Ondjozikiro nondengero kehi yondjeverero ya Mukuru

INDU tja ri kombanda yehi, Jesus wa raisa nawa kutja Ihe omundu ngu ri vi nokutja omomuano uṋe eye me ungura oviṋa. Eye wa tja: “Hi tjiti otjiṋa mouvara wandje omuini, nungwari mbi hungira omambo nga porwawo Tate nge Ndji honga . . . Tjinga aruhe ambi tjita imbi mbi tjata ku Ye.” (Johanes 8:28, 29; Ovakolose 1:15) Ku nao, tji matu ripurire komuano Jesus maa tjindi ovakazendu nongaro ndjaa raisa ku wo, tu zuva nawa omuano Mukuru me vara ovakazendu nokutja u undjira tjike ku wo.

Omuano Jesus maa vara ovakazendu wa pangukire oparukaze komuano ovakazendu maave varwa, indu Omaevangeli tjaaye tjangwa. Omomuano uṋe mu wa pangukire? Hapo omahongero we ye yandja ouvara ouingi kovakazendu ndino?

Jesus aa tjindi vi ovakazendu?

Jesus kaa vara ovakazendu otjovandu mbu mave sokuungurisiwa momahakaeneno womonyama uriri. Ovanane vozongamburiro vOvajuda tjiva aave munu kutja okuhakaena ku novakazendu aaku tjiti kutja ve pendure ozonḓuma. Mena rokutja ovakazendu aave varwa otjovandu mbe pendura ozonḓuma, owo kaave yandjerwa okuhungira ku novarumendu momivanda poo okukayenda momivanda nokuhinokuzara erapi momurungu. Posi ya, Jesus wa rakiza ovarumendu kutja ve kare nomeritjaerero nokutjinda ovakazendu momuano omuwa nu wondengero, pendje nokuṱizira ovakazendu ku wo oveni.—Mateus 5:28.

Jesus wina wa tja: “Omurumendu auhe ngu ma isa omukazendu we na kupu warwe, indino eye ma katuka orukupo otja komukazendu we.” (Markus 10:11, 12) Ku nao, eye wa nakaura omahongero wovanane vozongamburiro ngaaye yandjere ovarumendu okuteya orukupo “potjiṋa ngamwa atjihe.” (Mateus 19:3, 9) Omahongero wokukatuka orukupo otja komukazendu we kaaye tjiukwa i yOvajuda ovengi. Omahongero wawo aaye hongo kutja ovarumendu kamaave yenene okukatuka orukupo, ovakazendu aveyerike ombu mave yenene okutjita nao. Embo rimwe ndi hungira ohunga nOmbeibela ri tja: “Indu Jesus tja ṱekisa ovarumendu novakazendu pamwe, kwa tjita kutja ovakazendu ve pewe ondengero nondjozikiro.”

Omuano omahongero wa Jesus mu ye tu ṱuna ndino: Mozombongo zOukriste zOvahongonone va Jehova, ovakazendu ve hungira noupaturuke ku novarumendu pozombongarero zombongo. Nungwari, owo kave tira kutja ovarumendu mave tara ku wo noruhuro, mena rokutja ovarumendu Ovakriste ve tjinda ovakazendu ovakurukaze aayo owo ooina, “novakazendu omitanda aayo owo ovaṱena [kwawo], nondengero aihe.”—1 Timoteus 5:2.

Jesus aa twa po oruveze okuhonga ovakazendu. Ovanane vozongamburiro aave tjiti kutja ovakazendu ve rimune nonḓengu yokehi, posi ya Jesus we ve honga nu we ve tunduuza kutja ve rimune ounanḓengu. Mokuhinokutjaera Maria kutja ma hongwe, Jesus wa raisa kutja omukazendu ka sokukara noviungura ovingi ponganda poo okurikendera kouhepe wavarwe uriri. (Lukas 10:38-42) Marta, ngwa ri omuangu wa Maria, wina wa muna ouwa okuza komahongero wa Jesus otja tji pa raisiwa momaziriro we omawa nga ziri ku Jesus kombunda yonḓiro ya Lasarus.—Johanes 11:21-27.

Jesus wa ri nonḓero moviṋa ovakazendu mbyaave ripura. Indu Jesus tjaa ri kombanda yehi, ovakazendu ovengi vOvajuda aave kambura kutja tji u nomuatje omuzandu nu ngu ri omuprofete, tja ri otjiṋa tjaatji eta ondjoroka tjinene. Indu omukazendu umwe tja tja: “Eṋingandu ezumo nde Ku tjindire.” Jesus wa ungurisa oruveze ndwo okumuraera ohunga notjiṋa otjinanḓengu. (Lukas 11:27, 28) Jesus we mu raisira kutja okukara nonḓuviro ku Mukuru ootjiṋa otjinanḓengu tjinene, okukapita omahongero wozombazu ngaaye ṋiṋikiziwa movakazendu.—Johanes 8:32.

Omuano omahongero wa Jesus mu ye tu ṱuna ndino: Imba mbe hongorera po ombongo yOukriste ve yakura omaziriro wovakazendu pozombongarero zombongo. Owo ve yandja ondengero kovakazendu mbe ‘yandja otjihorera otjiwa,’ indu tji ve ri aveyerike poo movitjitwa vyawo. (Titus 2:3) Owo wina ve kara nongamburiro mu wo indu tji mave zuvarisa ombuze ombwa yOuhona wa Mukuru momivanda.—Joel 2:28, 29; tara kokawongo nga “Hapo omuapostele Paulus kaa yandjere ovakazendu okuhungira?” pomukuma 9.

Jesus ee rikendere kovakazendu. Moruveze rwOmbeibela, ovanatje ovakazona kaave varwa otjovananḓengu pu imba ovazandu. Embo rimwe rozongamburiro ra tja: “Omuṋingandu ingwi ngu novanatje ovazandu, nu owee ku ingwi ngu novanatje ovakazona.” Ovanene tjiva aave vara omuatje omukazona otja ngu nonḓengu yokehi tjinene, nu aave mu pahere omurumendu ave mu yandja pu notjiyandjewa. Nu owo kaave yenene okuyakura ombatero ye nandarire moukurundu wawo.

Indu Jesus tja pendura okakazona ka Jairus na indu tja pendura omuzandu womuhepundu moNain, wa raisa kutja omuinyo wokanatje okakazona omunanḓengu otja omuinyo womuatje omuzandu. (Markus 5:35, 41, 42; Lukas 7:11-15) Kombunda yokuverukisa omukazendu “ngwa ri nombepo ohakohoke ndje mu verisire oure wozombura omurongo na hambondatu,” Jesus we mu isana kutja “ondekurona yaAbraham,” nda ri embo ndi hi na aari tjiukwa momatjangwa wOvajuda. (Lukas 13:10-16) Mokuungurisa embo ewa ndo nondengero, Jesus ka raisire uriri kutja eye omunanḓengu tjimuna ovandu varwe nungwari wina wa muna ongamburiro onḓikame ndja ri na yo.—Lukas 19:9; Ovagalate 3:7.

Omuano omahongero wa Jesus mu ye tu ṱuna ndino: Omuano umwe wohungiriro okuza koAsia u tja: “Okukurisa omuatje omukazona ku ri tjimuna okutjatja otjikunino tjomuraranganda.” Oyo ye heya kutja, okukurisa omuatje omukazona kaku eta ouwa keṱunḓu. Ovarumendu Ovakriste mbe novanatje kave sokuṱunwa i youmune mbwo, posi ya mave sokurikendera kovanatje vawo avehe, ovazandu novakazona. Ovakriste mbe novanatje ve kondja kutja ovanatje vawo avehe ve mune omahongero omawa nokutja ve kare nouveruke ouwa.

Jesus wa ri nongamburiro movakazendu. Mozondjuwo zombanguriro zOvajuda, omahongononeno wovakazendu aaye varwa pondondo imwe tjimuna inga womukarere. Omunamakuruhungi wena Josephus, wa tja: “Omahongononeno wovakazendu kaye sokuyakurwa mena rokutja owo kavandu mbu mo yenene okukambura mu wo.”

Jesus wa pangukire kOvajuda mbo. Eye wa toorora ovakazendu okuraera varwe ohunga nombendukiro ye. (Mateus 28:1, 8-10) Ya ri ouzeu kovaapostele okukambura movakazendu mbo, nandarire kutja ovakazendu va ri mbo indu Jesus tja zepewa nokupakwa. (Mateus 27:55, 56, 61; Lukas 24:10, 11) Indu Jesus tje rimunikisa kovakazendu rutenga, eye wa raisa kutja owo ve nonḓengu imwe tjimuna ovahongewa ve varwe, nu va pwa okumuhongonona.—Oviungura 1:8, 14.

Omuano omahongero wa Jesus mu ye tu ṱuna ndino: Mozombongo zOvahongonone va Jehova, ovarumendu mbe nomerizirira ve raisa onḓero movakazendu mokupuratena koumune wawo. Nu wina ovarumendu Ovakriste mba kupa ve ‘yandja ondengero’ kovakazendu vawo mokupuratena nawa ku wo.—1 Petrus 3:7; Genesis 21:12.

Omirari vyOmbeibela vi vatera ovakazendu okukara nondjoroka

Indu ovarumendu tji mave horere ku Kristus, ovakazendu ve pewa ondengero nouyara Mukuru ndje ve pere okuza kombutiro. (Genesis 1:27, 28) Moruveze rwokumuna kutja owo ovasemba povakazendu, ovarumendu Ovakriste mba kupa ve kongorera omirari vyOmbeibela mbi tjita kutja ovakazendu vawo ve kare nondjoroka.—Ovaefese 5:28, 29.

Indu Yelena tja uta okurihonga Ombeibela, eye aa tjindwa navi i yomurumendu we posi ya ke na pa raera omundu. Omurumendu we, we kurira mongaro ovarumendu maave tono ovakazendu nokuveuma tji mave vanga okuvekupa. Yelena wa tja: “Oviṋa mbi mbe rihonga okuza mOmbeibela aavi ndji pe omasa. Ami mbe rihonga kutja pe nomundu ngwe ndji suvera tjinene nu ngu rikendera ku ami. Ami wina ee tjiwa kutja omurumendu wandje tja utu okurihonga Ombeibela, iho matji tjiti kutja me ndji tjinde momuano omuwa.” Oviṋa mbyaa zeri vya yenenisiwa indu omurumendu we tja uta okurihonga Ombeibela nu kombunda a papitisiwa otja umwe wOvahongonone va Jehova. Yelena wina wa tja: “Eye wa uta okuraisa otjihorera otjiwa tjomeritjaerero. Eṱe twe rihonga okuisirasana. Ami mba muna kutja omirari vyOmbeibela tjiri vye ndji vatera kutja mbi kare nondjoroka na mondjeverero morukupo rwandje.”—Ovakolose 3:13, 18, 19.

Yelena kaye erike ngwa muna ondjoroka. Ovakazendu Ovakriste ovengi pu novarumendu vawo ve kara nondjoroka, indu tji mave kondjo okuṱakamisa omirari vyOmbeibela morukupo rwawo. Owo ve muna ondengero nomahuhumiṋino indu tji ve ri pu novakambure ovakwao.—Johanes 13:34, 35.

Ovarumendu Ovakriste novakazendu, ve tjiwa kutja kavandu ohomonena nu oviutwa vya Mukuru mbya ‘tyerwa kutja ma vi yanda.’ Posi yokutja, mokutumbuka popezu na Ihe wawo Jehova worusuvero, owo ve nomaundjiro wokutja oviutwa “mavi kuturwa koukarere wokutja atjihe tji yanda, nokutja mavi kara norupa monguturiro onandjozikiro yovanatje vaNdjambi.” Tjiri ingo omaundjiro omawa kovarumendu novakazendu kehi yondjeverero ya Mukuru.—Ovaroma 8:20, 21.