Omapuriro okuza kovalese
Epsalme 12:7 ri hungirira ku ye?
Oviṋa mbya tjangwa mekondwa ndo mavi raisa kutja etjangwa ndi mari hungirire kovandu.
Epsalme 12:1-4 ri tja: “Ovaṱakame kave tji mo mokati kovandu.” Nu okuzambo, Epsalme 12:5-7, ri tja:
“Nungwari Muhona ma tja nai:
‘Nambano Ami me ya, orondu ovingundi vi tatumisiwa,
novasyona ve tjema momihihamo vyawo.
Me yandja ombwiro ku imba mbe nonḓero na yo.’
Omambo waMuhona owo omaṱakame;
ye ri otja osilveri ndja zuzurwa mezuko, nu ndja kohororwa potuhambombari.
[Jehova, ove mo ve tjevere.
Ove mo ṱakamisa auhe wawo okuza komuhoko mbwi nga aruhe, NWT].”
Ezeva 5 mari hungire ohunga na imbi Mukuru mbi ma katjitira imba “ovingundi” mbe tatumisiwa. Eye me ve yama.
Ezeva 6 mari weza kutja: “Omambo waMuhona owo omaṱakame; ye ri otja osilveri ndja zuzurwa mezuko.” Ihi tji raisa oumune wetu ohunga nomambo wa Jehova nge ri mOmbeibela.—Eps. 18:30; 119:140.
Momatorokero wOzombeibela tjiva, Epsalme 12:7 ra torokwa nai: “Ove mo ye tjevere.”
Mena rokutja ezeva 6 ri tja, “Omambo waMuhona,” tjiva ve muna kutja Mukuru ma hungire ohunga nomambo we. Nu eṱe matu tjiwa kutja Mukuru wa tjevera Ombeibela, nandarire kutja ovapirukire va tjita ozongondjero ozengi okutjaera kutja ai ha ungurisiwa nu va kondja okuinyona.—Jes. 40:8; 1 Petr. 1:25.
Nungwari, otjingaperi kutja Jehova wina u ṱakamisa ovandu mba tamunwa mezeva 5. Nu ma kayenda komurungu okuvatera nokuyama imba ovingundi mbe tatumisiwa.—Eps. 6:4; 31:1, 2; 54:7; 145:20.
Ku nao, otja kezeva 7, hapo Jehova ma tjevere ovandu poo ma tjevere omambo we?
Indu tji twa tara nawa kEpsalme ndi, oukahu kutja ezeva ndi mari hungirire kovandu.
Pomautiro wEpsalme 12:1, David u hungira ohunga novakarere va Jehova ovaṱakame mba korerwa ovizeze i yovandu ovarunde. Okuzambo tu lesa kutja Jehova ma toora omikambo ku imba mbe hungira oviṋa ovivi. Epsalme mari tu pe omakwizikiro wokutja matu yenene okukara nongamburiro kutja Mukuru ma tjevere ovakarere ve, mena rokutja omambo we omaṱakame.
Ku nao, ezeva 7 mari tja Jehova ma tjevere nokuṱakamisa ovandu mba hihamisiwa i yovarunde.
Nu hapo, omena raye omatorokero wOzombeibela tjiva tji ye tja mezeva 7: “Ove mo ye tjevere”? Omambo ngo ya ungurisiwa moviherengururwa vyOmatjangwa wOtjiheberi. Posi yokutja, omatorokero omatenga wOtjiheberi mOtjigrike ya ungurisa omambo nga, “Eye me tu tjevere” na inga “Eye me tu ṱakamisa.” Ku nao, omambo ngo ye hungirira ku imba ovaṱakame mbe ri ovingundi nu mbe tatumisiwa. Eye me ve ṱakamisa “komuhoko,” mbu ri ovandu mbe tjita ourunde. (Eps. 12:7, 8, NWT) Momatorokero wOmatjangwa wOtjiheberi meraka rOtjiaramei, ezeva 7 ri tja: “Ove, MUHONA, mo tjevere ovasemba, mo ve ṱakamisa komuhoko omurunde mbwi nga aruhe.” Oviṋa mbi mavi raisa kutja Epsalme 12:7, NWT, kari hungirire komambo wa Mukuru.
Ku nao, omambo nge ri mezeva ndi, ye yandja omaundjiro kovakarere va Mukuru “ovaṱakame,” kutja Mukuru me ve yama.