Rira omurisusuparise indu tji pe noviṋa mbi u hi nokutjiwa

1. Jehova we tu mema momuano uṋe, nu omena raye?

JEHOVA we tu mema momuano omuhimise. Eṱe tu yenena okuripura, nokurihonga oviṋa ovipe, nokuṱakamisa imbi mbi matu rihongo. Ongwaye tje tu mema momuano mbwo? Jehova u vanga kutja tu toore omikambo omisemba mbya zikamene kondjiviro youatjiri, otja tji matu mu karere.—Omiano 2:​1-5; Rom. 12:1.

2. (a) Ovikwaye mbi matu hepa okutjiwa ohunga na eṱe oveni? (Ovaroma 11:​33, 34) (Wina tara kotjiperendero.) (b) Ongwaye tje ri ounanḓengu okutjiwa kutja katu nokuhepa okutjiwa oviṋa avihe?

² Jehova we tu mema kutja tu yenene okurihonga oviṋa ovingi, posi ya pe noviṋa tjiva mbi tu hi nokutjiwa. (Lesa Ovaroma 11:​33, 34.) Tara kotjihorera tja Job. Jehova wa pura Job omapuriro omengi nge mu vatera okumuna kutja pa ri noviṋa ovingi mbyaa ha tjiwa. Ihi tje mu vatera okumuna kutja ma hepa okurira omurisusuparise nokurundurura oumune we. (Job 42:​3-6) Eṱe tu muna ouwa indu tji twa yakura kutja katu tjiwa oviṋa avihe. Indu tji twa zemburuka kutja pe noviṋa ovingi mbi tu hi nokutjiwa, ihi tji tu vatera kutja tu rire overisusuparise, nokukara nongamburiro mu Jehova kutja aruhe u tu raera imbi mbi matu hepa okutjiwa kokutja tu toore omikambo omisemba.—Omiano 2:6.

3. Matu katara ku ye morupa ndwi?

³ Morupa ndwi, matu katara koviṋa tjiva mbi tu hi nokutjiwa nomauzeu nge etwa i yokuhinokutjiwa. Nu wina matu kerihonga kutja ongwaye tje ri otjiṋa otjiwa okutjiwa kutja katu tjiwa oviṋa tjiva. Oviṋa mbi matu rihongo mavi tu vatere kutja tu kare nongamburiro mu Jehova ngu ‘nondjiviro onene,’ nu ngu tu raera oviṋa avihe mbi matu hepa okutjiwa.—Job 37:16.

EṰE KATU NOKUTJIWA KUTJA OMAANDERO MAYE YA RUṊE

4. Otja ku Mateus 24:​36, otjikwaye tjimwe tji tu ha tjiwa?

⁴ Lesa Mateus 24:36. Eṱe katu tjiwa kutja omaandero wouye mbwi maye ya ruṋe. Nu wina Jesus tja ri kombanda yehi eye kaa tjiwa “eyuva ndo na indji oiri.”a Eye kombunda wa raera ovaapostele ve kutja Jehova ongu nousemba wokutya kutja ovitjitwa kaaṋi mavi tjitwa ruṋe. (Oviung. 1:​6, 7) Jehova wa twa po kutja omaandero maye ya ruṋe, posi ya eṱe katu tjiwa kutja ma rire ruṋe.

5. Mena rokutja katu nokutjiwa kutja omaandero maye ya ruṋe, ihi mape ya atji tu ṱunu vi?

⁵ Eṱe katu nokutjiwa kutja matu hepa okuundja orure ndu ṱa pi ngunda omaandero aye hi ye ya. Ku nao, eṱe mape ya atu ha kara nomuretima poo atu u momuinyo, tjinenenene indu tji twa undja orure. Eṱe mape ya atu u momuinyo indu tjiva meṱunḓu retu poo varwe tji mave tu nyekerere mena rokutja omaandero kayee ya. (2 Petr. 3:​3, 4) Eṱe mape ya atu ripura kutja indu tji twa tjiwa eyuva omaandero tji maye ya, mape ya atu kara nomuretima nu ai rire oupupu kweṱe okutjinda omanyekererero okuza ku varwe.

6. Ongwaye tje ri otjiṋa otjiwa kweṱe okuhinokutjiwa kutja omaandero maye ya ruṋe?

⁶ Mena rokutja Jehova ke tu raere kutja omaandero maye ya ruṋe, eṱe tu yenena okuraisa kutja twe mu suvera nokutja tu nongamburiro mu ye. Eṱe katu vanga okukarera Jehova ngandu omaandero tji ye ya uriri, nungwari tu vanga okumukarera nga aruhe. Pendje nokuripura tjinene ohunga nokutja “Eyuva raNdjambi” mari ya ruṋe, eṱe matu sokuyandja ombango koviṋa oviwa mbi mavi yenenisiwa indu eyuva ndo tji re ya. Okutjita nao, maku tu vatere okuryama popezu na Jehova, nokukara nongamburiro mu ye, nokutjita avihe mbi mavi mu yorokisa otja pu matu yenene.—2 Petr. 3:​11, 12.

7. Hapo eṱe matu tjiwa ye?

⁷ Ounahepero kweṱe okuripura ohunga noviṋa mbi matu tjiwa. Eṱe matu tjiwa kutja omayuva omasenina ya uta mombura ndji 1914. MOmbeibela, Jehova we tu pa omaprofetero nge raisa kutja omayuva omasenina maye utu mombura ndji 1914. Eye wina we tu raera kutja kombunda yombura ndjo ozongaro mouye maze sana pi. Mena rokutja omaprofetero nga ya yenenisiwa, eṱe tu nongamburiro kutja “eyuva enene raMuhona ri ri popezu.” (Sef. 1:14) Eṱe wina tu tjiwa kutja Jehova u vanga kutja tu raere ovandu ovengi otja pu matu yenene “Ombuze Ombwa yOuhona.” (Mat. 24:14) Eṱe tu zuvarisa ombuze ndji ape momahi 240 na momaraka nge ri kombanda 1 000. Eṱe katu hepa okutjiwa “eyuva ndo na indji oiri,” kutja tu zuvarise noupyuke.

EṰE KATU TJIWA KUTJA JEHOVA ME KETUVATERA VI

8. “Oviungura vyaNdjambi” vi heya tjike? (Omuzuvarise 11:5)

⁸ Kaaruhe tji tu tjiwa “oviungura vyaNdjambi.” (Lesa Omuzuvarise 11:5.) Omambo ngo ye heya oviṋa Jehova mbye tjita, poo mbye yandjera kutja vi tjitwe okuyenenisa ombango ye. Eṱe katu tjiwa nawa kutja omena raye Jehova tje yandjera oviṋa tjiva okutjitwa, poo kutja omomuano uṋe mu me tu vatere. (Eps. 37:5) Ombeibela i sasaneka okuhinokutjiwa “oviungura vyaNdjambi” ku nomuano okanatje mu ke kura mezumo raina, tji tji ri otjiṋa ovanongonone ngamba tji ve ha zuu nawa. Momuano tjingewo, eṱe katu tjiwa nawa kutja Jehova ma katjita oviṋa momuano uṋe.

9. Hapo mape ya atu utu okuripura ohunga na tjike mena rokuhinokutjiwa nawa kutja Jehova ma katjita oviṋa momuano uṋe?

⁹ Mena rokutja katu nokutjiwa nawa omuano Jehova mu me ketuvatera, mape ya atu keyakeya okutoora omikambo kaaṋi. Mape ya atu keyakeya okutjita ozongondjero kutja tu ungure ovingi motjiungura tjokuzuvarisa, poo okutjindira koṋa ku ku nouhepe wovazuvarise. Poo mape ya atu munu kutja Jehova ke nohange na eṱe indu tji tu ha yenenisire ozondando zetu motjira tje, na indu tji tu ha munu ovahongwa vOmbeibela nandarire kutja tu ungura oukukutu motjiungura tjokuzuvarisa. Poo indu tji tu muna omauzeu motjiungura tjapeke tji tu ungura motjira tja Jehova.

10. Ovikaṋena viṋe ovinanḓengu mbi tu yenena okukara navyo mena rokutja katu tjiwa nawa oviṋa Jehova mbi ma katjita?

¹⁰ Mena rokutja katu nokutjiwa nawa oviṋa Jehova mbi ma katjita, eṱe tu yenena okukara novikaṋena ovinanḓengu tjimuna omerisusuparisiro. Ihi tji tu vatera kutja tu yakure kutja omeripura wa Jehova nozondjira ze za kapita inḓa ozetu. (Jes. 55:​8, 9) Eṱe wina tu rihonga okukara nongamburiro okuura mu Jehova kutja oviṋa avihe mbi ma katjita mavi kara nondoṋeno. Indu tji twa munu ondoṋeno motjiungura tjokuzuvarisa poo motjiungura tjarwe motjira tja Jehova, eṱe tu yandja ondangero ku Jehova ndje mu pwira. (Eps. 127:1; 1 Kor. 3:7) Indu oviṋa tjiva tji vi ha tjitirwe otja komuano mbu matu undjire ko, eṱe matu hepa okuzemburuka kutja Jehova u muna oviṋa avihe. (Jes. 26:12) Eṱe tu ungura otja pu matu yenene, nokukara nongamburiro kutja Jehova aruhe me tu vatere. Eṱe tu nongamburiro kutja me tu hongorere po nandarire kutja kamomuano omuhimise tjimuna tjaa tjiti morukapitaveze.—Oviung. 16:​6-10.

11. Ovikwaye ovinanḓengu mbi matu tjiwa?

¹¹ Eṱe matu tjiwa kutja Jehova u norusuvero, nousemba, nounongo. Eṱe matu tjiwa kutja Jehova u nondangi koviṋa mbi tu mu tjitira na mbi tu tjita kovakambure ovakwetu. Nu matu tjiwa kutja Jehova aruhe u yandja ondjambi ku imba mbe ri ovaṱakame ku ye.—Hebr. 11:6.

KATU TJIWA KUTJA EYUVA RA MUHUKA MARI ETA YE

12. Matu rihongo tjike okuza ku Jakobus 4:​13, 14?

¹² Lesa Jakobus 4:​13, 14. Eṱe katu tjiwa kutja eyuva ra muhuka mari eta ye. Mouye mbwi “oruveze rwokumuna ouhumandu ru ya” kovandu avehe. (Omuzuv. 9:11) Ku nao, eṱe katu tjiwa kutja ozondando zetu maze kara nondoṋeno poo matu kara nomuinyo okuzeyenenisa.

13. Okuhinokutjiwa ohunga noruyaveze mape ya aku tu ṱunu vi?

¹³ Mape ya a rire ouzeu kweṱe okupanḓera po mena rokutja katu tjiwa kutja ovikwaye mbi mavi katjitwa moruyaveze. Ongwaye tji matu tja nao? Indu tji matu rikende tjinene ohunga nokutja ovikwaye mbi mape ya avi katjitwa, iho matji yenene okutjita kutja tu pandjare ondjoroka yetu. Ehupo retu mape ya ari tanauka ngunda atu hi nokuundjira ko, poo oviṋa ovivi tjinene mape ya avi tjitwa tjimanga. Nu oviṋa avihe mbi mape ya avi tjiti kutja tu pindike nokutukurungisa momuinyo. Nu indu ozondando zetu tji ze ha yenenisirwe, mape ya atu rihahiza natu u momuinyo.—Omiano 13:12.

14. Ovikwaye mbi matu hepa okutjiwa nokutjita kutja tu kare nondjoroka yatjiri? (Wina tara koviperendero.)

¹⁴ Kainatja kutja pa tjitwa ye mehupo retu, eṱe tu yenena okuraisa kutja tu karera Jehova mena rokutja twe mu suvera nu kamena rokutja tu ripurira kweṱe oveni. Omahungi yOmbeibela ye raisa kutja kaaruhe Jehova tji me tu tjevere kotjiṋa ngamwa otjivi, nokutja ka twa po komurungu woruveze kutja ovikwaye mbi mavi katjitwa mehupo retu. Eye u tjiwa kutja matu yenene okukara nondjoroka nandarire kutja katu nokutjiwa oviṋa avihe mbi mavi katjitwa kweṱe. Nungwari, eṱe matu yenene okukara nondjoroka indu tji matu ningire omuhunga nokukara nonḓuviro ku ye. (Jer. 10:23) Indu tji matu toora omikambo nombatero ya Jehova, pa sana aayo matu tja “Muhona tja vanga, tji tu ha ṱire, matu tjiti ihi poo hina.”—Jak. 4:15.

15. Matu tjiwa ye ohunga noruyaveze?

¹⁵ Eṱe katu tjiwa kutja eyuva arihe mari eta ye, posi ya tu tjiwa kutja Jehova we tu kwizikira omuinyo waaruhe, nandarire kutja tu nomaundjiro wokukahupa meyuru poo kombanda yehi. Eṱe tu tjiwa kutja eye ka korovizeze nu kape notjiṋa tji matji mu tjaere okuyenenisa omakwizikiro we ayehe. (Tit. 1:2) Eye erike ongu ma yenene okutja: “Okuza kombutiro Ami mba tjivisire oruveze ndu maru ya. Okuza korukuru Ami mba zuvarisira ko imbi mbi mavi katjitwa.” Oviṋa avihe eye mbya hunganeka mOmbeibela vya yenenisiwa, nu oviṋa avihe mbya hunganeka ohunga noruyaveze mavi kayenenisiwa wina. (Jes. 46:10) Eṱe matu tjiwa nawa kutja kape notjiṋa tji matji tjaere Jehova okutusuvera. (Rom. 8:​35-39) Eye me tu huhumiṋa, nokutupa ounongo, nomasa ngu matu hepa okutuurunga ngamwa otjiṋa tji matji ya mondjira yetu. Eṱe matu yenene okukara nongamburiro kutja Jehova me tu vatere nu me tu sere ondaya.—Jer. 17:​7, 8.

EṰE KAMAATU YENENE OKUZUVA NAWA OMUANO JEHOVA ME TU TJIWA

16. Ovikwaye Jehova mbye tjiwa ohunga na eṱe, nu otjiṋa ho tji ku ṱuna vi? (Epsalme 139:​1-6)

¹⁶ Lesa Epsalme 139:​1-6. Omuute wetu u tjiwa oviṋa avihe ohunga na eṱe. Eye u tjiwa kutja omena raye tji tu ripura nokufula omuano kaaṋi mbwo. Eye u tjiwa oviṋa mbi matu hungire noviṋa mbi ri momutima wetu. Eye wina u tjiwa oviṋa avihe mbi tu tjita, nokutja omena raye tji tu vi tjita. Ombara David wa tja, Jehova we rirongera okutuvatera nu ma yenene okutjita nao. Tjiri, otjiṋa otjiwa okutjiwa kutja Mukuru Omunamasaaehe ngwa mema eyuru nehi u rikendera kweṱe tjinene. David wa tja: “Okundjitjiwa kwoye kwe ndji himisa tjinene, okwo kwa kapita ondjiviro yandje.”—Eps. 139:6.

17. Ongwaye tji mape ya arire ouzeu kweṱe okukambura kutja Jehova u tu tjiwa nawa?

¹⁷ Ngahino mena romekurisiro wetu, ombazu poo oviṋa mbyaatu kambura mo ngunda atu hi ye rihonga ouatjiri, mape ya a rire ouzeu okumuna kutja Jehova oIhe worusuvero ngu rikendera kweṱe. Poo mape ya atu munu kutja ozondataiziro nḓu twa tjita morukapitaveze ozombi tjinene ngandu Jehova tje ha vanga okututjiwa. Poo mape ya atu munu kutja eye u ri kokure na eṱe. Nu nandarire David povikando tjiva wa ri noumune tjingewo. (Eps. 38:​18, 21) Mape ya omundu ngu kondja oukukutu okutanaura ehupo re nokuhupa otja komuano mbu tjata ku Jehova e ripura kutja: ‘Ndoovazu Mukuru u ndji tjiwa nawa, omena raye tje he ndji yakura otja tji mbi ri?’

18. Omena raye tje ri ounanḓengu kweṱe okuyakura kutja Jehova u tu tjiwa okukapita eṱe oveni? (Wina tara koviperendero.)

¹⁸ Eṱe matu yenene okurihonga okuyakura kutja Jehova u tu tjiwa okukapita eṱe oveni nokutja eye u yenena okumuna ouwa mweṱe, eṱe mbu tu ha munu. Eye we tu suvera, nandarire kutja u muna ozondataiziro zetu nu u tjiwa kutja ongwaye tji tu fula nokuritjinda momuano kaaṋi. (Rom. 7:15) Indu tji twa tjiwa kutja Jehova aruhe u muna ouwa mweṱe, maku tu pe omasa ngu matu hepa okumukarera nouṱakame nondjoroka.

19. Ovikwaye mbi matu tjiwa nawa ohunga na Jehova?

¹⁹ Eṱe matu tjiwa nawa kutja Jehova orusuvero. (1 Joh. 4:8) Matu tjiwa nawa kutja oviṋa avihe mbye tu raera kutja ngatu tjite poo atu tjiti, omena rokutja we tu suvera nu u vanga kutja tu kare nehupo ewa. Matu tjiwa kutja Jehova u vanga kutja tu kahupe nga aruhe. Ku nao, eye we tu pa otjisuta tjonguturiro. Mena rokutja Jesus we tu ṱira, eṱe matu yenene okukarera Jehova momuano mbwe vanga nandarire kutja oweṱe ovanauvi. (Rom. 7:​24, 25) Nu eṱe matu tjiwa kutja “Ndjambi omunene pomeritjiviro wetu womorukoro, nokutja Eye u tjiwa avihe.” (1 Joh. 3:​19, 20) Jehova u tjiwa oviṋa avihe ohunga na eṱe, nu u nongamburiro kutja eṱe matu yenene okutjita ombango ye.

20. Ovikwaye mbi mavi tu vatere kutja atu he rikende tjinene ohunga na imbi mbi tu hi nokutjiwa?

²⁰ Jehova u tu raera oviṋa avihe mbi matu hepa okutjiwa. Ku nao, eṱe katu nokuhepa okurikenda ohunga na imbi mbi tu hi nokutjiwa, nungwari matu hepa okuyandja ombango ku imbi mbi ri ovinahepero. Tji twa tjiti nao, matu raisa kutja tu nongamburiro okuura mu Jehova ngu ri “omunaunongo.” (Job 36:4) Nandarire kutja katu zuu nawa oviṋa tjiva nai, matu tjiwa kutja Jehova ma kayenda komurungu okutuhonga oviṋa ovipe nga aruhe. Nu eṱe tu tjaterwa mena rokutja kamaatu isa okurihonga oviṋa ovipe ohunga na Mukuru wetu Omunenenene.—Omuzuv. 3:11.