemba, noukohoke, nouwa nondangu ombwa. (Ovafilipi 4:8, 9) Matu yenene okukara tjimuna Josef, ngwa muna ouwa mounongo wa Jehova.​—Jesaja 64:8.

26. Matu kahungirira ku ye momakondwa yevari ngu maye kongorere ko?

²⁶ Nandarire kutja oove omukombe poo u ri morukupo, Jehova u vanga kutja u kare nondjoroka, nouṋingandu mehupo roye. Omakondwa yevari ngu maye kongorere ko, ye nondjivisiro ndji mai yenene okutuvatera okukara nondoṋeno morukupo.