Tjita kutja oruveze rwOmariro Omayapuke ru rire oruveze rwondjoroka!

1. Omomuano uṋe mu mo yenene okukurisa ondjoroka yoye moruveze rwOmariro Omayapuke?

¹ Mo vanga okukurisa ondjoroka yoye mu Seninarindi, Kozonyanga na Kambundu? Omuano umwe wokutjita nao, okukara norupa orunene motjiungura tjokuzuvarisa, nu tji mo yenene ritjangisa otjomukandjira omuvatere. Otjiṋa hi matji kurisa vi ondjoroka yoye?

2. Indu tji twa kara norupa orunene motjiungura tjokuzuvarisa matji tu etere vi ondjoroka onyingi?

² Kurisa ondjoroka yoye: Jehova we tu mema kutja tu mune ondjoroka nouṋingandu mbu za mokurikotamena ku ye otja tji matu yenenisa onḓero ndji twa kwatwa na yo, yokuzera oupanga wopopezu kuna ye. (Mat. 5:3) Eye wina we tu mema kutja tu mune ondjoroka mokuyandja ku varwe. (Oviung. 20:35) Otjiungura tjokuzuvarisa tji tu yandjera kutja tu tjite oviṋa vivari mbi, okurikotamena ku Mukuru nokuvatera ovandu. Otjiperi kutja okukara norupa orunene motjiungura tjokuzuvarisa ku tu etera ondjoroka onyingi. Okuweza ko, otja tji matu zuvarisa, opu tu harera ko ondjiviro onyingi. Otja pu matu hara ondjiviro tu kara nongamburiro mu eṱe oveni nu katu kara nemuma rukwao. Matu kara noruveze oruingi rwokuzuvarisa nokuuta omerihongero wOmbeibela ku nomundu. Oviṋa avihe mbi, vi tjita kutja otjiungura tjokuzuvarisa tji tjate ku eṱe.

3. Ongwaye omieze mbi Seninarindi na Kozonyanga tji mavi rire omieze omiwa okuungura otjomukandjira omuvatere?

³ Seninarindi na Kozonyanga omieze omiwa okurira omukandjira omuvatere, orondu mo yenene okutoorora okuungura ozoiri 30 poo 50. Okuweza ko, okuutira mOroviungura raSeninarindi omayuva tji yeri 22 nga keyuva rOmariro omayapuke Omandaha tji yeri 14 ku Kozonyanga, matu kara norupa motjiungura tjokuṋanga ovandu kOmariro Omayapuke. Ozombongo maze kara nondjoroka onene orondu ‘ozo azehe’ maze kara norupa orunene rwokuṋanga ovandu ovengi otja pu maze yenene, moruveze ndu za pewa.—Sef. 3:9.

4. Tji matu vanga okuungura otjovakandjira ovavatere, matu sokutjita vi?

⁴ Rirongera nai: Ndovazu koya tjita nao, tara koprograma yoye nu u tare kutja omarundurukiro waye ngu mo yenene okutjita kutja u kare norupa orunene motjiungura tjokuzuvarisa momueze umwe poo kombanda yanao. Hungira kuna Jehova ohunga nondando yoye ndji. (Jak. 1:5) Hungira ku neṱunḓu roye na varwe mombongo. (Omiano 15:22) Nandarire kutja kaove omuveruke poo u noviungura ovingi, ove wina mo yenene okumuna ondjoroka ndji za mokuungura otjomukandjira omuvatere.

5. Tji twa kara norupa orunene motjiungura tjokuzuvarisa moruveze rwOmariro Omayapuke ndwi, matu munu ouwa waye?

⁵ Jehova u vanga kutja ovakarere ve ve kare nondjoroka. (Eps. 32:11) Tji twa kara norupa orunene motjiungura tjokuzuvarisa moruveze rwOmariro Omayapuke ndwi, matu kurisa ondjoroka yetu nu wina matu yorokisa Tate meyuru.—Omiano 23:24; 27:11.