Vara ongumbiro otjotjiṋa otjinanḓengu mehupo roye

1. Matu sokukara noumune uṋe ohunga nomuano Jehova me tu yandjera okukumba ku ye?

OMUUTE weyuru nehi we tu pa otjiyandjewa otjihuze. Eye u tu yandjera kutja tu kumbe ku ye. Ripura uriri kutja, eṱe matu yenene okukumba ku Jehova okuza komutima moiri na meraka ngamwa arihe nokuhina okuhepa okuningira ousemba. Eṱe matu yenene okukumba ku ye nandarire kutja tu ri mohospitala poo motjovakamburwa, atu nongamburiro kutja Tate wetu worusuvero ma puratene ku eṱe. Eṱe tjiri tu nondangi tjinene kotjiyandjewa ho.

2. Ombara David ya raisa vi kutja aai vara ongumbiro pondondo yokombanda?

² Ombara David aa vara ongumbiro pondondo yokombanda. Eye wa imbura ku Jehova na tja: “Yakura ongumbiro yandje otja ombunguhiro yomoro omuwa.” (Eps. 141:1, 2) Oruveze David tja ri nomuinyo, ovyomoro omuwa mbyaavi ungurisiwa momerikotameneno wouatjiri i yovapristeri, aavi rongerisiwa momuano omuwa. (Eks. 30:34, 35) David aa vanga okuripurira ko nawa ohunga na imbi mbi ma kahungira indu tji ma kumbu ku Jehova, tjimuna ovapristeri tjaave rongerisa nawa ovyomoro omuwa. Eṱe wina tu vanga kutja ozongumbiro zetu ze tjate ku Jehova.

3. Matu sokuraisa ongaro iṋe indu tji matu kumbu ku Jehova, nu omena raye?

³ Indu tji matu kumbu ku Jehova matu sokuraisa ondengero yapeke. Jesaja, Esekiel, Daniel na Johanes va muna ovirimunikise ovihimise. Ovyo vya pangukire, posi ya ovirimunikise mbyo aavi hungirire komundu umwe. Ovyo aavi hungirire ku Jehova otjOmbara onamasa. Jesaja wa “muna Muhona a haama kotjihavero tje tjouhona otjitongame.” (Jes. 6:1-3) Esekiel wa muna Jehova a haama ketemba re romeyuru nu a kondorokwa i ‘yondjerera onene, ndja ri novivara avihe vyouta wombura.’ (Esek. 1:26-28) Daniel wa muna “Umwe ngwa kurupa tjinene” e rihwikike ozombanda ozombapa nu otjihavero tje tjouhona aatji yaka omuriro. (Dan. 7:9, 10) Nu Johanes wa muna Jehova a haama kotjihavero tjouhona tji tja kondorokwa i youta wombura mbu notjivara tjewe esmarag. (Omavan. 4:2-4) Otja tji matu ripurire kondjozikiro Jehova ndje na yo, i tu zemburukisa ondjingonekero yapeke ndji tu na yo yokukumba ku ye nounanḓengu wokutjita nao nondengero. Posi ya matu sokukumba ohunga na tjike?

“NOPU MWA SOKUKUMBA NAI”

4. Matu rihongo tjike okuza komambo Jesus nga hungira pomautiro wongumbiro ndji ri mu Mateus 6:9, 10?

⁴ Lesa Mateus 6:9, 10. MOmazuvarisiro wOkondundu, Jesus wa honga ovahongewa ve okukumba momuano mbu mau tjata ku Mukuru. Jesus tja za nokutja “nopu mwa sokukumba nai,” eye rutenga wa tamuna oviṋa ovinanḓengu indu tjaa kumbu. Eye wa kumbira ena ra Jehova kutja ri yapurwe, Ouhona wa Mukuru kutja u ye, mbu mau yekunyona avehe mbe pirukira Mukuru, noviṋa oviwa mbi ma eta kehi na kovandu moruyaveze. Tji twa tamuna oviṋa otja imbyo mozongumbiro zetu, matu raisa kutja ombango ya Mukuru onanḓengu ku eṱe.

5. Hapo Jehova u puratena indu tji matu kumbu ohunga nomauzeu wetu?

⁵ Morupa ndwa kongorera ko mongumbiro ndjo, Jesus wa raisa kutja onawa okukumba ohunga nomauzeu wetu. Matu yenene okuningira Jehova okutupa ovikurya vyetu vyeyuva arihe, okuisira omauvi wetu, okututjevera kutja atu ha hiti momarorero, nokutuyama ku ingwi omunaurunde. (Mat. 6:11-13) Indu tji matu ningire oviṋa mbi ku Jehova, eṱe tu raisa kutja matu tjiwa kutja tu hepa ombatero ye, nokutja tu vanga okuyorokisa omutima we.

6. Hapo tji matu kumbu, matu sokuningira oviṋa mbya tjangwa mongumbiro Jesus ndje tu pa uriri? Kahurura.

⁶ Jesus kaa undjire ko kutja ovemukongorere ve yarukire po omambo nge ri mongumbiro ndjo otja tji ye ri. Mozongumbiro zarwe Jesus nḓaa kumbu, eye wa tamuna oviṋa vyarwe mbya ri ovinanḓengu ku ye moruveze ndwo. (Mat. 26:39, 42; Joh. 17:1-26) Eṱe wina matu yenene okukumba ohunga notjiṋa atjihe tji matji tu kendisa. Eṱe tji tu nomukambo mbu matu vanga okutoora, matu yenene okuningira ounongo nondjiviro mongumbiro. (Eps. 119:33, 34) Indu eṱe tji matu utu okuungura otjiungura otjizeu, wina matu yenene okuningira ondjiviro nozondunge. (Omiano 2:6) Ovanene mave yenene okukumbira ovanatje vawo, nu ovanatje mave yenene okukumbira ovanene vawo, neṱe atuhe matu sokukumbira ovahongwa vetu vOmbeibela na imba ku tu zuvarisa ko. Posi yokutja tji matu kumbu, katu sokuningira ombatero uriri.

7. Omena raye tji matu sokutanga Jehova mongumbiro?

⁷ Eṱe matu sokuzemburuka okutanga Jehova mozongumbiro zetu. Kape nomundu ngwa pwa ondangero okukapita Mukuru wetu. Eye “omuwa, nu u isira.” Eye wina ‘u notjari nounyaṋutima; u nomuretima nondjingonekero onene nouṱakame.’ (Eps. 86:5, 15) Ku nao, eṱe tu na epu ewa okutanga Jehova mena rovikaṋena vye na imbi mbye tjita.

8. Oviṋa viṋe tjiva Jehova mbye tu pa mbi tu nondangi ku vyo? (Epsalme 104:12-15, 24)

⁸ Tu tanga Jehova mozongumbiro zetu, nu matu yenene okutja ndangi koviṋa oviwa mbye tu pa. Otjotjihorera, matu yenene okutja ndangi kovivara oviwa pekepeke mbi tu muna movimbloma, kovikurya oviwa pekepeke nondjoroka ndji tu muna mokukara pu nomapanga omawa. Tate wetu worusuvero u tu pa oviṋa mbi, na vyarwe ovingi kokutja tu kare nondjoroka. (Lesa Epsalme 104:12-15, 24.) Nu tjinenenene matu tja ndangi ku Jehova, kondjivisiro aihe ndje tu pa okukurisa ongamburiro yetu, na komaundjiro omawa ngu tu na wo woruyaveze.

9. Ovikwaye mbi mavi tu vatere okuzemburuka okutja ndangi ku Jehova? (1 Ovatesalonika 5:17, 18)

⁹ Povikando tu zemba okutja ndangi ku Jehova ku avihe mbye tu tjitira. Ovikwaye mbi mavi ku vatera kutja u zemburuke? Mo yenene okutjanga oviṋa pekepeke mbi wa kumbira, nu kombunda o tara komuano ma zuvira ozongumbiro zoye. Okuzambo i tja ndangi ku ye mongumbiro. (Lesa 1 Ovatesalonika 5:17, 18.) Ripura notjiṋa hi: Eṱe tu kara nondjoroka nu tu muna kutja twa suverwa indu varwe tji ve tu raisire ondangi. Momuano otjingewo, indu tji twa zemburuka okutja ndangi ku Jehova kutja wa ziri ozongumbiro zetu, iho tji yorokisa omutima we. (Kol. 3:15) Posi yokutja pe nepu rarwe enanḓengu ku matu sokutjera ndangi ku Mukuru wetu.

I TJA NDANGI KU JEHOVA KOMUNA WE OMUSUVERWA

10. Otja ku 1 Petrus 2:21, ongwaye tji matu sokutja ndangi ku Jehova mena rokuhinda Jesus kombanda yehi?

¹⁰ Lesa 1 Petrus 2:21. Eṱe matu sokutja ndangi ku Jehova, mena rokutja wa hinda Omuna we omusuverwa okuyekutuhonga. Indu tji matu konḓonona ehupo ra Jesus, tu rihonga oviṋa ovingi ohunga na Jehova, nomuano mu matu yenene okumuyorokisa. Eṱe tji twa raisa ongamburiro mombunguhiro ya Kristus, matu yenene okukara noupanga wopopezu ku na Jehova Mukuru na tu yorokere ohange pu na ye.—Rom. 5:1.

11. Omena raye tji tu kumba mena ra Jesus?

¹¹ Eṱe tu nondangi ku Jehova kutja tu yenena okukumba ku ye okupitira mOmuna we. Jehova u ungurisa Jesus okutupa imbi mbi twa ningire. Jehova u puratena nu u zira ozongumbiro nḓa kumbwa mena ra Jesus. Jesus wa tja: “Atjihe tji mamu ningire mena randje, Ami me tji tjiti, kokutja Tate a hivirikwe mOmuna.”—Joh. 14:13, 14.

12. Ongwaye tji matu sokuraisa ondangi ku Jehova kutja we tu pa Omuna we?

¹² Jehova u isira ozondjo zetu mena rotjisuta tjonguturiro tja Jesus. Omatjangwa ye tja Jesus ‘Omupristeri Otjiuru ngwa kakara pehi kokunene kwotjihavero tjouhona wounenenene waNdjambi meyuru.’ (Hebr. 8:1) Jesus ‘omutuhungirirepo ku Tate.’ (1 Joh. 2:1) Eṱe tu nondangi ku Jehova ngwe tu pa Omupristeri Otjiuru ngu notjari na eṱe, nu ngu zuva oungundipare wetu nu ngu “tu hekenena ku Ye.” (Rom. 8:34; Hebr. 4:15) Eṱe kaweṱe ovandu ohomonena, nu nokuhinombunguhiro ya Jesus katja tu yenena okuhakaena ku na Jehova mongumbiro. Otjingaperi kutja eṱe kamaatu yenene okuyandja ondangi ku Jehova ndja yenene kotjiyandjewa tjOmuna we otjihuze tje tu pa.

KUMBIRA OVAKAMBURE OVAKWEṊU

13. Mongurova komurungu wonḓiro ye, Jesus wa raisa vi kutja wa suvera ovahongewa ve?

¹³ Mongurova komurungu wonḓiro ye, Jesus wa kumbira ovahongewa ve ama ningire Ihe kutja e “ve tjevere ku ingwi Omurunde.” (Joh. 17:15) Iho aatji raisa orusuvero Jesus ndwa ri na ro kovahongewa ve. Eye ee rikendere ovaapostele ve, nandarire kutja eye omuini aa tjiwa kutja wa kuramenwa i yomauzeu omanene.

14. Eṱe tu raisa vi kutja twa suvera ovakambure ovakwetu?

¹⁴ Eṱe tu horera ku Jesus indu tji tu hi nokuripurira kovihepwa vyetu uriri. Nungwari, eṱe aruhe tu kumbira ovakambure ovakwetu. Indu tji twa tjiti nao, tu raisa onḓuviro kerakiza ra Jesus rokusuvera ovakwetu, nu tu raisira Jehova omuano mbu twa suvera ovakambure ovakwetu. (Joh. 13:34) Okukumbira ovakambure ovakwetu maku ve vatere. Embo ra Mukuru ri tu raera kutja, “ongumbiro yomunangamburiro i sora oviṋa avihe.”—Jak. 5:16.

15. Omena raye ovakambure ovakwetu tji ve hepa ozongumbiro zetu?

¹⁵ Ovakambure ovakwetu ve hepa ozongumbiro zetu mena rokutja ve muna omauzeu omengi. Eṱe matu yenene okuningira Jehova kutja me ve vatere okutjinda omitjise, omaumba tjimuna omanyinganyingiro wehi, ovita, ondatumisire nomauzeu warwe. Eṱe wina matu yenene okukumbira ovakambure ovakwetu mbe ungura oukukutu okuvatera imba mbe nouhepe. Mape ya ove otjiwa tjiva vawo mbe muna ouzeu otjingewo. Ove mo yenene okutamuna omana wawo mongumbiro yoye. Eṱe tu raisa orusuvero rwatjiri indu tji matu ningire Jehova okuvevatera.

16. Ongwaye tji matu sokukumbira imba mbe tu hongorera po?

¹⁶ Imba mbe tu hongorera po mombongo, ve kara nondangi onene indu tji matu tamuna omana wawo mozongumbiro zetu, nu ozongumbiro nḓo ze ve vatera. Omuapostele Paulus aa tjiwa kutja ma hepa varwe okumukumbira. Eye wa tja: “Wina ndji kumbireye kokutja tji me zuvarisa, Ndjambi e ndji pe omambo omasemba wokutjivisa omahorekwa wOmbuze Ombwa nokuhinooma.” (Ef. 6:19) Ndino wina tu novarumendu mokati ketu mbe ungura oukukutu okutuhongorera po. Eṱe tu raisa orusuvero ku wo mokuningira Jehova kutja ma sere oviungura vyawo ondaya.

INDU TJI MO KURAMENE PO VARWE MONGUMBIRO

17-18. Oruṋe tji mape ya atu ningirwa okukuramena po varwe mongumbiro, nu otjikeṋa tji matu sokuzemburuka?

¹⁷ Povikando tjiva, tu ningirwa okukuramena po varwe mongumbiro. Otjotjihorera, omukazendu omukambure ngu ma hongo omuhongwa Ombeibela, mape ya a ningire omukwao ngu va yende pamwe okukumba. Omukazendu omukambure ngu va yende pamwe mape ya a ha tjiwa omuhongwa nawa, ku nao mape ya a vanga okupata nongumbiro. Momuano mbwo, otji ma yenene okutjiwa kutja ovikeṋa mbi ma hepa okutamuna mongumbiro indu tji ma kumbire omuhongwa.

¹⁸ Omurumendu omukambure mape ya a ningirwa okukumba pombongarero yokukazuvarisa poo pombongarero yombongo. Ovarumendu ovakambure mbe nomerizirira ngo, ve sokuzemburuka kutja indji ombongarero yaye. Ongumbiro kai sokuungurisiwa okuvyura nokuhonga ombongo poo okutjivisa omatjivisiro. Pozombongarero ozengi zombongo, pe yandjwa ozominute ndano keimburiro nongumbiro, ku nao omurumendu omukambure ngu ma kumbu ka hepa okukumba ozongumbiro “ozonde,” tjinenenene pomautiro wombongarero.—Mat. 6:7.

ONGUMBIRO NGA I RIRE OTJIṊA OTJINANḒENGU MEHUPO ROYE

19. Otjikeṋa tji matji tu vatere okurirongera keyuva rombanguriro ya Jehova?

¹⁹ Eṱe matu hepa okutjita kutja ongumbiro i rire otjiṋa otjinanḓengu tjinene mehupo retu, mena rokutja eyuva rombanguriro ya Jehova riri popezu. Mena ranao, Jesus wa tja: “Kareye katumba nu mu kumbe aruhe kutja mu hare omasa okutuurunga nokuhinotjipo mu imbi avihe mbi mavi tjitwa.” (Luk. 21:36) Indu tji matu kumbu aruhe, ongamburiro yetu mai kurire ko, nu eṱe matu rirongere keyuva rombanguriro ya Mukuru.

20. Omomuano uṋe ozongumbiro zetu mu maze yenene okukara tjimuna ovyomoro omuwa?

²⁰ Twa hungirire ku ye? Eṱe tu vara ongumbiro otjotjiṋa otjinanḓengu tjinene. Oviṋa ovinanḓengu tjinene mbi tu sokukumbira, oviṋa mbi tjama nondando ya Jehova. Eṱe wina tu raisa ondangi kOmuna wa Mukuru nOuhona we mbu honapara, nu tu kumbira ovakambure ovakwetu. Jehova wina u vanga kutja tu kumbire ovihepwa vyetu vyeyuva arihe nokumuningira okukurisa ongamburiro yetu. Indu tji matu ripura nongengezero ohunga noviṋa mbi matu hungire mozongumbiro zetu, tu raisa kutja tu vara ongumbiro otjotjiṋa otjinanḓengu tjinene. Omambo wetu maye kara tjimuna ovyomoro omuwa ku Jehova nu Eye ma kara “nonyuṋe.”—Omiano 15:8.