EKONDWA 16
Pirukira Omudiaboli nomatiku we
“Pirukireye Satan, neye ma tupuka a zu po pu eṋe.”—JAKOBUS 4:7.
1, 2. Oowaṋi mbe kara nenyando ovandu tji mave papitisiwa?
INDU tji wa karera Jehova oure wozombura ozengi, mape ya kutja wa puratena komahungi omengi wombapitisimo pomaworonganeno wetu omanene. Nandarire kutja wa kara povitjitwa mbi ovikando ovingi, mape ya kutja ngamba u nyaṋuka tjinene tji mo munu imba mba sekama poruteto rwokomurungu okuhongonona ombapitisimo yawo. Poruveze ndwo pe kara ondjoroka yakatjotjiri mokati kovapuratene, okuzambo o munu ovandu tji mave tono omake okuraisa kutja ve nonyuṋe tjiri. Ove mape ya u hara omahoze wondjoroka tji wa tara kotjimbumba tjovandu ovaingona mba toorora okuyandja oruvara ku Jehova. Motuveze otja itwo tjiri tu kara nondjoroka!
2 Eṱe ngunda atu yenena okumuna ovandu amave papitisiwa otuveze tjiva uriri mombura momaturiro wetu, ovaengeli ve tarera ovitjitwa mbi potuveze twarwe otuingi. Nambano ripura ‘nenyando ndi kara meyuru’ indu ovaengeli tji ve muna ovandu ape omayovi yetano tji mave weziwa kotjira tjaJehova otjivike atjihe mouye auhe! (Lukas 15:7, 10) Tjiri ovaengeli ve yoroka tjinene tji mave munu omekuriro ngo!—Hagai 2:7.
OMUDIABOLI “U RYANGA OTJA ONGEYAMA, NDJI MAI TYE OVIMBORO”
3. Omena raye Satan tje ryanga ‘otja ongeyama ndji mai tye ovimboro,’ nu u vanga okutjita tjike?
3 Munda imbwi owarwe, pe noviutwa vyarwe vyombepo mbi ha kara nenyando tji mavi munu ovandu amave papitisiwa. Otjiṋa otjipindikise ku Satan nozondemone okumuna ovandu omayovi omengi nao tji mave piti mouye ourunde mbwi. Owo tjiri mave sokupindika orondu Satan ee rihivi kutja kape nomundu ngu karera Jehova mena rorusuvero rwatjiri, nokutja kape nomundu ngu ma ṱakama mu Mukuru tja munu omarorero omanene. (Job 2:4, 5) Otjikando atjihe omundu tja toora ondando yokuriyandja ku Jehova, tji raisa kutja Satan omunavizeze. Pe sana aayo otjivike atjihe mombura Satan u havara otupyu momurungu povikando eyovi. Okutja otje he ri otjikumise tje “ryanga otja ongeyama, ndji mai tye ovimboro amai paha ingwi ngu mai vanga okuteta”! (1 Petrus 5:8) “Ongeyama” ndji i vanga okunyona oupanga wetu na Jehova.—Epsalme 7:1, 2; 2 Timoteus 3:12.
4, 5. (a) Omiano viṋe vivari ovinanḓengu Jehova mbye tjaera omasa waSatan? (b) Omaundjiro yeṋe Ovakriste vatjiri ngu ve na yo?
4 Nandarire kutja omunavita na eṱe ngwi otjindandi, eṱe katu sokumutira. Ongwaye tji tu ha sokumutira? Omena rokutja Jehova u tjaera ‘ongeyama ndji tya ovimboro’ ndji momiano vivari. Omiano viṋe mbyo? Rutengatenga, Jehova wa kwizika kutja “otjimbumba otjinene” tjOvakriste vatjiri matji tuurunga ‘ondatumisire ondirise’ ndji mai ya. (Omavandururiro 7:9, 14) Mukuru aruhe u yenenisa omakwizikiro we. Nu nandarire Satan ma tjiwa kutja kamaa yenene okupukisa ovakarere vaMukuru avehe.
5 Omuano outjavari Mukuru mbwe tjaera Satan mau munikire komambo wouatjiri nga hungirwa i umwe wovakarere ovaṱakame vaMukuru. Omuprofete Asarja wa tja nai kombara Asa: “Muhona u ri puna eṋe, eṋe ngunda amu ri puna Ye.” (2 Ekuruhungi 15:2; 1 Ovakorinte 10:13) Pe novihorera ovingi mbya tjangwa mbi raisa kutja morukapitaveze Satan kena pa toṋa mokunyona ovakarere vaMukuru mba ri noupanga wopopezu na Ye. (Ovaheberi 11:4-40) Ndino wina Omukriste ngu noupanga wopopezu na Mukuru ma yenene okupirukira Omudiaboli poo nandarire okumutaara. Tjiri, Embo raMukuru ri tu kwizikira kutja: “Pirukireye Satan, neye ma tupuka a zu po pu eṋe.”—Jakobus 4:7.
‘EṰE TU RWA NOZOMBEPO OZONAMASA ZOUYE OURUNDE MBWI’
6. Satan u rwa vi ku nOvakriste vatjiri kourike wawo?
6 Satan kamaa roro okutaara ovita ku novakarere vaJehova otjotjimbumba, nungwari mape ya kourike wetu atu ṱu movita mbi tji tu hi nakukengeza. Satan u tjiwa kutja tja ngundiparisa oupanga wetu kuna Jehova eye ma yenene okutunyona. Otjiṋa hi u tji tjita vi? Eye u tu wira nomarorero omazeu, u tu rwisa koumweumwe, nu u tu honina movineya. Ngatu tare kutja Satan otjiṋa hi u tji tjita vi.
7. Omena ratjike Satan tje pirukira ovakarere vaJehova nomasa?
7 Satan u tu rwisa nomarorero omazeu. Omuapostele Johanes wa tja: “Ouye auhe u ri kehi youhonapare waingwi umwe Omunaurunde.” (1 Johanes 5:19) Momambo ngo mu nerakiza kOvakriste vatjiri avehe. Mena rokutja Satan wa pukisa ovandu avehe mouye, ombango ye nai i ri ku imba mbe karera Jehova nu u ve wira nomarorero omengi tjinene. (Mika 4:1; Johanes 15:19; Omavandururiro 12:12, 17) Eye u nomazenge omengi orondu u tjiwa kutja oruveze ndwa sewa na rwo orusupi. Okutja eye nai u rora ovandu mondondo yokombanda. Eṱe nai tu ri moruveze rwozongondjero ozosenina zaSatan zokuteya oupanga wetu na Jehova. Okutja nai indwi ondu ri “oruveze orusemba” ndu matu ‘sokutjiwa kutja tu sokutjita tjike.’—1 Ekuruhungi 12:32.
8. Indu omuapostele Paulus tja tja ‘tu rwa’ nozombepo ozombi, eye aa heye tjike?
8 Satan u tu rwisa koumweumwe. Omuapostele Paulus wa rakiza ovakambure ovakwao kutja: ‘Eṱe tu rwa nozombepo ozonamasa zouye ourunde mbwi.’ (Ovaefese 6:12) Embo rOtjigrike nda torokwa ‘okurwa’ ri heya ‘otjirwa tjokupirikiha,’ tjimuna ovandu mbe ri mokaongo nu mbu mave kondjo okunatasana. Okutja indu Paulus tja ungurisa embo ndo wa raisa kutja auhe wetu u kara notjirwa ku nozombepo ozombi. Kutja twa tura mehi ovandu mu ve kambura tjinene mozombepo ozombi poo indee, atu zembi kutja okuza keyuva ndi twe riyandja ku Jehova, tu ri aayo twa hita mokaongo kokunatasana nga. Okutja Omukriste auhe ma sokutjiwa kutja okuza keyuva nde riyandja ku Jehova, eye wa hita motjirwa hi. Indu Paulus tja tjanga kOvakriste moEfesus, opa zokuyarukira po kutja ngave ‘pirukire’ nokutja ngave ‘rirongerere’ okurwa nozombepo ozombi.—Ovaefese 6:11, 13, 14.
9. (a) Ongwaye Satan nozondemone tji ve ungurisa omiano omingi ‘vyovineya’? (b) Omena ratjike Satan tje kondja okuzunḓa omeripura wetu, nu eṱe matu yenene okupirukira vi ozongondjero ze nḓo? (Tara kokaongo nga “Ritjevereye kovineya vyaSatan!”) (c) Nai matu katara kotjineya tjiṋe tjaSatan?
9 Satan u tu honina movineya. Paulus wa tunduuza Ovakriste kutja ngave pirukire “omatjendje [poo “ovineya,” NW]” vyaSatan. (Ovaefese 6:11) Embo ndi “omatjendje” Paulus nda ungurisa mba mari raisa kutja ozombepo ozombi kaze ungurisa omuano umwe uriri wovineya nungwari ze ungurisa ovineya ovingi. Nu ze nepu ewa ndi ze tjitira nao, orondu otja oruveze tji maru kayenda ovakambure tjiva mba yenena okupirukira omuano umwe womarorero va yenena okuputara mu yarwe. Okutja Omudiaboli nozondemone ve konḓonona omuano mbu tu ritjinda okutara kutja tu noungundipare waye. Okuzambo ave ungurisa oungundipare mbo okutupukisa na wo. Ouṋingandu eṱe tu tjiwa omihingo omingi Omudiaboli mbye ungurisa okuturora na vyo orondu ovyo vya vandururwa mOmbeibela. (2 Ovakorinte 2:11) Mokambo nga twa hungirira ku tjiva vyomihingo Omudiaboli mbye ungurisa, tjimuna ombate yokusuvera oviṋa vyouye, omapanga omavi noruvakiro. Nambano ngatu tare kotjineya tjarwe Satan tje ungurisa okutupukisa na tjo. Otjineya hi oundjai.
OKUUNGURISA OUNDJAI KU TEYA OMAKWIZIKIRO WETU NA JEHOVA
10. (a) Oundjai u kamburira mo tjike? (b) Jehova u noumune uṋe ohunga noundjai, nu ove u u vara vi?
10 Omundu ngu ungurisa oundjai poo ounganga u hakaena ku nozombepo ozombi. Omiano tjiva vyoundjai mbi ungurisiwa, okuuka poo okuvetera, nokurovasana nokuyambera kovaṱi. Otja tji matu tjiwa nawa, Jehova u vara omaungurisiro woundjai otjotjiṋa ‘otjiyaukise.’ (Deuteronomium 18:10-12; Omavandururiro 21:8) Nu mena rokutja eṱe wina matu ‘sokutonda ouvi,’ okutja kamaa rire otjiṋa otjiwa okupaha oupanga ku nozombepo ozombi. (Ovaroma 12:9) Imbo tjiri ma rire omukambo omuyaukise nu omuhihamise ku Tate womeyuru Jehova!
11. Ongwaye tji ma rire ondoṋeno onene tjinene Satan tje tu pukisa kutja tu kare norupa moundjai? Sasaneka.
11 Nu mena rokutja okuungurisa oundjai otjiṋa otjiyaukise nu tji matji teya oupanga wetu na Jehova, Satan ope zokukondja tjinene nao kutja tu ritwe moundjai. Otjikando atjihe Satan tja pukisa Omukriste kutja ma kare norupa moundjai, Satan tjiri u muna ondoṋeno onene tjinene. Ongwaye tji matu tja nao? Tara kotjisasanekero tji: Indu omurwe wovita tja popwa okupoka kotjimbumba tje tjovita ne rikutu ku notjimbumba tjovanavita, omuhongore wotjimbumba otjipirure tjiri ma kara nondjoroka tjinene. Omuhongore ngwi nandarire mape ya a raisa omurwe ngo komuhongore wotjimbumba mu mwa ri omurwe ngo otjomuano wokumunyekerera. Momuano tjingewo, indu Omukriste tji ma ungurisa oundjai, okutja eye ma pokere wina ku Jehova nu me ritwa omuini kehi youvara waSatan. Ripura uriri kutja matji yandja ondjoroka ndji ṱa pi ku Satan tja ungurisa Omukriste ngwa poka ku Jehova ngwi otjomuano wokurihiva kutja wa toṋa motjirwa ho! Mape ya atu vanga okuyandjera kutja Omudiaboli ma mune ondoṋeno ndjo tjiri? Nokaparukaze! Eṱe kamaatu vanga okuteya omakwizikiro wetu kuna Jehova.
SATAN U PURA OMAPURIRO KUTJA TU KEYAKEYE
12. Omuhingo uṋe Satan mbwe ungurisa kutja ma rundurure oumune wetu ohunga noundjai?
12 Eṱe tji twa nakaura oundjai, okutja Satan kamee u ungurisa okutupora ku Jehova. Eye ope zokukondja okurundurura omeripura wetu. Ihi u tji tjita vi? Eye u paha omiano vyokupukisa Ovakriste ngandu ndi tjiva tji va utu okuripura kutja “ouvi owo ouwa, nouwa owo ouvi.” (Jesaja 5:20) Ihi u tji tjita mokuungurisa omuhingo mbwe toṋa na wo, imbwi wokupura omapuriro ngu mape ya aye tjiti kutja tu ute okukeyakeya ohunga noviṋa mbi matu tjiwa rukuru.
13. Satan wa ungurisa vi omapuriro okukuna omakeyakeyero momundu ohunga noviṋa mbi ma tjiwa rukuru?
13 Tara komuano Satan mbwa ungurisa omapuriro moruveze ndwa kapita. Motjikunino tjaEden eye wa pura Eva kutja: “Indu Ndjambi otja hee, tjiri, kutja aamu ri komiti ngamwa avihe motjikunino?” Moruveze rwaJob, ovaengeli tji va ri nombongarero meyuru, Satan wa pura Mukuru kutja: “Job itje rikotamena kOve are, andakuzu ke notjiṋa tje muna mo?” Indu Jesus tja uta otjiungura tjokuzuvarisa kombanda yehi, Satan we mu toka na tja: “Tjinangara oOve Omuna waNdjambi, raera omawe nga kutja ye rire ozomboroto.” Indu Satan tja ungurisa omambo nga, “oOve Omuna waNdjambi,” ondando ye ya ri oyokutoka omambo tjingewo ngo Jehova omuini nga hungira ovivike hamboumwe komurungu wanao, indu tja raera Jesus kutja: “Ingwi Eye Omuna wandje omusuverwa Ami mu mbi nonyuṋe”!—Genesis 3:1; Job 1:9; Mateus 3:17; 4:3.
14. (a) Satan u ungurisa vi omihingo vye vyokukuna omakeyakeyero movandu ohunga noundjai? (b) Matu katara ku ye nai?
14 Omudiaboli ndino u ungurisa omihingo tjingevyo vyokukondja okukuna omakeyakeyero movandu kutja ave ha munu kutja oundjai otjiṋa otjivi. Satan wa toṋa mombate ye ndji yokukuna omakeyakeyero mouripura wovakambure tjiva. Owo va uta okumuna kutja ngahino kamaungurisiro aehe woundjai nge ri omavi. Okutja ve ripura kutja, ‘Okuungurisa oundjai “tjiri” onavi?’ (2 Ovakorinte 11:3) Matu yenene okuvatera vi imba mbe noumune mbo okurundurura oumune wawo? Matu yenene vi okuritjevera kutja omatiku waSatan aye he tu zunḓa? Kutja tu zire epuriro ndo, ngatu tare koviṋa vivari mehupo Satan mbya zunḓa noundjai. Ovyo omanyando nomapangero.
SATAN U UNGURISA OZONḒERO NOVIHEPWA VYETU OKUTUPUKISA NA VYO
15. (a) Ovandu ovengi momahi waEuropa na moAmerika yokeyuva kokunene, ve noumune uṋe ohunga noundjai? (b) Oumune ovandu mouye mbu ve na wo ohunga noundjai wa ṱuna vi kOvakriste tjiva?
15 Momahi waEuropa na moAmerika yokeyuva kokunene, ounganga noundjai vi varwa otjoviṋa uriri mbi hi noumba mbu vi eta. Mozomuvi na momambo nozoprograma zotivii nomanyando wozokombiuta potuingi ovitjitwa vyoundjai vi raisiwa otjomanyando nge hi noumba nu imba mbe nyanda oviṋa mbi ve munikisiwa aayo ombe ri ozonongo. Ozomuvi nomambo tjiva yoviṋa mbi tjama noundjai vi yakurwa tjinene. Ihi otjiraisiro otjikahu kutja ozondemone za toṋa mokumunikisa oundjai otjotjiṋa tji tji hi noumba. Ouhumandu pe nOvakriste tjiva mba hara oumune otja imbwi. Okuyandja otjihorera, Omukriste umwe tja za nokutara omuvi ndji notjiṋa noundjai wa tja, “Ami mba tara omuvi ndji uriri, nungwari hi ungurisire oundjai.” Ongwaye okuripura nao tji maku tu hitisa moumba?
16. Ongwaye okutoorora omanyando nge notjiṋa noundjai tji maku tu hitisa moumba?
16 Nandarire kutja pe nombangu pokati kokuungurisa oundjai nokutara uriri motivii, ihi tjiri katji hee kutja okutara uriri kaku noumba mbu ku eta. Ongwaye tji maku zu nao? Ripura na ihi: Embo raMukuru ri raisa kutja Satan poo ozondemone ze kaze tjiwa imbi mbi ri mouripura wetu.a Okutja otja tji pa tamunwa rukuru, ozombepo ozombi ze konḓonona ovitjitwa tjimuna omanyando ngu twa suvera kokutja ze yenene okutjiwa kutja tu ripura tjike nokutja tu noungundipare waye. Indu ovitjitwa vyOmukriste tji mavi raisa kutja eye u yorokera ozomuvi poo omambo nge notjiṋa nounganga, noundjai poo ovandu mba kamburwa i ozondemone, okutja eye nao ma tjivisa ozondemone kutja u noungundipare watjike. Okutja ozondemone otji ze kondja tjinene okurora Omukriste ngo amaze ungurisa oungundipare we mbwi ngandu ndi tji ze mu nata. Ovandu tjiva mba uta okusuvera oundjai mena rokutara omanyando nge notjiṋa noundjai motivii, kombunda va kauta okuungurisa oundjai.—Ovagalate 6:7.
17. Satan u ungurisa otjineya tjiṋe okurora na tjo ovavere?
17 Satan ka ungurisa omanyando ngu twa suvera porwawo okuturora na wo nungwari wina u ungurisa omapangero. Omomiano viṋe? Indu Omukriste tje ha veruka nandarire kombunda yokumuna omapangero omasemba kozonamiti mape ya atji tjiti kutja me rihahize. (Markus 5:25, 26) Ihi tji yandja oruveze ku Satan nozondemone ze okuungurisa ongaro yOmukriste ndji okumurora na yo. Ozo ze tjiwa nawa kutja embo raMukuru ri rakiza Ovakriste kutja ‘Amu tjiti ko omaveterero noundjai.’ (Levitikus 19:26) Okutjita kutja Omukriste a ha yandja ombakatwi kerakiza ndo, ozondemone ze yenena okurora omuvere kutja ma yende poo kutja ma yakure omapangero nge notjiṋa noundjai. Indu otjineya tjozondemone hi tji tja toṋa, tji yenena okungundiparisa oupanga womuvere ngwi kuna Mukuru. Omomuano uṋe?
18. Omapangero yeṋe Omukriste ngu ma sokunakaura, nu omena ratjike?
18 Jehova ma rakiza imba mbe hi nonḓuviro komatwako we kutja: “Ngu ha ṱakamisa omatwako, ongumbiro ye wina ondjaukise ku Ndjambi.” (Omiano 28:9) Tjiri matu sokukondja okunakaura oviṋa ngamwa avihe mbi mape ya avi tjiti kutja ozongumbiro zetu ze rire ozondjaukise ku Jehova poo vi tjite kutja Jehova aha vanga okutuvatera rukwao, nu tjinenenene moruveze rwouvere. (Epsalme 41:3) Okutja Omukriste watjiri tja munu kutja omapangero worive ye notjiṋa noundjai, eye ma sokuyenakaura.b (Mateus 6:13) Indu tja tjiti nao ma kara nongamburiro kutja Jehova me mu vatere.—Tara kokaongo nga “Oviṋa mbi vi notjiṋa noundjai tjiri?”
INDU OMAHUNGI OHUNGA NOZONDEMONE TJI YA TAKAVARA
19. (a) Omudiaboli wa pukisa vi ovandu ovengi ohunga nomasa we? (b) Omahungi yeṋe Ovakriste vatjiri ngu mave sokunakaura?
19 Ngunda ovandu ovengi momahi waEuropa na moAmerika yokeyuva kokunene ave vara oundjai otjoviṋa uriri mbi hi noumba mbu vi eta, ovandu motupa twarwe mouye kave munu nao. Omudiaboli wa pukisa ovandu ovengi ngandu ndi tji va uta okumuna kutja eye u nomasa omengi pu pe he ri. Tjiva ve hupa memuma rozombepo ozombi. Nu varwe ve handjaura omahungi ohunga novitjitwa ovihimise vyozombepo ozombi. Omahungi otja ingo ye hungirwa nondjoroka orondu oyo oviṋa ovihimise ku wo. Eṱe matu sokukara norupa mokuhandjaura omahungi otja ingo po? Kako, ovakarere vaMukuru ve nakaura omahungi ngo mena romapu yevari omananḓengu.
20. Mape ya omundu a handjaura vi ovizeze vyaSatan mokuhinakutjiwa?
20 Epu etenga, indu tji matu serekarere omahungi ohunga noviṋa ozondemone mbu ze yenena okutjita, okutja matu yandja oruvara kozonḓero zaSatan zokupukisa ovandu. Omomuano uṋe? Embo raMukuru ri raisa kutja Satan u yenena okutjita ovihimise, nungwari wina ri tu rakiza kutja eye u ungurisa ‘oviraisiro vyakaseruseru nomapukisiro.’ (2 Ovatesalonika 2:9, 10) Nu mena rokutja Satan omupukise omunenenene, eye u tjiwa okuzunḓa omeripura wa imba mbe nanukirwa i oundjai nu u tjiwa okutjita kutja ve kambure moviṋa mbi he ri ouatjiri. Ovandu otja imbo mape ya ave kambura tjiri kutja va muna poo va zuva oviṋa vyorive mbyo nu ave utu okuviserekarera otjoviṋa mbya tjitwa tjiri. Kombunda oviṋa mbi otji vi munikisiwa ovinene i imba mbe ke vi serekarera komurungu. Indu Omukriste tji ma handjaura omahungi otja ingo, okutja eye ma tjiti ombango yOmudiaboli eye ngu ri “ihe yovizeze avihe.” Eye okutja ma handjaura ovizeze vyaSatan.—Johanes 8:44; 2 Timoteus 2:16.
21. Momahungi wetu matu sokuyandja ombango yetu ku uṋe?
21 Epu oritjavari, nandarire kutja Omukriste wa rora okuhakaena poo okuyenderwa i ozondemone, eye ka sokuserekarera nokuyorisa ovakambure ovakwao nomahungi ohunga novitjitwa mbyo. Omena ratjike? Metjangwa ndi matu tunduuzwa kutja, “ngatu siririke omeho wetu mu Jesus, omuute nomuyenenise wongamburiro.” (Ovaheberi 12:2) Okutja ombango yetu i sokukara mu Kristus, ka mu Satan. Nandarire kutja Jesus aa tjiwa ohunga na imbi Satan mbye yenena okutjita na mbye ha yenene okutjita, indu tja ri kombanda yehi eye kaa serekarere omiṱuka ohunga nozondemone kovahongewa ve. Nungwari ombango yaJesus ya ri mokuzuvarisa ombuze yOuhona. Okutja matu sokuhorera ku Jesus novaapostele ve nu atu hungire ohunga ‘noviungura ovihimise vyaNdjambi.’—Oviungura 2:11; Lukas 8:1; Ovaroma 1:11, 12.
22. Omomuano uṋe mu matu yenene okutjita kutja ‘meyuru mu kare nenyando’?
22 Satan tjiri u ungurisa ovineya ovingi tjimuna oundjai mokukondja okuteya oupanga wetu kuna Jehova. Nungwari tji twa tondo ouvi natu kakatere kouwa, okutja Omudiaboli kamaa munu oruveze rwokungundiparisa ongurameno yetu yokupirukira oundjai. (Ovaefese 4:27) Ripura ‘nenyando ndi mari kara meyuru’ indu tji matu kayenda komurungu okupirukira “omatjendje [poo “ovineya,” NW]” vyaSatan ngandu ndi eye tja yandekwa!—Ovaefese 6:11.
a Omana nga yandjwa ku Satan nga (Omupirukire, Omuyamburure, Omunavineya, Omurore, nOmunavizeze) kaye hee kutja eye u yenena okukonḓonona omitima nomeripura wetu. Munda imbo warwe Ombeibela i tja, “omutima u rorwa” i Jehova nu Jesus u tjiukwa otja umwe ngu “konḓonona omeripura nozonḓero zovandu.”—Omiano 17:3; Omavandururiro 2:23.
b Tji mo vanga ondjiviro yokomurungu, tara mokambo nga The Watchtower komayuva 15 ku Desemba 1994 pomukuma 19-22, kehi yomambo nga “A Health Test for You?” nokambo nga Awake! komayuva 8 ku Januari 2001 kehi yomambo nga “The Bible’s Viewpoint: Your Choice of Medical Treatment—Does It Matter?”