Omomiano viṋe mu mo sokukumba kutja u zuvirwe?
Jehova Mukuru “u zuvira ozongumbiro.” (Epsalme 65:2) Matu yenene okukumba ku ye oruveze noiri ngamwa aihe, nu nandarire momutima. Jehova u vanga kutja tu mu isane “Tate,” nu tjiri eye ongu ri Tate wetu omusemba. (Mateus 6:9) Norusuvero, Jehova u tu honga kutja ngatu kumbe vi kokutja me tu zuvire.
KUMBA KU JEHOVA OKUPITIRA MU JESUS
“Tate me mu pe ngamwa atjihe tji mamu Mu ningire mena randje.”—Johanes 16:23.
Omambo wa Jesus ngo ye raisa kutja Jehova u vanga kutja tu kumbe ku ye. Atu kumbu okupitira moviserekarera, ovandu mbe varwa kutja ovayapuke, ovaengeli poo ovaṱi, nungwari ngatu kumbe okupitira mena ra Jesus Kristus. Tji matu kumbu ku Mukuru okupitira mena ra Jesus tu raisa kutja twa yakura onḓengu yoviṋa Jesus mbye tu tjitira. Jesus wa tja: “Kape nomundu ngu ma i ku Tate nokuhinaami.”—Johanes 14:6.
KUMBA OKUZA KOMUTIMA
“Mu raereye omaumba weṋu aehe!”—Epsalme 62:8.
Indu tji matu kumbu ku Jehova matu sokuhungira kuna ye tjimuna tji matu hungire kuna tate wetu ngwe tu suvera. Indu tji matu hungire kuna ye matu sokuhungira momuano wondengero nu okuza komutima. Nungwari atu lese okuza momambo poo okukumba ozongumbiro nḓu twe rihonga motjiuru.
KUMBA OTJA KOMBANGO YA MUKURU
“Eye tjinga ama zuvire ozongumbiro zetu tji matu ningire ngamwa otjiṋa otja kombango ye.”—1 Johanes 5:14.
MOmbeibela, Jehova Mukuru u tu raera kutja me ke tu tjitira ye nokutja eye u vanga kutja tu mu tjitire tjike. Kutja Mukuru ma zuvire ozongumbiro zetu, eṱe matu sokukumba “otja kombango ye.” Kunao, matu hepa okurihonga Ombeibela kokutja tu mu tjiwe nawa. Tji twa tjiti nao, ozongumbiro zetu maze tjata ku ye.
MATU YENENE OKUKUMBIRA YE?
Kumbira ovihepwa vyoye. Eṱe matu yenene okukumbira oviṋa mbi matu hepa meyuva tjimuna ovikurya, ozombanda nomaturiro wetu. Nu wina matu yenene okukumbira ounongo wokutjita ozondando ozombwa nomasa wokutjinda omauzeu wetu. Nu wina matu yenene okukumba kutja tu kare nongamburiro, okuisirwa nokuningira ombatero okuza ku Mukuru.—Lukas 11:3, 4, 13; Jakobus 1:5, 17.
Kumbira varwe. Ovanene mba suvera ovanatje vawo ve tjaterwa indu ovanatje vawo tji va suverasana. Oweṱe ovanatje va Jehova, nu eye u tjaterwa tji tu nonḓero mu varwe nokurikendera ovakwetu. Onawa okukumbira omundu ngu twa kupasana, ovanatje vetu, ovazamumwe nomapanga. Omuhongewa wa Jesus Jakobus wa tja: ‘Kumbirasaneye.’—Jakobus 5:16.
Yandja ondangi. Ohunga nOmuute wetu, Ombeibela i tja: “Eye ongu ri Ye ngwi ngu tjita oviṋa oviwa: Eye u mu rokisira ombura okuza keyuru, nu u mu pa omakondero wovikunwa moruveze orusemba; Eye u mu parura novikurya nu e urisa omitima vyeṋu nenyando.” (Oviungura 14:17) Indu tji twe ripura ohunga noviṋa avihe Mukuru mbye tu tjitira, ihi matji tjiti kutja tu tje ndangi ku ye mongumbiro. Eṱe wina tu raisa kutja tu nondangi ku Mukuru mokukara nonḓuviro ku ye.—Ovakolose 3:15.
KARA NOMURETIMA NU PANḒERA POKUKUMBA
Povikando tjiva mape ya atu u momuinyo mena rokuhinokumuna eziriro tjimanga kozongumbiro zetu nḓe za komutima. Hapo iho matji hee kutja Mukuru ke rikendere kweṱe? Kako. Tara kovihorera mbi mavi kongorere mba, mbi mavi raisa kutja matu sokukayenda komurungu okukumba.
Steve, ngwa tamunwa morupa orutenga wa tja: “Okukumba kwe ndji vatera kutja mbi kare nomaundjiro nouṋingandu mehupo randje.” Otjikwaye tji tja runduruka? Eye wa uta okukonḓonona Ombeibela nokurihonga ounahepero wokukumba aruhe. Steve wa tja: “Ami mbi tja ndangi ku Mukuru mongumbiro kombatero ndji mba muna okuza komapanga wandje. Nu nai mbi nondjoroka tjinene.”
Jenny ngwaa munu kutja Mukuru ke nokuzuvira ozongumbiro ze mena rokutja ke nonḓengu, wa tjita vi? Eye wa tja: “Oruveze tjee rimunu okuhinonḓengu, mba ningira Mukuru okundjivatera kutja mbi tjiwe kutja ongwaye tji me munu nao.” Hapo ihi tje mu vatera vi? “Okukumba kwe ndji vatera kutja mbi kare noumune ouwa ohunga na ami omuini nandarire kutja kee rimunu nao. Oyo ye ndji vatera kutja mbi kayende komurungu nu e ha yumbu ohama.” Hapo pa tjitwa ye? “Ongumbiro ye ndji vatera okumuna Jehova otjomundu worusuvero, Mukuru ngu rikendera eṱe, Tate wetu nepanga retu. Ngu me ndji vatere aruhe indu tji me kondjo okutjita imbi eye mbye vanga.”
Indu Isabel tji ma munu omuatje we ama yorokere ehupo, nandarire kutja u nouremane, eye u tja: “Omuatje wandje eziriro kozongumbiro zandje”
Nu wina ngatu tare kotjihorera tja Isabel. Indu tjaari otjingundi, ozonganga ze ze mu raera kutja omuatje we ma kwatwa nouremane. Eye wa wire momuinyo. Tjiva aave mu raere kutja nge riiparekise. Eye wa tja: “Ami ee rikendere tjinene nga tje zeri okukoka.” Eye wa tjita vi? Eye wa tja: “Ami mba kumba ku Mukuru nomasa kutja me ndji vatere.” Kombunda eye wa panduka omuatje omuzandu wena Gerard ngwa ri nouremane. Hapo Isabel u muna kutja Mukuru wa zira ozongumbiro ze? Ii, u muna nao. Omomuano uṋe? Isabel wa zira kutja, “Nai tji me tara omuatje wandje ngu nozombura 14 ama yorokere ehupo re, nandarire kutja u nouremane, eye eziriro kozongumbiro zandje nu otjiyandjewa tjandje okuza ku Jehova Mukuru.”
Oumune ouwa tjimuna mbwo u tu zemburukisa omambo womutjange wEpsalme. Ngu maye tja: “Muhona, Ove u zuvira ozongumbiro zovanandjenda; u ve pendaparisa.” (Epsalme 10:17) Oviṋa avihe mbi mavi raisa kutja tu sokukayenda komurungu okukumba ku Mukuru.
MOmbeibela mu nozongumbiro ozengi nḓa kumbwa i Jesus. Indji ndji tjiukwa tjinene oyo ndji ndja honga ovahongewa ve. Hapo matu rihongere ko ye okuza kongumbiro ndjo?