Hapo Jehova ma zuvire ozongumbiro zandje?

1-2. Omena raye tji mape ya atu munu kutja Jehova ke nokuzira ozongumbiro zetu?

“NYANDA mu Muhona, nEye me ku pe imbi omutima woye mbi mau zeri.” (Eps. 37:4) Tjiri ingo omakwizikiro omawa. Posi yokutja, hapo matu sokuundjira ko Jehova okutupa tjimanga oviṋa avihe mbi twa ningire? Omena raye tje ri epuriro enanḓengu okuripura? Tara kovihorera mbi. Omukazendu omukambure ma kumbu kokutja ma yenene okuṋangwa kOskole yOvazuvarise vOuhona. Posi yokutja pa kapita ozombura ozengi nokuhinokuṋangwa. Omurumendu omukambure omutanda ma ningire Jehova kutja me mu verukise komutjise omuzeu kokutja ma yenene okuungura ovingi mombongo. Posi yokutja omutjise we kau veruka. Ovanene mbe ri Ovakriste mave kumbu kutja omuatje wawo ma kare mouatjiri. Posi ya omuatje wawo wa tye okuisa okukarera Jehova.

² Ngahino ove wina wa ningira otjiṋa ku Jehova, posi yokutja ko ye tji muna. Mena ranao, ove mape ya o munu kutja Jehova u zira ozongumbiro za varwe posi yokutja kaziri inḓa ozoye. Ove mape ya o ripura kutja u notjiṋa otjivi tji wa tjita. Omukazendu omukambure wena Janiceb aa munu nao wina. Eye nomurumendu we va kumba ku Jehova mena rokutja owo tjiri aave vanga okukakarera moBetel. Eye wa tja: “Ami mba ri nongamburiro kutja eṱe matu kakarera moBetel moruveze rwatjimanga.” Posi yokutja pa kapita ozombura ozengi nokuhinokuṋangwa. Janice wa tja: “Ami mba hihamwa omutima nu mba temenwe. Ee ripura kutja otjikeṋa tji mba tjita tji tja hihamisa Jehova. Ami mba kumba potuingi ohunga nokuyenda koBetel, nu ongwaye eye tje hi na wa zira ozongumbiro yandje?”

3. Matu kahungirira ku ye morupa ndwi?

³ Povikando tjiva, eṱe mape ya atu ripura kutja, hapo Jehova u zuvira ozongumbiro zetu? Nandarire ovakarere ovaṱakame tjiva mba hupire moruveze orukuru aave ripura nao wina. (Job 30:20; Eps. 22:2; Hab. 1:2) Otjikeṋa tji matji yenene okukuvatera okumuna kutja Jehova ma ziri ozongumbiro zoye? (Eps. 65:2) Kutja tu zire epuriro ndo, rutenga matu sokuzira omapuriro nga: (1) Matu yenene okuundjira ko ye ku Jehova? (2) Otjikeṋa Jehova tje undjira ko kweṱe? (3) Omena raye tji mape ya atu hepa okurundurura oviṋa tjiva mbi matu ningire mongumbiro yetu?

MATU YENENE OKUUNDJIRA KO YE KU JEHOVA?

4. Otja ku Jeremia 29:​12, otjikeṋa Jehova tja kwizika okutjita?

⁴ Jehova wa kwizika okupuratena kozongumbiro zetu. (Lesa Jeremia 29:12.) Mukuru wetu we tu suvera mena rokutja tu mu karera nouṱakame. Ku nao, eye kamaa isa okupuratena kozongumbiro zetu. (Eps. 10:17; 37:28) Nungwari ihi katji nokuheya kutja eye me tu pe oviṋa avihe mbi twa ningire. Eṱe mape ya atu undju ngandu kouye oupe amaatu pewa oviṋa tjiva mbi twa ningire.

5. Jehova u tara ku ye indu tji ma puratene kozongumbiro zetu? Kahurura.

⁵ Jehova u tara kutja imbi mbi matu ningire mavi hitasana nondando ye indu tji ma puratene kozongumbiro zetu. (Jes. 55:​8, 9) Otjiṋa tjimwe eye tje vanga okuurisa ehi novandu mbe vanga okuhonaparerwa po iye nu mbe nonḓuviro ku ye. Posi yokutja Satan u tja ovandu mave yenene okukara nouṋingandu indu tji mave rihonaparere po oveni. (Gen. 3:​1-5) Jehova wa yandjera ovandu okurihonaparera oveni okuraisa kutja Satan aa korovizeze. Nungwari ouhonapare wovandu wa etisa omauzeu omengi ndino. (Omuzuv. 8:9) Matu tjiwa kutja Jehova kamaa isa po omauzeu ayehe ngwo moruveze ndwi. Indu tja tjiti nao, imba mbe ha kambura mu Mukuru mave ripura kutja ovandu ombe zengurura omauzeu aehe ngo.

6. Omena raye tji matu sokukara nongamburiro kutja Jehova ma tjiti imbi mbi ri ovisemba novyorusuvero?

⁶ Jehova mape ya a yenene okuzira ozongumbiro nḓa sana momiano pekepeke. Otjotjihorera, indu Ombara Hiskija tji ya verere tjinene, eye wa ningira ku Jehova kutja me mu verukise. Nu Jehova we mu verukisa. (2 Ozomb. 20:​1-6) Posi yokutja, indu omuapostele Paulus tja ningira Jehova okuisa mo “okuiya monyama,” ngahino mbwa ri omutjise eye mbwa ri na wo, Jehova kena pe mu verukisa. (2 Kor. 12:​7-9) Tara wina kotjihorera tjomuapostele Jakobus na Petrus. Ombara Herodes aa vanga okuvezepa aveyevari. Ombongo ya kumbira Petrus nu mape ya ya kumbira Jakobus wina. Posi yokutja, Jakobus wa ṱa nungwari Petrus wa yamwa i yomuengeli. (Oviung. 12:​1-11) Eṱe mape ya atu ripura kutja, ‘Omena Jehova tja yama Petrus nungwari tje ha yamene Jakobus?’ Ombeibela kai hungirire kotjiṋa ho.c Eṱe matu tjiwa kutja ozondjira za Jehova “ozosemba.” (Deut. 32:4) Nu wina matu tjiwa kutja Jehova wa suverere Petrus na Jakobus. (Omavan. 21:14) Povikando tjiva mape ya Jehova a ha ziri ozongumbiro zetu momuano mu matu undjire ko. Mena rokutja eṱe tu nongamburiro kutja Jehova aruhe u zira ozongumbiro zetu momuano worusuvero nu wousemba, eṱe katu unaunine omuano mbwe toorora okuzira ozongumbiro zetu.—Job 33:13.

7. Otjikeṋa tji matu sokukondja okuyepa, nu omena raye?

⁷ Eṱe tu kondja kutja atu ha sasaneke ongaro mu tu ri ku na indji yovakwetu. Otjotjihorera, eṱe mape ya atu ningire Jehova okutuvatera momuano kaaṋi, posi yokutja atu ha munu imbi mbi twa ningire. Kombunda, eṱe atu zuu kutja omundu warwe wa ri ama kumbire otjiṋa tjingetjo, nu ape munika aayo Jehova we mu vatere. Omukazendu omukambure wena Anna wa ri mongaro otja indjo. Eye wa kumba kutja omurumendu we Matthew ma veruka komutjise wokangera. Wina ovakazendu ovakambure vevari ovanene motjiwondo pomurumendu we va verere okangera. Anna wa kumba nomasa kutja Matthew novakazendu ovakambure ve veruke. Ovakazendu ovakambure va veruka, nungwari Matthew wa ṱa. Anna rutenga ee ripura kutja, hapo Jehova ongwa tjiti kutja ovakazendu ovakambure ve veruke? Indu ndoovazu pe ri nao, omena raye tje ha zuvire ozongumbiro ze kokutja omurumendu we ma veruke? Otjiperi kutja, eṱe katu nokutjiwa kutja pe ya vi ovakazendu ovakambure ve veruke. Posi yokutja, eṱe matu tjiwa kutja Jehova ma yandisa omauzeu, neye u zera okupendura omapanga we nga ṱa.—Job 14:15.

8. (a) Otja ku Jesaja 43:​2, omomuano uṋe Jehova me tu vatera? (b) Ongumbiro mai yenene okutuvatera vi indu tji tu ri mouzeu? (Tarera okavidio nga Ongumbiro i tu vatera okutjinda omauzeu.)

⁸ Jehova me tu vatere aruhe. Jehova ka vanga kutja tu mune ouzeu mena rokutja oTate wetu worusuvero. (Jes. 63:9) Nungwari, eye ka tjaere omauzeu wetu aihe nge ri tjimuna omeva omakoto poo omuriro. (Lesa Jesaja 43:2.) Posi yokutja, eye wa kwizika kutja me tu vatere ‘okukonda’ poo okutuurunga omauzeu wetu. Neye kamaa yandjere omauzeu wetu okutupora ku ye. Jehova wina u tu pa ombepo ye onamasa ondjapuke okutuvatera kutja tu tuurunge. (Luk. 11:13; Fil. 4:13) Mena ranao, eṱe matu yenene okukara nongamburiro kutja eye aruhe me tu pe imbi mbi matu hepa kokutja tu tuurunge nokupanḓera pouṱakame.d

OTJIKEṊA JEHOVA TJE UNDJIRA KO KWEṰE?

9. Otja ku Jakobus 1:​6, 7, omena raye tji matu hepa okukara nongamburiro kutja Jehova me tu vatere?

⁹ Jehova u undjira ko kweṱe kutja tu kare nongamburiro mu ye. (Hebr. 11:6) Povikando tjiva, eṱe mape ya atu munu kutja ouzeu okutjinda omauzeu wetu. Nu nandarire mape ya atu utu okukeyakeya kutja Jehova me tu vatere. Posi yokutja Ombeibela ye tu kwizikira kutja eṱe matu yenene ‘okuhavera’ poo okutjinda omauzeu wetu nomasa wa Mukuru. (Eps. 18:29) Ku nao pendje nokukeyakeya, eṱe matu sokukumba atu nongamburiro okuura kutja Jehova ma zuvire ozongumbiro zetu.—Lesa Jakobus 1:​6, 7.

10. Yandja otjihorera tjozongondjero nḓu matu sokutjita tji twa zu nokukumba ku Jehova.

¹⁰ Jehova u undjira ko kutja tu tjite otja ku imbi mbi twa kumbu. Otjotjihorera, omurumendu omukambure mape ya a ningire ombatero ku Jehova kutja ma yenene okukuturwa koviungura vye kokutja ma yenene okukakara pomaworonganeno wotukondwa. Omomuano uṋe Jehova mu mape ya a zire ongumbiro ndjo? Eye mape ya a yandja ouvanḓe komurumendu omukambure ngo kutja ma yenene okukaningira ousemba komuhona we pe ungura. Nungwari omurumendu omukambure ngwi ma hepa okutoora omukambo okukaningira ousemba komuhona we pe ungura. Eye mape ya a hepa okuningira ovikando ovingi, mape ya nandarire a ningire okuungura eyuva rarwe. Nu indu tje ri ohepero, eye mape ya a yandjere kutja ave he mu sutu eyuva nda kuturwa koviungura.

11. Omena raye tji matu sokukumba ovikando ovingi ohunga noviṋa mbi mavi tu kendisa?

¹¹ Jehova u undjira ko kweṱe kutja tu kumbe ovikando ovingi ohunga noviṋa mbi mave tu kendisa. (1 Tes. 5:17) Jesus wa tja ozongumbiro zetu tjiva mape aze ha zirwa tjimanga. (Luk. 11:9) Ku nao, o rihahiza. Kumba okuza komutima nu povikando ovingi. (Luk. 18:​1-7) Indu tji matu kayenda komurungu okukumbira ohunga notjiṋa, eṱe matu raisa kutja imbi mbi matu kumbire ko tjiri ovinanḓengu kweṱe. Eṱe wina matu raisa kutja tu nongamburiro kutja eye ma yenene okutuvatera.

OMENA RAYE TJI MAPE YA ATU HEPA OKURUNDURURA OVIṊA TJIVA MBI MATU NINGIRE MONGUMBIRO YETU?

12. (a) Epuriro riṋe ndi matu sokuripura oveni ohunga noviṋa mbi twa ningire, nu omena raye? (b) Omomuano uṋe mu matu yenene okuraisa kutja tu nondengero mozongumbiro zetu ku Jehova? (Tara okawongo nga “Hapo oviṋa mbi me ningire vi raisa kutja mbi nondengero ku Jehova?”)

¹² Indu tji tu hi na twa munu oviṋa mbi twa ningire mongumbiro, eṱe mape ya atu ripura oveni omapuriro yetatu nga. Etenga, ‘Hapo ami mbi kumbira otjiṋa tji tji ri tjo?’ Potuingi, tu ripura kutja eṱe matu tjiwa imbi mbi ri ovisemba kweṱe. Posi yokutja mape ya oviṋa mbi matu ningire kavi nokutuetera ouwa. Indu tji twa kumbire ouzeu kaaṋi, eṱe mape atu munu omazengururiro omasemba okukapita inga ngu twa ningire mongumbiro. Nu oviṋa tjiva mbi twa ningire mape ya avi ha hitasana nombango ya Jehova. (1 Joh. 5:14) Otjotjihorera, tara kotjihorera tjovanene mba tamunwa rukuru. Owo va ningire Jehova okutjita kutja omuatje wawo ma kare mouatjiri. Iho matji pose tjimuna ovanene mbo va ningira otjiṋa otjiwa. Posi yokutja, Jehova kemee tu ṋiṋikiza okumukarera. Eye u vanga kutja eṱe atuhe novanatje vetu wina tu toorere oveni okurikotamena ku ye. (Deut. 10:​12, 13; 30:​19, 20) Ku nao, ovanene aave sokuningira Jehova okuvevatera kutja ve yenene okuṱuna komutima womuatje wawo kokutja omuatje omuini ma yenene okusuvera Jehova nokurira epanga re.—Omiano 22:6; Ef. 6:4.

13. Otja kOvaheberi 4:​16, oruṋe Jehova tji me tu vatere? Kahurura.

¹³ Epuriro oritjavari mari tja, ‘Hapo oruveze orusemba nai Jehova okuzuvira ongumbiro yandje?’ Eṱe mape ya atu munu kutja matu hepa eziriro tjimanga kozongumbiro zetu. Posi yokutja, Jehova ongu ma tjiwa oruveze orusemba okutuvatera. (Lesa Ovaheberi 4:16.) Indu tji tu ha mwine eziriro tjimanga, eṱe mape ya atu munu kutja Jehova ma tja ‘Kako.’ Nungwari eziriro re mape ya ari rire ‘Ka nambano.’ Otjotjihorera, ripura nomurumendu omukambure omutanda ngwa kumba kutja ma veruke komutjise we. Andakuzu Jehova wa tjita ovihimise okumuverukisa, Satan atja tja, omurumendu omukambure ngo u kayenda komurungu okukarera Jehova mena rokutja we mu verukisa. (Job 1:​9-11; 2:4) Wina, Jehova wa twa po rukuru oruveze ndu ma kaisa po omitjise avihe. (Jes. 33:24; Omavan. 21:​3, 4) Ngunda oruveze ndo aru hi ye ya, eṱe katu nokuundjira ko Jehova okutjita ovihimise kutja me tu verukise. Ku nao, omurumendu omukambure aa sokuningira Jehova okumupa omasa nohange momuinyo kutja ma yenene okutjinda omutjise we nokukayenda komurungu okumukarera nouṱakame.—Eps. 29:11.

14. Mo rihongere ko ye kotjihorera tja Janice?

¹⁴ Ripura ohunga notjihorera tja Janice, ngwa kumba ohunga nokukakarera poBetel. Pa kapita ozombura ndano kombunda yaindu tja zuva nawa omuano Jehova ma zira ongumbiro ye. Eye wa tja: “Jehova wa ungurisa oruveze ndo okundjihonga oviṋa ovingi nu we ndji vatera kutja mbi rire Omukriste omusemba. Ami ee hepa okukurisa ongamburiro yandje mu ye. Ee hepa okurihonga Ombeibela oukoto. Nu ee hepa okurihonga kutja me yenene okukara nondjoroka apehe pu me karere Jehova.” Kombunda, Janice nomurumendu we va ṋangwa okukaungura oviungura vyokuvarura ozombongo. Kombunda, Janice wa tja: “Jehova wa zira ozongumbiro zandje nandarire kutja ka momuano mbwe undjire ko. Pa kapita oruveze okutjiwa kutja eziriro Jehova nde ndji pa otjiyandjewa otjiwa. Tjiri ami mbi nondangi okumuna orusuvero rwe notjari tje.”

15. Omena raye povikando tjiva tji tu hepa okukumbira oviṋa pekepeke? (Wina tara koviperendero.)

¹⁵ Epuriro oritjatatu mari tja, ‘Hapo me hepa okukumbira oviṋa vyarwe?’ Onawa okukumbira otjiṋa kaaṋi, posi yokutja povikando tjiva mape ya atu ha tjiti nao kokutja tu tjiwe ombango ya Jehova kweṱe. Tara kotjihorera tjomukazendu omukombe ngwaa kumbu ohunga nokuyenda kOskole yOvazuvarise vOuhona. Eye aa vanga okuyenda koskole ndjo kokutja ma yenene okukakarera koṋa ku maku hepa ovazuvarise. Eye ngunda ama kumbu kokutja ma ṋangwe koskole ndjo, eye wina aa sokuningira ombatero ku Jehova kokutja ma yenene okumuna omiano vyarwe mu ma yenene okuungura ovingi motjiungura tjokuzuvarisa. (Oviung. 16:​9, 10) Kombunda yokukumbira otjiṋa hi, eye aa sokupura komutarere wotukondwa kutja, pe nombongo popezu ndji mai hepa ovakandjira. Poo eye atja tjanga korutavi rwomberoo okupura ohunga nokoṋa ku ku nouhepe wovazuvarise.e

16. Otjikeṋa tji matu yenene okukambura mo?

¹⁶ Otja tji twe rihongo, eṱe matu yenene okukara nongamburiro kutja Jehova ma ziri ozongumbiro zetu momuano worusuvero nomusemba. (Eps. 4:3; Jes. 30:18) Povikando tjiva eṱe mape ya atu ha munu eziriro ndu matu undjire ko. Posi yokutja Jehova kama rangaranga kozongumbiro zetu. Eye we tu suvera tjinene. Neye kemee twesa ko. (Eps. 9:10) Ku nao “riyamekeye ku Ndjambi omayuva aihe,” nokukumba ku ye nomutima auhe.—Eps. 62:8.