EPU 11

Hungira nonḓero yatjiri

Ovaroma 12:11

OUSUPI: Tunduuza nokuhinga ovapuratene voye mokuhungira nouvanḓe.

Tjita kutja oviṋa mbi mo hongo vi ṱune komutima woye. Otja tji mo rirongerisa okuyandja ehungi roye, ripurira oukoto kounahepero wombuze yoye. Tjiwa oviungurisiwa vyoye nawa kutja u yenene okuhungira okuza komutima.
Ripurira kovapuratene voye. Ripurira ko oukoto kokutja ondjivisiro ndji mo lese poo okuhonga mai yenene vi okuvatera varwe. Ripurira komuano mbu mo yenene okuyandja ondjivisiro ndji, kutja i yenene okuhinga ovapuratene voye okuraisa ondangi.
Hungira okuza komutima. Hungira nouvanḓe. Oviṱuve nomake nongaro yomurungu woye ngavi raise oumune woye.

Kondja kutja oha teya ombango yovapuratene voye mokuungurisa omake noviṱuve vyoye momuano umwe mbu wa iririra tji mo hungire. Ungurisa omake noviṱuve indu tje ri ohepero. Hungira nonḓero indu tji mo hongo omapu omananḓengu na tji mo tunduuza ovapuratene voye kutja ve toorere ko omikambo. O urisa ovapuratene voye mokuhungira nonḓero tjinene, poo okuririsa ehungi roye enamuinyo tjinene.