‘Eye me ku zeuparisa’

1. Omomuano uṋe Mukuru ma yandja omasa kovakarere ve ovaṱakame morukapitaveze?

EMBO RA MUKURU ri hungira ohunga novarumendu ovaṱakame otjovanamasa. Posi ya nandarire imba ovanamasa mokati kawo kaaruhe tjaave munu kutja ve nomasa. Otjotjihorera, Ombara David povikando tjiva ee rimunu kutja u nomasa “otja otjiṱunga tjondundu” posi povikando vyarwe aa ‘tira.’ (Eps. 30:7) Nandarire kutja Simson wa ri nomasa tjinene indu tjaa hingwa i yombepo ya Mukuru, eye aa tjiwa kutja nokuhinomasa ngu maye zu ku Mukuru ‘ma ngundipara na sana otja omundu ngamwa auhe.’ (Ovapang. 14:​5, 6; 16:17) Ovarumendu ovaṱakame mba va ri nomasa mena rokutja Jehova ongwe ve pe omasa.

2. Omena raye omuapostele Paulus tja tja wa ngundipara nu omunamasa? (2 Ovakorinte 12:​9, 10)

² Omuapostele Paulus wa yakura kutja eye wina aa hepa omasa okuza ku Jehova. (Lesa 2 Ovakorinte 12:​9, 10.) Omuapostele Paulus wa ri nouzeu wouveruke tjimuna otjingi tjetu. (Gal. 4:​13, 14) Povikando tjiva ya ri ouzeu ku ye okutjita imbi ri ovisemba. (Rom. 7:​18, 19) Nu povikando tjiva eye ee rikende nu aa tira imbi mbi mape ya ave tjitwa ku ye. (2 Kor. 1:​8, 9) Posi ya indu Paulus tja ngundipara, eye ee rimunu omasa. Omomuano uṋe? Jehova wa yandja omasa ku Paulus nga hepa okutuurunga omauzeu we.

3. Matu kazira omapuriro yeṋe morupa ndwi?

³ Jehova u kwizika okutupa omasa wina. (1 Petr. 5:10) Posi ya, katu sokuundjira ko okupewa omasa ngo nokuhinongondjero kaaṋi ndji matu tjiti. Otjotjihorera, oingina i tjita kutja ohauto i kayende komurungu. Posi ya, omuhinge u sokuyata omaze kutja ohauto i kayende. Momuano otjingewo, Jehova ma yenene okutupa omasa ngu matu hepa, posi ya tu sokutoora omikambo kaaṋi kutja tu mune mo ouwa. Ovikwaye Jehova mbye tu pa kutja tu rire ovanamasa? Nu matu hepa okutjita ye kutja tu mune omasa ngo? Matu katjiwa omaziriro komapuriro ngo indu tji matu katara komuano Jehova ma vatera omuprofete Jona, Maria ina ya Jesus nomuapostele Paulus. Eṱe wina matu katara komuano Jehova me kayenda komurungu okuyandja omasa kovakarere ve ndino momiano otjingevyo.

MUNA OMASA MONGUMBIRO NA MOKUKONḒONONA OMBEIBELA

4. Omomuano uṋe mu matu yenene okumuna omasa okuza ku Jehova?

⁴ Omuano umwe mu matu yenene okumuna omasa okuza ku Jehova omokukumba ku ye. Jehova ma ziri ozongumbiro zetu mokutupa “omasa nge kapita avihe.” (2 Kor. 4:7) Eṱe wina matu yenene okumuna omasa indu tji matu lese Embo re nokuripurira ko oukoto ohunga na imbi mbi matu lese. (Eps. 86:11) Ombuze ya Jehova kweṱe okuza mOmbeibela i “nomasa.” (Hebr. 4:12) Indu tji mo kumbu ku Jehova nokulesa Embo re, mo munu omasa ngu mo hepa kutja u panḓere po, u ṱize ondjoroka yoye poo u yenenise otjiungura otjizeu. Tara komuano Jehova ma yandja omasa komuprofete Jona.

5. Omena raye omuprofete Jona tjaa hepa omasa?

⁵ Omuprofete Jona aa hepa ouvanḓe. Eye aa tira okuyenda koṋa Jehova ke mu hinda, ku nao wa ronda moskepi ndjaai kwarwe. Mena ranao, eye wa vanga okupandjarisa omuinyo we na imbi vyovandu mba ri pamwe moskepi, motjivepo otjizeu. Indu tja umbwa momuronga, eye wa ṋiṋiwa i ehundju enene. Jona we kerimuna monḓorera mezumo rehundju. Hapo mo munu kutja Jona wa ri vi momuinyo? Rutenga, mape ya aa munu kutja ma koka, nu mape ya aa munu kutja Jehova we mu nambirahi. Jona mape ya aa tira tjinene.

6. Otja ku Jona 2:​1, 2, 7, ovikwaye mbya yandja omasa ku Jona indu tja ri mezumo rehundju?

⁶ Otjikwaye tji tja vatera Jona okumuna omasa indu tja ri erike mezumo rehundju? Eye wa kumba ku Jehova. (Lesa Jona 2:​1, 2, 7.) Nandarire kutja Jona ke na wa puratena ku Jehova, eye we ritanaura nu wa ri nongamburiro kutja Jehova ma puratene kongumbiro ye. Jona wina ee ripurire kOmatjangwa wOmbeibela. Omena raye tji matu yenene okutja nao? Mongumbiro ye ndja tjangwa mu Jona ekondwa oritjavari, wa ungurisa omambo otjingewo nga tjangwa mOmapsalme. (Otjotjihorera, sasaneka Jona 2:​2, 5 ku nEpsalme 69:1; 86:7.) Oukahu kutja Jona aa tjiwa omatjangwa ngo nawa. Omatjangwa ngo ya yandja ongamburiro ku Jona kutja Jehova me mu vatere. Jehova wa yama Jona, nu kombunda eye we rimanenene okuungura otjiungura Jehova tje mu pa.—Jona 2:10–3:4.

7-8. Omurumendu omukambure umwe moTaiwan wa muna vi omasa indu tja ri nomauzeu?

⁷ Otjihorera tja Jona matji yenene okutuvatera indu tji tu ri momauzeu pekepeke. Otjotjihorera, omurumendu omukambure moTaiwan wena Zhimingb wa vera tjinene. Nu wina, mena rongamburiro ye mu Jehova, eye u tjinda omapirukiro okuza kouṋepo weṱunḓu re. Eye u muna omasa okuza ku Jehova okupitira mongumbiro na mokukonḓonona Ombeibela. Eye wa tja: “Povikando tjiva, ouzeu tji we ya, ami mbi rikenda tjinene nga tji mbi hi nokuyenena okutjita omakonḓononeno wandje wOmbeibela.” Posi ya eye ka yumbu ohama. Eye wa tja: “Ami rutenga mbi kumba ku Jehova, nu okuzambo e puratene komaimburiro wetu wOuhona. Povikando tjiva ami mbi imbura kehi nga tji mba pupurukwa. Okuzambo e utu okukonḓonona Ombeibela.”

⁸ Zhiming wa hara omasa okutuurunga ozongaro ozonḓeu okuza koviṋa mbye rihonga momakonḓononeno we wOmbeibela. Otjotjihorera, indu eye tja yenda ama veruka okuza komatauriro nga ri na wo, onesa ye mu raera kutja eye ma hepa okupakerwa ombinḓu mena rokutja ombinḓu ye ya ri kehi. Ongurova ngunda Zhiming e hi ya taurwa, eye wa lesa ohunga nomukazendu omukambure ngwa ri nomatauriro otjingewo. Ombinḓu yomukazendu omukambure ngwo ya ri kehi tjinene okukapita indjo ye, posi ya eye kena pa yakura omapakerero wombinḓu nu wa yenena okuveruka. Otjihorera ho tja vatera Zhiming okurira omuṱakame.

9. Indu ouzeu tji we ku ngundiparisa, mo yenene okutjita vi? (Wina tara koviperendero.)

⁹ Hapo i rira ouzeu kove okukumba ku Jehova indu tji u ri mouzeu ounene? Poo u rimuna okuurwa tjinene okukonḓonona Ombeibela? Zemburuka kutja Jehova u zuva nawa ongaro mu u ri. Ku nao, nandarire kutja wa kumbu ongumbiro osupi, mo yenene okukara nongamburiro kutja eye me ku pe imbi mbi mo hepa. (Ef. 3:20) Indu tje ri ouzeu okulesa nokukonḓonona Ombeibela mena rokutja wa vera poo u nouzeu momuinyo, ove mo yenene okupuratena kovipuratenwa vyOmbeibela poo ku vimwe vyomambo wetu nga zikamena kOmbeibela. Ove mo yenene okupuratena komaimburiro wetu poo okutarera okavidio ko jw.org. Jehova ma vanga okukupa omasa, nu ma tjiti nao indu tji mo kumbu ku ye nokupaha omaziriro kongumbiro yoye mOmbeibela na moviṋa vyarwe eye mbye yandja.

MUNA OMASA OKUZA KOVAKAMBURE OVAKWEṊU

10. Omomuano uṋe ovakambure ovakwetu mu ve tu pa omasa?

¹⁰ Jehova u yenena okuungurisa ovakambure ovakwetu okutupa omasa. Owo ve yenena ‘okutarareka omitima vyetu tjinene’ indu tji tu ri mouzeu poo tji matu kondjo okuyenenisa otjiungura otjizeu. (Kol. 4:​10, 11) Eṱe tjinene tu hepa omapanga indu tu ri “moruveze rwombamisiro.” (Omiano 17:17) Indu tji twa ngundipara, ovakambure ovakwetu mave yenene okutupa oviṋa mbi matu hepa, okutuhuhumiṋa nokututunduuza kutja tu kayende komurungu okukarera Jehova nouṱakame. Ngatu tare komuano Maria, ina ya Jesus ma muna omasa okuza ku varwe.

11. Omena raye Maria tjaa hepa omasa?

¹¹ Maria aa hepa omasa okuyenenisa ombango ya Jehova. Ripura kutja wa ṱunwa pu pe ṱa pi kombunda yaindu tja pewa otjiungura otjizeu okuza komuengeli Gabriel. Eye aa sokurira otjingundi nandarire kutja wa ri e hi ya kupwa. Eye kaari nondjiviro yokukurisa ovanatje, posi ya aa sokukurisa okanatje okazandu ku make karira Messias. Eye ke na pa kara nomahakaeneno womonyama ku nomurumendu, posi ya aa sokuraera Josef kutja otjingundi. Iho mape ya tja ri otjiṋa otjizeu okutjita.—Luk. 1:​26-33.

12. Otja ku Lukas 1:​39-45, omomuano uṋe Maria ma muna omasa ngaa hepa?

¹² Omomuano uṋe Maria ma muna omasa nga hepa okuyenenisa otjiungura tjapeke nu otjizeu ho? Eye wa paha ombatero okuza ku varwe. Otjotjihorera, eye wa ningira omuengeli Gabriel okumupa ondjivisiro yokomurungu ohunga notjiungura hi. (Luk. 1:34) Ousupi kombunda yanao, eye wa toora ouyenda na i “kotjirongo tji tja ri mehi rovivanda” raJudea okukavarura omuzamumwe we Elisabet. Ouyenda mbwi wa ri ouwa. Elisabet wa tanga Maria nu wa hingwa i yombepo ya Jehova okuraera Maria omaprofetero ohunga nomuatje we ngwa ri mezumo. (Lesa Lukas 1:​39-45.) Maria wa tja Jehova “wa ungura ovyomasa nokuoko kwe.” (Luk. 1:​46-51) Jehova wa yandja omasa ku Maria okupitira mu Gabriel na Elisabet.

13. Pa tjitwa tjike indu omukazendu omukambure moBolivia tja ningira ombatero kovakambure ovakwao?

¹³ Ove wina mo yenene okumuna omasa okuza kovakambure ovakweṋu tjimuna Maria. Omukazendu omukambure wena Dasuri ngwa tura moBolivia aa hepa omasa otja ingo. Ihe wa verere tjinene nu kapa ri omuti omupange komutjise we. Indu tja ri mohospitala eye aa vanga okukara ku na ye oruveze aruhe otja pu ma yenene. (1 Tim. 5:4) Iho katja ri otjiṋa otjipupu. Eye wa tja: “Povikando ovingi, ee munu kutja hi nokuyenena okukayenda komurungu.” Hapo eye wa ningira ombatero? Rutenga, eye kaningirire varwe okumuvatera. Eye wa tja: “Ami hee vanga okuyandja ouzeu kovakambure ovakwetu. Ami ee munu kutja ‘Jehova ongu me ndji pe ombatero ndji me hepa.’ Posi ya mba kamuna kutja okuriṱizira kokure na varwe, aa ku tjiti kutja mbi kondje okuzengurura omazeu kwami omuini.” (Omiano 18:1) Dasuri we ripura okutjangera omapanga we tjiva nokukahurura ongaro maari. Eye wa tja: “Kape nomambo ngu maye yenene okukahurura omuano mu mba pewa omasa i yovakambure ovakwetu. Owo va eta ovikurya kohospitala nu ve ndji lesera omatjangwa omahuhumiṋe okuza mOmbeibela. Tjiri iho otjiṋa otjiwa okutjiwa kutja kaweṱe atuyerike. Eṱe oweṱe orupa rweṱunḓu ra Jehova enene. Nu ovakambure ovakwetu ve vanga okutuvatera na imbi mbi matu hepa, okurira pu na eṱe indu tji twa munu ouzeu nokututunduuza kutja tu kayende komurungu okukarera Jehova pu na wo.”

14. Omena raye tji twa sokuyakura ombatero okuza kovanene vombongo?

¹⁴ Jehova u tu pa omasa okupitira movanene vombongo. Owo oviyandjewa eye mbye ungurisa okutupa omasa. (Jes. 32:​1, 2) Tji mo rikende, raera ouzeu woye kovanene vombongo. O keyakeya okuyakura ombatero okuza kovanene vombongo. Jehova ma yenene okukupa omasa okupitira mu wo.

OMAUNDJIRO WOYE WORUYAVEZE MAYE YENENE OKUKUPA OMASA

15. Omaundjiro yeṋe Ovakriste avehe ngu ve na wo?

¹⁵ Omakwizikiro nge ri mOmbeibela maye yenene okutupa omaundjiro nomasa okukayenda komurungu okukarera Jehova. (Rom. 4:​3, 18-20) Ovakriste tjiva ve nomaundjiro wokukahupa nga aruhe meyuru, ngunda varwe ave nomaundjiro wokukahupa nga aruhe moparadisa ombwa kombanda yehi. Mena romaundjiro nga, eṱe tu nomasa wokutuurunga omarorero, wokuzuvarisa ombuze ombwa nokuungura oviungura pekepeke mombongo. (1 Tes. 1:3) Omaundjiro tjingewo ya vatera omuapostele Paulus.

16. Omena raye omuapostele Paulus tjaa hepa omasa?

¹⁶ Paulus aa hepa omasa. Morutuu rwe kOvakorinte, eye we risasaneka ku novitjiuma vyomunoko mbi nyaika tjimanga. Eye wa “ṋiṋikiziwa,” ‘wa ivaiva,’ wa “tatumisiwa” ‘nokuvandwa pehi.’ Omuinyo we nandarire wa ri moumba. (2 Kor. 4:​8-10) Paulus wa tjanga omambo ngo indu tja varura ozombongo otjikando otjitjatatu. Nu kombunda yokutjanga omambo ngo eye wa kamuna omuzeu warwe omengi. Eye wa tonwa i yovandu mbe rikuta kumwe, wa kamburwa na paterwa mondeko nu wa ri moumba wozondjuwo zomeva nḓa tekera mokuvare.

17. Otja 2 Ovakorinte 4:​16-18, otjikeṋa tji tja yandja omasa ku Paulus okutjinda omauzeu?

¹⁷ Paulus wa muna omasa okupanḓera po mokuripurira komaundjiro nga ri na wo. (Lesa 2 Ovakorinte 4:​16-18.) Eye wa raera Ovakorinte kutja nandarire kutja omasa worutu rwe “maye yanda” kamaa yandjere otjiṋa ho okumuwisa momuinyo. Paulus ee ripurire koruyaveze rwe. Omaundjiro we wokukahupa nga aruhe meyuru ya ri “ondjozikiro, ndji kapita avihe.” Omaundjiro wa Paulus ya ri omananḓengu ku ye tjinene ngandu ndi tjaari nombango okutuurunga omauzeu ngamwa aihe kutja ma kamune ondjambi ye. Paulus ee ripurire ko oukoto komaundjiro ngo, nu mena ranao aa munu kutja omuinyo we au yarurwa koupe “pevapa reyuva.”

18. Omaundjiro woruyaveze ya yandja vi omasa ku Tihomir neṱunḓu re?

¹⁸ Omurumendu omukambure wena Tihomir, ngwa tura moBulgaria, u muna omasa momaundjiro we woruyaveze. Ozombura ozonḓiṱi nḓa kapita, omuangu we Zdravko wa ṱa moumba wotjihauto. Kombunda yanao, Tihomir wa ri noruhoze tjinene. Eye neṱunḓu re ve ripurira komaundjiro wombendukiro kutja ve yenene okutjinda omuhihamo mbwo. Eye wa tja: “Otjotjihorera, eṱe tu hungira kutja matu hakaenene pi na Zdravko, ovikurya viṋe mbi matu mu zikire, ooveṋe mbu matu ṋanga komeero wapamwe omatenga indu tja kotoka, nokutja matu mu serekarere ye ohunga nomayuva omasenina.” Tihomir u tja, okuripurira koruyaveze ku yandja omasa keṱunḓu re okukayenda komurungu okupanḓera po nokuundja oruveze Jehova ndu ma pendura omuangu we.

19. Ovikwaye mbi mo yenene okutjita kutja u pamise ongamburiro yoye momakwizikiro wa Jehova woruyaveze? (Wina tara kotjiperendero.)

¹⁹ Omomuano uṋe mu mo yenene okutjita kutja omaundjiro woye ye kare nomasa? Indu tji u nomaundjiro yokukahupa nga aruhe kombanda yehi, lesa omazeva mOmbeibela nge hungira ohunga noparadisa nu u ripurire ko oukoto. (Jes. 25:8; 32:​16-18) Ripura kutja ehupo mari kakara vi mouye oupe. Rimuna omuini mbo. Oouṋe mbu mo munu mbo? Ozombosiro zeṋe nḓu mo zuu? Mo fula vi? Okukuvatera okumuna kutja oparadisa mai kakara vi, tara koviperendero mbi ri momambo wetu nga zikamena kOmbeibela, poo tarera ouvidio womizumbi tjimuna Mouye oupe mbu mau ya, Oparadisa i ri popezu, poo Ripurira kouye oupe. Indu tji matu twa po oruveze okuripurira kouye oupe, omauzeu wetu maye rire ‘omapupu nu maye kapita tjimanga.’ (2 Kor. 4:17) Omaundjiro Jehova nge ku pa, maye yenene okukuvatera okutjinda omauzeu.

20. Matu yenene vi okumuna omasa nandarire kutja twa ngundipara?

²⁰ Nandarire kutja twa ngundipara “Ndjambi tje ri puna eṱe, matu toṋa.” (Eps. 108:13) Jehova we ku pa oviṋa mbi mo hepa kutja u mune omasa okuza ku ye. Ku nao, indu tji mo hepa ombatero okuyenenisa otjiungura, okutjinda ouzeu, poo okukara nondjoroka, kumba ku Jehova nu tjita omakonḓononeno woye omuini wOmbeibela kutja u mune ombatero. Yakura omayanḓiparisiro okuza kovakambure ovakweṋu. Aruhe twa po oruveze okuripurira komaundjiro woye woruyaveze. Ku nao, ‘Ndjambi ngu nomasa nounene me ku zeuparisa nu me ku pe omasorero aehe kokutja nomuretima u yenene okukara nonḓaro orure mu avihe.’—Kol. 1:11.