Adam na Eva tji va pita motjikunino tjaEden, owo va kapanduka ovanatje. Omuatje wawo omuzandu otjiveri wena Kain wa ri omukune nu ingwi omutjavari wena Abel wa ri omurise.

Eyuva rimwe, ooKain na Abel va tjita ombunguhiro ku Jehova. Mo tjiwa kutja ombunguhiro otjikeṋa? Oyo otjiyandjewa tjapeke ku Jehova. Jehova aa tjaterwa i ombunguhiro yaAbel posi yokutja kaa tjaterwa i indji oyaKain. Otjiṋa hi tja tjita kutja Kain ma pindike tjinene. Jehova wa raera Kain kutja omazenge we mape ya aye tjiti kutja ma tjite otjiṋa otjivi, posiya Kain kena pa puratena.

Moruveze rwanao, Kain wa raera Abel a tja: ‘Indjo tu yende mokuti.’ Ngunda ave ri aveyerike mokuti ngo, Kain wa tona omuangu we ne mu zepa. Jehova wa tjita vi ohunga notjiṋa hi? Jehova wa vera Kain mokumuhinda kokure neṱunḓu re. Kain kaa yandjerwa okukotoka rukwao.

Matu rihongere tjike kotjiṋa hi? Mape ya atu pindike indu oviṋa tji vi hina okukayenda momuano eṱe mbu matu vanga. Posiya tji twa munu kutja twa pindike poo varwe tji ve tu raere kutja twa pindike, tu sokuhakahana okuṱuna ongaro yetu tjarwe ngaatu tjiti oviṋa ovivi.

Mena rokutja Abel wa suverere Jehova nu aa tjiti ousemba, Jehova kamaa roro okumuzemba. Mukuru ma kapendura Abel indu eye tja ririsa ehi oparadisa.

Moruveze ndo, kwa ri ovandu ovengi kombanda yehi nu ovengi vawo aave tjiti oviṋa ovivi. Nandarire ovaengeli tjiva meyuru va uta okutjita ouvi. Va isa omaturiro wawo meyuru nave ya kombanda yehi. Mo tjiwa kutja ongwaye tji va tjita nao? Kokutja ve ritanaurire motutu twovandu nu ve kupasane novakazendu.

Ovaengeli novakazendu mba va panduka ovanatje ovazandu, nowo ve kura ave rire ovanamasa tjinene nu aave tatumisa ovandu. Jehova kaa yenene okuyandjera oviṋa mbyo okukayenda komurungu. Kunao, eye wa toora omukambo wokuyandeka ovandu ovavi nomupupo.

Posiya pa ri omurumendu ngwa pangukire. Eye wa suverere Jehova. Ena re ra ri Noa. Eye wa ri nomukazendu novazandu 3, ooSem, Ham na Jafet, nowo vari novakazendu vawo. Jehova wa raera Noa kutja ma tunge oskepi onene, kokutja eye neṱunḓu re ve yamwe kOmupupo. Oyo yari tjimuna otjikesa otjinene tji matji kayenda kombanda yomeva. Jehova wina wa raera Noa ma hitise ovipuka ovingi moskepi kutja ovyo wina vi yamwe.

Tjimanga, Noa wa uta okutunga oskepi. Noa neṱunḓu re va tunga oskepi oure wozombura 50. Owo va tunga oskepi ndjo otja Jehova tje ve raera. Moruveze ndo, Noa wa rakiza ovandu ohunga nOmupupo. Nungwari, kapena ngwa puratena ku ye.

Oruveze nambano rwa yenena ku wo okuhita moskepi. Indjo tu tare kutja pa tjitwa tjike kombunda yanao.