EHONGWA 16
Hapo Jesus aa ungura ye indu tja ri kombanda yehi?
Ovandu ovengi ve muna kutja Jesus okanatje ku ke hi nombatero, omuprofete onongo poo omundu ngu ri pokuṱa. Hapo matu yenene okurihonga ovingi mokukonḓonona ehupo re kombanda yehi? Mehongwa ndi matu katara koviṋa tjiva ovinanḓengu Jesus mbya tjita, nomuano mu mavi yenene okukuvatera.
1. Otjiungura tjiṋe otjinanḓengu Jesus tja ungura?
Otjiungura otjinanḓengu Jesus tja ungura, tja ri ‘okukazuvarisa Ombuze Ombwa youhona waNdjambi.’ (Lesa Lukas 4:43.) Eye aa zuvarisa ombuze ombwa yokutja Mukuru ma ziki ouhona we poo ohoromende ndji mai kaisa po omauzeu ayehe wovandu.a Oure wozombura ndatu nohinga Jesus wa ungura oukukutu okuzuvarisa ombuze ndjaai yanḓiparisa ovandu.—Mateus 9:35.
2. Ovihimise Jesus mbyaa tjiti aavi raisa ye?
Ombeibela i kahurura ‘ovihimise ovinamasa ovizemburukiro noviraisiro Eye mbya tjitire mu [Jesus].’ (Oviungura 2:22) Mukuru wa yandja omasa ku Jesus, okuporisa ovivepo, okuyandja ovikurya kovengi, okuverukisa ovavere nokupendura ovaṱi komuinyo. (Mateus 8:23-27; 14:15-21; Markus 6:56; Lukas 7:11-17) Ovihimise Jesus mbyaa tjiti aavi raisa kutja eye wa hindwa i Mukuru. Ovyo wina aavi raisa kutja Jehova u nomasa okuisa po omauzeu wetu ayehe.
3. Ovikwaye mbi matu rihongo okuza kehupo ra Jesus?
Mozongaro azehe Jesus wa kara nonḓuviro ku Jehova. (Lesa Johanes 8:29.) Nandarire kehi yomapirukiro, Jesus wa kara nonḓuviro koviṋa Ihe mbyee mu ningire okutjita nga konḓiro ye. Eye wa raisa kutja matu yenene okukarera Mukuru nandarire kehi yozongaro ozonḓeu. Ku nao Jesus wa twa po ‘otjihorera kokutja tu yate mozondambo ze.’—1 Petrus 2:21.
KONḒONONA OUKOTO
Tara komuano Jesus ma zuvarisa ombuze ombwa nomuano maa tjiti ovihimise.
4. Jesus aa zuvarisa ombuze ombwa
Jesus aa kayenda omikato omire mozondjira zotuuma, okuzuvarisa ombuze ombwa kovandu ovengi. Lesa Lukas 8:1, nu okuzambo hungirira komapuriro nga:
Hapo Jesus aa zuvarisa kovandu mbaave worongana pamwe okupuratena ku ye uriri?
Ozongondjero zeṋe Jesus nḓaa tjiti okumuna ovandu?
Mukuru wa hunganeka kutja Messias ma zuvarisa ombuze ombwa. Lesa Jesaja 61:1, 2, nu okuzambo hungirira komapuriro nga:
Hapo Jesus wa yenenisa vi omaprofetero nga?
Hapo u muna kutja ovandu ndino ve hepa okuzuva ombuze ombwa ndji?
5. Jesus aa hongo oviṋa ovinanḓengu
Kombanda yokuzuvarisa ombuze ombwa yOuhona wa Mukuru, Jesus wina aa hongo omapu omananḓengu. Tara koviṋa tjiva okuza kOmazuvarisiro we wOkondundu. Lesa Mateus 6:14, 34 no 7:12, nu okuzambo hungirira komapuriro nga:
Ondunge iṋe ombwa Jesus ndja yandja momazeva nga?
Hapo mo munu kutja ondunge ndji mai yenene okutuvatera ndino?
6. Jesus aa tjiti ovihimise
Jehova wa yandja omasa ku Jesus kutja ma tjite ovihimise ovingi. Kutja u mune otjihorera tjimwe, lesa Markus 5:25-34 poo nyanda OKAVIDIO. Okuzambo hungirira komapuriro ngu maye kongorere kehi mba.
Omukazendu ngwa verere mokavidio wa ri nongamburiro mu ye?
Otjikwaye tji matji ku tjatere ohunga notjihimise hi?
Lesa Johanes 5:36, nu okuzambo hungirira kepuriro ndi:
Ovihimise Jesus mbyaa tjiti aavi ‘hongonona ye’ poo vya raisa tjike ohunga na ye?
Hapo ove oo tjiwa?
Oviṋa ovingi mbi tu tjiwa ohunga na Jesus vya za kOmaevangeli yane nga: Mateus, Markus, Lukas na Johanes. Omutjange auhe wEvangeli wa tjanga oviṋa mbya panguka ohunga na Jesus. Indu tji matu lese omambo yane ngo tu muna omuano Jesus maa hupu.
MATEUS
ongwa ri omutenga okutjanga embo re. Oro ri tu raera ohunga noviṋa ovingi Jesus mbyaa hongo nu tjinene ohunga nOuhona wa Mukuru.
MARKUS
wa tjanga embo esupi. Oro ri tu raera ohunga novitjitwa oviwa.
LUKAS
ri tu raera omuano ongumbiro mu ya ri onanḓengu ku Jesus nomuano maa tjindi ovakazendu.
JOHANES
ri tu raera oviṋa ovingi Jesus mbya hungira ku na omapanga we wopopezu novandu varwe. Nu ihi tji tu vatera okutjiwa kutja eye wa ri omundu ngu ri vi.
OVANDU TJIVA VE TJA: “Jesus wa ri omurumendu omuwa uriri nu kangwa ri Messias.”
Ove u noumune uṋe?
OKUYARUKIRA PO OUSUPI
Jesus aa zuvarisa ohunga nOuhona wa Mukuru, aa tjiti ovihimise nu wa kara nonḓuviro ku Jehova mozongaro azehe.
Okurizemburukisa
Otjiungura tjiṋe otjinanḓengu Jesus tjaa ungura indu tja ri kombanda yehi?
Ovihimise Jesus mbyaa tjiti vya raisa ye?
Ovikwaye ovinanḓengu Jesus mbyaa hongo?
RIHONGA OVINGI
Jesus aa hungire ohunga na iye tjinene?
“Ouhona wa Mukuru u heya ye ku Jesus” (Oruhungu, 1 ku Oktoba, 2014)
Tara kutja omena raye tji matu yenene okukara nongamburiro kutja Jesus aa tjiti ovihimise.
“Mo rihongo ye okuza kovihimise vya Jesus?” (Oruhungu, 15 ku Juli, 2004)
Lesa ohunga nomurumendu umwe ngwa rundurura ehupo re, indu tje rihonga ohunga nomuano Jesus mee rikendere ku varwe.
“Ee ripurire ku ami omuini tjinene” (Oruhungu, 1 ku Oktoba, 2014)
Tara koviṋa ovinanḓengu Jesus mbyaa tjiti mongongorasaneno.
“Ovitjitwa ovinanḓengu mehupo ra Jesus kombanda yehi” (Okambo kokukonḓonona Embo raMukuru 4B)
a Omahongwa nga 31-33 maye kahungira ovingi ohunga nOuhona wa Mukuru.