EHONGWA 52
Ongwaye tje ri ounanḓengu okuripurira komuano wetu wokurihwikika nombunikiro yetu?
Atuhe tu vanga okutoorora ozombanda nḓu matu zara, nomuano mbu matu vanga okumunika. Indu tji twa ṱakamisa omirari mbi ri mOmbeibela, matu yenene okutoorora omizaro mbi twa suvera nu wina atu yorokisa omutima wa Jehova. Ngatu tare komirari tjiva mbyo.
1. Omirari viṋe mbi mavi tu vatere okutjita ozondando ozombwa ohunga nomizaro nombunikiro yetu?
Eṱe matu sokutoorora ‘omizaro omihirona nomipwe okuyenena,’ nu aruhe matu sokumunika oukohoke kokutja varwe ve mune kutja tu “nondira ku Ndjambi.” (1 Timoteus 2:9, 10) Tara komapu yane nga: (1) Omizaro vyetu mavi sokurira ‘omihirona nomipwe okuyenena.’ Otja tji u muna pozombongarero zombongo, ovakarere va Jehova ve rihwikika momiano pekepeke, posi ya omizaro vyetu nomuano mbu tu ṱuna ozondjise aruhe vi raisa ondengero ku Mukuru wetu. (2) Eṱe matu sokurihwikika momuano omuwa. Pu mape hee kutja katu sokuzara ozombanda nḓu maze tjiti kutja varwe ve kare nomeripura omavi, poo okunanena ombango ku eṱe oveni. (3) Matu sokuraisa ounongo, mokuhinokukongorera omuzaro poo ombunikiro aihe ndji kongorerwa i yovandu ovengi mouye. (4) Ombunikiro yetu aruhe i sokuraisa ‘ondira ku Ndjambi,’ kokutja varwe ve mune kutja tu rikotamena ku Mukuru watjiri.—1 Ovakorinte 10:31.
2. Ongwaye tji matu sokuripurira kovakambure ovakwetu indu tji matu toorora kutja matu zara ye?
Otjingaperi kutja tu nouyara wokutoorora kutja matu zara tjike. Posi ya matu sokuripura ohunga nokutja omuzaro wetu mau ṱunu vi ku varwe. Eṱe tu kondja pu matu yenene okuhinokuputarisa omundu warwe, nungwari moruveze rwanao tu ‘tjita otja konḓero yovakwetu kombwiro yawo, kokutja tu ve tunge mongamburiro.’—Lesa Ovaroma 15:1, 2.
3. Omomuano uṋe ombunikiro yetu mu i tjita kutja ovandu ve vange okurihonga ovingi ohunga na Jehova?
Eṱe aruhe tu kondja okurizara momuano omuwa, posi ya tu yandja ombango tjinene komuzaro wetu indu tji matu i kozombongarero zombongo nokupita motjiungura tjokuzuvarisa. Eṱe katu vanga kutja ovandu ave ha yandja ombango kombuze ombwa mena romuzaro wetu. Moruveze rwanao, tu vanga kutja ombunikiro yetu i tjite kutja ovandu ve vange okurihonga ovingi ohunga na Mukuru ngu tu karera, nu ve “yandje ko ondengero komahongero waNdjambi.”—Titus 2:10.
KONḒONONA OUKOTO
Ngatu tare komuano omuzaro nombunikiro yetu mu mai yenene okuvatera varwe okumuna kutja oweṱe Ovakriste.
Ombunikiro yetu i yenena okuraisa kutja tu nondengero kovandu mbe ri mouvara poo indee. Nandarire kutja Jehova u muna imbi mbi ri momitima vyetu, ombunikiro yetu wina i sokuraisa ondengero ku ye
4. Ombunikiro ombwa i raisa ondengero ku Jehova
Epu riṋe enanḓengu tjinene ndi tu hinga kutja tu ripurire kombunikiro yetu? Lesa Epsalme 47:2, nu okuzambo hungirira komapuriro nga:
Hapo okutjiwa kutja tu kuramena po Jehova maku sokuṱuna vi komuano mbu tu rihwikika?
Hapo ohepero okurikenda ohunga nombunikiro yetu, indu tji matu i kozombongarero zombongo nokupita motjiungura tjokuzuvarisa? Omena raye?
5. Ovikeṋa mbi mavi tu vatere okutjita ozondando ozombwa ohunga nomizaro nombunikiro yetu?
Kainatja kutja ozombanda zetu za kosa ovimariva ovingi poo oviṱiṱi, ozo maze sokurira ozongohoke nozohirona otja kongaro aihe mu tu ri. Lesa 1 Ovakorinte 10:24 na 1 Timoteus 2:9, 10. Okuzambo, hungirira kokutja ongwaye tji tu ha sokuzara ozombanda . . .
nḓe he ri ozongohoke poo ozohirona.
nḓe ri ozombame korutu, nḓu maze munine poo nḓu maze tjiti kutja varwe ve kare nomeripura omavi.
Nandarire kutja Ovakriste kave ri kehi yOmatwako wa Moses, owo mave yenene okurihonga ovingi ohunga noumune wa Jehova okuza komatwako ngo. Lesa Deuteronomium 22:5, nu okuzambo hungirira kepuriro ndi:
Ongwaye tji tu ha sokuzara omizaro mbi tjita kutja ovarumendu ve munike tjimuna ovakazendu, poo ovakazendu ve munike tjimuna ovarumendu?
Lesa 1 Ovakorinte 10:32, 33 na 1 Johanes 2:15, 16, nu okuzambo hungirira komapuriro nga:
Ongwaye tji twa sokuripurira komuano ombunikiro yetu mu mai ṱunu ku tjiva momaturiro mu tu kara poo mombongo?
Ovandu momaturiro mu u kara, tjinene ve zara ozombanda nḓe ri vi?
Hapo u muna kutja omuano mbu ve rizara, mape ya au rire omuhirona kOvakriste? Omena raye?
Eṱe matu yenene okurihwikika momiano pekepeke, nu wina atu yenene okuyorokisa Jehova
OVANDU TJIVA VE TJA: “Ami mbi nousemba wokuzara otjiṋa atjihe tji me vanga.”
Hapo mo i kumwe noumune mbwo? Omena raye?
OKUYARUKIRA PO OUSUPI
Indu tji matu tjiti ozondando ozombwa ohunga nozombanda nḓu matu zara nomuano mbu matu vanga okumunika, tu raisa ondengero ku Jehova na ku varwe.
Okurizemburukisa
Ongwaye omuano mbu tu rihwikika nombunikiro yetu tji vi ri ovinanḓengu ku Jehova?
Omirari viṋe tjiva mbi mavi tu vatere okutjita ozondando ohunga nombunikiro yetu?
Ombunikiro yetu i ṱuna vi komuano varwe mu ve vara omerikotameneno wouatjiri?
RIHONGA OVINGI
Tara kutja varwe mape ya ave ripura ye ohunga na ove, indu tji mave tara kozombanda nḓu wa zara.
Ongwaye tje ri ounanḓengu tjinene okuripurira kovikongorere ko ngunda au hi ye ritona okatetu.
“Ombeibela i tja vi ohunga nokuritona okatetu?” (Okarupa okasupi morungovi)
Tara komirari vyarwe mbi mavi yenene okutuvatera okutjita ozondando.
“Hapo omuano mbu u rihwikika u yandja ohiviro ku Mukuru?” (Oruhungu, Septemba 2016)
Omomuano uṋe omukazendu umwe ngwaa vanga okuyorokisa Mukuru me rihongo okuyakura omuano varwe mu ve rihwikika?
“Omuano varwe maave rihwikike aau ndji putarisa” (Penduka!, 22 ku Desemba, 2003)